Mga Hukom 14
14
Si Samson kag ang Babayi halin sa Timna
1Isa ka adlaw nagdulhog si Samson sa Timna, sa diin nakita niya ang isa ka dalaga nga Filistinhon. 2Nagpauli sia kag ginsugiran niya ang iya amay kag iloy, “May nakita ako nga isa ka babayi nga Filistinhon sa Timna. Kuhaa ninyo sia, kay luyag ko sia pangasaw-on.”
3Pero nagpamangkot sa iya ang iya amay kag iloy, “Ngaa magpangasawa ka sang isa ka babayi nga halin sa mga Filistinhon nga di-tinuli? Wala ka bala sing nakita nga dalaga gikan sa imo mga pariente, ukon sa aton mga tawo?”
Pero nagsiling si Samson sa iya amay, “Kuhaa ninyo sia para sa akon, kay naluyag gid ako sa iya.”
4Wala makahibalo ang iya amay kag iloy nga ang Ginoo amo ang nagtuytoy kay Samson sa paghimo sini, kay ang Ginoo nagapangita sing kahigayunan sa pagsumpong sa mga Filistinhon. Sa sini nga tion ang mga Filistinhon nagagahom sa Israel.
5Gani nagdulhog si Samson sa Timna upod sa iya amay kag iloy. Sang nagaagi sila didto sa talamnan sang ubas, nabatian niya ang bataon nga leon nga nagangurob sa iya. 6Sa hinali si Samson ginhatagan sing kusog sang Espiritu sang Ginoo. Gindakop niya ang leon kag ginpihak sang iya lamang kaugalingon nga mga kamot, nga daw pareho lamang sang tinday nga kanding. Pero wala niya pagsugiri ang iya amay kag iloy sang iya ginhimo.
7Dayon nagkadto si Samson kag nagpakighambal sa dalaga, kag naluyag gid sia sa iya. 8Sang makaligad ang pila ka adlaw nagbalik si Samson sa pagpangasawa sa iya. Naglipas sia sa dalan sa pagtan-aw sang leon nga iya ginpatay, kag natingala sia sang makita niya nga ginapungyotan ini sang mga putyokan, nga may dugos sa sulod sang patay nga lawas sang leon. 9Ginsandok niya sang iya kamot ang dugos kag ginkaon niya ini samtang nagalakat sia. Dayon nagkadto sia sa iya amay kag iloy kag ginhatagan niya sila. Nagkaon sila, pero wala sila pagsugiri ni Samson nga ginkuha niya ang dugos sa lawas sang leon nga patay.
10Nagkadto ang iya amay sa balay sang dalaga, kag si Samson nagpapunsyon didto. Amo ini ang kinabatasan sang pamatan-on nga mga lalaki. 11Sang makita sia sang mga Filistinhon nagdala sila sing traynta ka pamatan-on nga mga lalaki sa pag-upod sa iya. 12Nagsiling si Samson sa ila, “Pakta ninyo ini nga paktakon. Kon mapaktan ninyo ang kahulogan sini sa sulod sang pito ka adlaw sang punsyon dayon hatagan ko kamo sing traynta ka panid nga lino, kag traynta ka ilislan nga malahalon nga bayu. 13Pero kon indi kamo makapakot sang kahulogan sini, ti kamo ang mahatag sa akon sang traynta ka panid nga lino, kag traynta ka ilislan nga malahalon nga bayu.”
Nagsiling sila sa iya, “Sugiri kami sang paktakon, kay pamatian namon.”
14Nagsiling si Samson,
“Halin sa manugkaon nakuha ang kalan-on,
halin sa makusog nakuha ang matam-is.”
Sa tapos ang tatlo ka adlaw, indi pa gid nila mapaktan kon ano ang kahulogan sang paktakon.
15Sang ikap-at#14:15 Ang iban nga dumaan nga mga pagbadbadikap-at; sa Hebreoikapito. nga adlaw ginsingganan nila ang asawa ni Samson, “Utisa ang imo bana nga sugiran kami sang kahulogan sang paktakon. Kon indi ka, sunogon namon ang balay sang imo amay asta ikaw.#14:15 sunogon namon…asta ikaw: ukonsunogon namon ikaw kag ang imo panimalay. Kamo nag-agda sa amon agod paimulon kami. Indi bala matuod ini?”
16Gani ang asawa ni Samson nagkadto sa iya nga nagahibi kag nagsiling, “Wala mo ako ginahigugma, kundi ginadumtan mo ako! Ginhatagan mo sing paktakon ang akon mga abyan, pero wala mo ako pagsugiri sang kahulogan sini!”
Si Samson nagsiling sa iya, “Pamati bala anay, wala ko gani pagsugiri ang akon amay kag iloy. Ngaa nga sugiran ko ikaw?” 17Nagpadayon sa paghibi ang asawa ni Samson sa sulod sang pito ka adlaw sang punsyon tungod sini. Pero sa ikapito nga adlaw ginsugiran sia ni Samson sang sabat, kay nagapamilit gid sia nahanungod sini. Iya dayon ginsugiran ang mga Filistinhon. 18Gani sa ikapito nga adlaw sa wala pa magtunod ang adlaw, nagsiling sa iya ang mga tawo sang siudad,
“Ano bala ang mas matam-is pa sang sa dugos?
Ano bala ang mas makusog pa sang sa leon?”
Nagsabat si Samson,
“Kon wala ninyo pag-iarado ang akon baka,
wala kuntani kamo makapakot sang akon paktakon.”
19Sa hinali ginhatagan si Samson sang Espiritu sang Ginoo sing kusog, kag nagdulhog sia sa Askelon sa diin ginpatay niya ang traynta ka mga lalaki, gin-ubahan sila, kag ginhatag niya ang ila malahalon nga mga bayu sa mga tawo nga nagpakot sang iya paktakon. Sa tapos sina nagpauli sia nga nagabalingaso sa kaakig tungod sa natabo. 20Ang asawa ni Samson ginpaasawa sa iya abyan nga amo ang nagbulig sa iya sang sia ang ginkasal.
Currently Selected:
Mga Hukom 14: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
