Oseas 4
4
Ang Panumbongon sang Ginoo batok sa Israel
1Ang Ginoo may panumbongon sa mga tawo nga nagaestar sa sini nga duta. Magpamati ka, O Israel, sa ginasiling sang Ginoo: “Wala sing katutom ukon paghigugma sa duta, kag ang mga tawo wala nagakilala sa akon subong nga Dios. 2Ang mga tawo nagasaad pero wala nila ini ginatuman. Nagabinutig sila, nagapamatay, nagapangawat, kag nagapanginbabayi ukon nagapanginlalaki. Ang ila mga kalautan nagadugang, kag wala nagauntat ang ila pagpinatyanay. 3Gani magamala ang duta, kag ang tanan nga nagaestar dira magakalamatay. Ang tanan nga mga sapat kag mga pispis kag bisan pa ang mga isda magakalamatay.”
Ang Ginoo Nagsumbong sang mga Pari
4Ang Ginoo nagasiling, “Wala sing may magsumbong ukon magsaway sang mga tawo, kay ang akon reklamo batok sa inyo nga mga pari. 5Sa adlaw kag gab-i ang inyo bulohaton napaslawan, kag ang mga propeta pareho lang sa inyo. Pagalaglagon ko ang Israel nga inyo iloy. 6Ang akon mga tawo ginalaglag tungod kay wala sila nagakilala sa akon. Kamo nga mga pari wala magkilala sa akon kag ginsikway ninyo ang akon mga pagtudlo, gani ginasikway ko kamo kag ang inyo mga anak subong nga akon mga pari.
7“Sa nagadugang kamo nga mga pari, nagadugang man ang inyo pagpakasala batok sa akon. Gani pagabayluhan ko ang inyo kadungganan sing kahuloy-an. 8Nagamanggaranon kamo tungod sa mga sala sang akon mga tawo, kag luyag ninyo nga magdugang pa gid ang ila pagpakasala. 9Ang silot nga nagakabagay sa mga tawo magaabot man sa mga pari! Silutan ko sila kag balusan sila tungod sang kalautan nga ila ginahimo. 10Kon magkaon kamo sang inyo bahin sa mga halad, sa gihapon indi kamo mabusog. Simbahon ninyo ang mga dios nga nagahatag sing bata, pero sa gihapon wala kamo sing kabataan, tungod kay nagbiya kamo sa akon kag nagsunod sa iban nga mga dios.”
Ang Ginoo Nagpakamalaut sang Pagsimba sa Iban nga Dios
11Ang Ginoo nagasiling, “Ang daan kag bag-o nga bino nagakuha sang maayo nga panimuot sang akon mga tawo! 12Nagapangayo sila sing mga laygay sa diosdios nga kahoy! Ang mga diosdios nga kahoy nagasugid sa ila sang ila luyag mahibaluan! Ginbayaan nila ako, kag kaangay sa isa ka babayi nga nagabaligya sang iya dungog, gintugyan nila ang ila kaugalingon sa iban nga mga dios. 13Sa balaan nga mga lugar sa ibabaw sang kabukiran nagdulot sila sing mga halad, kag sa mga kabakuloran nagsunog sila sing insyenso sa idalom sang mataas kag madabong nga mga kahoy tungod kay ang mga kahoy maayo nga palasilungan!
“Tungod sini ang inyo mga kabataan nga babayi nagbaligya sang ila mga dungog, kag ang inyo mga umagad nga babayi nagapanginlalaki. 14Pero indi ko sila pagsilutan tungod sini, tungod kay kamo gid mismo nagapakig-upod sa mga babayi nga nagabaligya sang ila dungog sa templo,#4:14 MGA BABAYI NGA NAGABALIGYA SANG ILA DUNGOG SA TEMPLO: Ini nga mga babayi makita sa mga templo sang mga Canaanhon, sa diin ang mga dios nga nagapabugana ginsimba. Ginpatihan nga ang pagpakighilawas sa sini nga mga babayi nagapasalig sing mapatubason nga mga kaumhan kag palabata nga mga kasapatan. kag upod sa ila nagahalad kamo sing mga dulot nga iya sang pagano. Subong sang ginsiling sang hulobaton, ‘Ang mga tawo nga wala sing paghangop pagalaglagon.’
15“Bisan kamo nga mga tawo sang Israel nagbiya sa akon, kabay nga ang Juda indi maghimo sang amo man nga sala. Indi kamo magkadto sa Gilgal ukon sa Betaben#4:15 BETABEN: Ang Betaben nagakahulogan “balay sang kalaut” ukon “balay nga ginahiwatan sa pagsimba sa diosdios” kag sa sini nga dinalan ginapatungod sa siudad sang Betel nga nagakahulogan “balay sang Dios.” Tan-awa man ang 10:8. sa pagsimba, kag indi kamo maghimo sing mga panaad didto sa ngalan sang buhi nga Ginoo. 16Ang mga tawo sang Israel matig-a sing ulo kaangay sang baka nga bakiya. Gani ano ang pagpahalab ko sa ila kaangay sa mga kordero sa latagon? 17Ang mga tawo sang Israel ginagamhan sang mga diosdios. Pabayai sila sa ila ginhimo. 18Nagapakig-upod sila sa grupo sang palahubog. Nagapadayon sila sang ila pagpakighilawas, kag nagahigugma sang kahuloy-an sa baylo sang kadungganan. 19Pagapaliron sila sa malayo kaangay sa pagpalid sang bagyo, kag mahuy-an sila tungod sang ila mga halad sa mga diosdios.
Currently Selected:
Oseas 4: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
