Mga Hukom 19
19
Ang Levita kag ang Iya Babayi
1Sadto nga mga inadlaw, sang wala pa sing hari ang Israel, may isa ka Levita nga nag-estar sa malayo nga kabakuloran sang Efraim. Nagkuha sia sing isa ka babayi halin sa Betlehem, sa Juda, nga manginbabayi niya. 2Pero naakig sa iya ang iya babayi, kag nagpauli ini sa balay sang iya amay sa Betlehem. Nagtener sia didto sing apat ka bulan. 3Dayon nagpamat-od ang lalaki sa pag-apas sa iya, kag gin-uloulohan sia sa pagbalik sa iya. Gindala niya ang iya suloguon kag ang duha ka mga asno. Gindala sia sang babayi sa balay sang iya amay kag sang makita sia sang amay sang babayi, gin-abiabi sia sing malipayon. 4Ang amay sang babayi naghawid sa iya sa pagpabilin, gani nagpabilin sia sing tatlo ka adlaw. Nagkaon sia kag ang iya babayi kag nagtener sila sing mga pila ka gab-i didto. 5Sang pagkaaga sang ikap-at nga adlaw, nagbugtaw sila sing aga pa, kag nag-aman sa paglakat. Pero nagsiling ang amay sang babayi sa Levita, “Magkaon ka anay, agod magabakod ang imo lawas. Lakat ugaling dugaydugay.”
6Gani ang amay sang babayi kag ang Levita nagpungko sa pagkaon kag pag-inom. Dayon nagsiling sa iya ang amay sang babayi, “Kon mahimo magpabilin ka sa bug-os nga gab-i, kag magpangalipay ka.”
7Malakat na kuntani ang lalaki, pero ginpilit sia sang amay sa pagpabilin, gani nagtener pa gid sia liwat didto sa bug-os nga gab-i. 8Sa ikalima nga adlaw, aga pa sia nagbangon agod maglakat, pero ang amay sang babayi nagsiling sa iya, “Kon mahimo magkaon ka anay. Karon ka lang dugaydugay lakat.” Gani nagkaon sila sing dungan.
9Sang manuglakat na ang lalaki, ang iya babayi, kag ang iya suloguon, nagsiling ang amay, “Tan-awa hapon na gid ini kaayo, maayo pa magtener na lang kamo sa bug-os nga gab-i. Madulom na dugaydugay, magpabilin na lang anay kamo diri kag magpangalipay. Buas, aga pa kamo bugtaw, agod makalakat kamo kag magpauli.”
10-11Pero ang lalaki indi gusto sa pagpabilin sing isa pa ka gab-i, gani naglakat sia kag ang iya babayi upod sa iya suloguon kag sa iya duha ka mga asno nga may mga montora. Kahapunanon na sang makaabot sila malapit sa Jebus (nga amo ang Jerusalem), gani ang suloguon nagsiling sa iya agalon, “Ngaa indi na lang kita maghapit kag magpabilin sa bug-os nga gab-i diri sa siudad sang mga Jebusnon?”
12-13Pero nagsiling ang iya agalon, “Indi kita maghapit sa siudad nga ang mga tawo indi mga Israelinhon. Mapadayon kita sa ulounhan, kag magpaligad sing isa ka gab-i sa Gebeat ukon Rama.” 14Gani ginligaran nila ang Jebus kag nagpadayon sila sa ila dalanon. Nagahinunod na ang adlaw sang makaabot sila sa Gebeat, sa kadutaan sang tribo ni Benjamin. 15Naghapit sila didto sa pagpaligad sang gab-i. Nagsulod sila kag nagpungko sa plasa sang siudad, pero wala gid sing tawo nga nag-agda sa ila sa pagdayon sa ila balay sadto nga gab-i.
16Sadto nga gab-i, may tigulang nga lalaki nga nagpauli halin sa iya obra sa uma. Ini nga tawo didto anay nagaestar sa kabakuloran sang Efraim, pero karon nagatener sia sa Gebeat. (Ang mga tawo didto naggikan sa tribo ni Benjamin.) 17Natalupangdan sang tigulang nga lalaki ang tawo nga umalagi didto sa plasa sang siudad, kag ginpamangkot sia sang tigulang, “Taga-diin ka bala, kag diin ka makadto?”
