Isaias 32
32
Ang Matarong nga Hari
1Sa ulihi nga mga inadlaw may isa ka hari nga magadumala sa pagkamatarong kag may mga opisyales nga magagahom sa katarungan. 2Ang tagsatagsa sa ila manginkaangay sang palalipdan sa hangin kag lugar nga palanaguan sa mga bagyo. Manginkaangay sila sang mga sapa nga nagailig sa desierto, kaangay sang landong sang daku nga bato sa kigas nga duta. 3Sila magatalupangod kag magatatap sang kinahanglanon sang mga tawo. 4Indi na sila magkataka kundi magmahinangpanon kag magahambal sang ila luyag isiling. 5Wala sing isa nga maghunahuna nga ang buangbuang nga tawo dungganon, ukon magsiling nga ang malaut nga tawo masaligan. 6Ang isa ka buangbuang nga tawo nagahambal sang binuang kag nagaplano sa paghimo sang mga butang nga malaut. Ang iya ginahimo kag ang iya ginasiling mga pasipala sa Ginoo, kag wala niya ginapakaon ang gutom ukon ginahatagan sing ilimnon ang ginauhaw nga mga tawo. 7Ang pamaagi sang balingag nga tawo malaut kag nagahimo sing malaut nga mga butang, nagapadihot sia sa paglaglag sang mga imol paagi sa mga binutig agod indi nila maangkon ang ila mga kinamatarong. 8Pero ang masaligan nga tawo nagahimo sing matarong kag nagatindog sing malig-on sa katarungan.
Ang Paghukom kag ang Pagbalik
9Kamo nga mga babayi nga nagakabuhi sing matawhay, nga wala sing palaligban, pamati kamo sa akon ginasiling. 10Ayhan karon kontento na kamo sang inyo kahimtangan, pero sa madason nga tuig sa sini nga tion magakalisod kamo, tungod kay wala kamo sing ubas nga maipo. 11Nagpangabuhi kamo sing matawhay, kag wala sing palaligban, pero karon, magakurog kamo sa kahadlok! Ubaha ang inyo mga bayu kag magtampi sing mga lapat. 12Pukpoka ang inyo mga dughan sa kasubo, tungod kay ang inyo mapatubason nga mga uma kag mga talamnan sing ubas nalaglag, 13kag ang mga talungon kag mga sapinit nagatubo sa duta sang akon mga tawo. Maghibi kamo tungod sa mga panimalay sa diin ang mga tawo sang una malipayon kag sa mga siudad nga sang una masadya. 14Bisan ang palasyo pagabayaan kag ang kapital nga siudad pagapatumbayaan. Ang mga pamalay kag mga pamakod nga nagalibot sa ila maguba sa walay katubtoban. Ang talunon nga mga asno magalagaw didto, kag ang mga karnero makakita sing halalban didto.
15Pero ang Dios magapadala sa aton liwat sang iya Espiritu. Ang desierto manginmapatubason nga duta, kag ang mga kaumhan magapatubas sing madamo. 16Ang katarungan kag matarong nga paghukom magaluntad sa bug-os nga duta. 17Tungod kay ang tanan magahimo sing matarong, may paghidait kag kalig-unan sa wala sing katapusan. 18Ang mga tawo sang Dios wala sing palaligban, kag ang ila mga balay manginmalinong kag wala sing katalagman. 19Pero ang yelo nga daw mga bato magaulan sa mga kagulangan, kag ang siudad maguba, 20daw ano iya ang pagkinalipay sang tagsatagsa nga may bugana nga tubig para sa ila mga tanom, kag may halalbon nga hilway sa katalagman bisan diin para sa ila mga asno kag kabakahan.
Currently Selected:
Isaias 32: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