18Nagsabat ang Levita, “Nagapanglakaton kami halin sa Betlehem sa Juda, kag nagapakadto kami sa malayo nga lugar sa kabakuloran sang Efraim, diin ako nagaestar. Nagkadto ako sa Betlehem, pero, karon nagapauli#19:18 Ang isa ka dumaan nga pagbadbadnagapauli; sa Hebreonagapakadto sa balay sang Ginoo. na ako. Wala sing isa nga nag-agda sa akon sa pagtener sa iya balay. 19May inugpakaon kami kag inugpahalab para sa amon mga asno, may tinapay kag bino para sa akon kag sa akon babayi, kag para sa akon suloguon. May tuman kami nga balon para sa amon kinahanglanon.”
20Nagsiling ang tigulang nga lalaki, “Didto lang kamo dayon sa akon balay! Ako ang mahibalo sa imo, kon mahimo indi ka magpabilin sini nga gab-i sa plasa.” 21Gani gindala niya sila pauli sa iya balay, kag ginpakaon niya ang ila mga asno. Ang iya mga bisita nanghinaw sang ila mga tiil, kag nagkaon kag nag-inom.
22Nagakinasadya#Gen. 19:5-8. gid sila sang hinali may mga malauton nga mga lalaki halin sa banwa nga naglibot sa balay kag nagpamukpok sa pwertahan. Nagsiling sila sa tigulang nga lalaki, “Pagwaa ang lalaki nga nag-upod dira sa imo! Luyag kami magpakighilawas sa iya!”
23Pero naggwa ang tigulang nga lalaki kag nagsiling, “Kon mahimo mga abyan, indi lang ninyo paghimua ina! Indi ninyo paghimua ina nga kalautan kag mahigko nga butang! Ini nga tawo akon bisita. 24Tan-awa ninyo yari ang iya babayi, kag ang akon birhen nga anak nga dalaga. Dalhon ko sila diri sa gwa kag ihatag ko sila sa inyo. Pagusto kamo kon ano ang himuon ninyo sa ila. Pero indi lang ninyo paghimua ining malaut nga butang sa sini nga tawo!” 25Pero ang mga tawo indi magpati sa iya. Gani ginkuha sang Levita ang iya babayi kag ginpagwa sa ila. Ginlugos nila sia kag ginhimuslan sa bug-os nga gab-i, kag wala sila mag-untat tubtob mag-aga.
26Sang kaagahon na, nagbalik ang babayi kag natumba sa pwertahan sang balay sang tawo nga tigulang sa diin yara ang iya bana. Nagpabilin sia didto tubtob magsanag ang adlaw. 27Sang pagbugtaw sang iya bana sadto nga aga, kag sang ginbuksan niya ang pwertahan sa pagpadayon sang iya paglakat, nakita niya ang iya babayi nga nagahamyang sa atubangan sang balay, nga ang iya mga kamot nagadab-ot sang pwertahan. 28Nagsiling ang Levita, “Bangon ka, kay malakat na kita.” Pero wala na sia makasabat. Gani ginsablay niya ang bangkay sang iya babayi sa likod sang asno, kag naglakat sia sa pagpauli. 29Sang#1 Sam. 11:7. makaabot sia sa iya balay, nagsulod sia kag nagkuha sing sundang. Ginkuha niya ang bangkay sang iya babayi, kag ginhiwahiwa niya ini sa dose ka parti kag ginpadala niya ini sa dose ka mga tribo sang Israel. 30Ang tagsatagsa nga nakakita sini nagsiling, “Wala pa gid kami makakita sing subong sini! Wala pa gid sing natabo nga pareho sini halin sang paggwa sang mga Israelinhon sa Ehipto. Hunahunaa ninyo kag binagbinaga ini! Ano bala ang aton himuon nahanungod sini?”
Currently Selected:
Mga Hukom 19: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
