Ezequiel 47
47
Ang Tuboran nga Nagailig halin sa Templo
1Gindala#Zac. 14:8; Juan 7:38; Bug. 22:1. ako liwat sang tawo sa alagyan pakadto sa Templo. May tubig nga nagatubod halin sa idalom sang alagyan kag nagailig pakadto sa sidlangan sa diin ang Templo nagaatubang. Nagailig ini paidalom gikan sa idalom sang nabagatnan nga bahin sang Templo nga nagaagi sa nabagatnan nga kilid sang altar. 2Dayon gindala ako sang tawo sa nagwa nga bahin sang Templo paagi sa naaminhan nga pwerta kag gindala niya ako paggwa pakadto sa pwerta nga nagaatubang sa sidlangan. Ang isa ka diutay nga tuboran nagailig pakadto sa gwa sa nabagatnan nga bahin sang pwerta. 3Paagi sa iya inugtakos, ang tawo nagtakos sing 560 ka yarda paubos sa ginailigan sang tubig pakadto sa sidlangan kag ginsingganan niya ako nga mag-ubog didto. Ang kadalom sang tubig naglambot lamang sa akon bukobuko. 4Dayon nagtakos sia liwat sing 560 ka yarda, kag ang tubig naglambot sa akon mga tuhod. Sa madason pa nga 560 ka yarda ang tubig naglambot sa akon hawak. 5Sang ulihi nagtakos pa gid sia sing 560 ka yarda, kag didto ang tubig tama na kadalom nga indi na ako makatungkad. Tama na ini kadalom sa bagay nga indi na ako makatabok luas lamang sa paglangoy. 6Nagsiling sia sa akon, “Tawo nga mamalatyon, talupangda ini sing maayo.”
Dayon gindala ako sang tawo pabalik sa pangpang sang suba, 7kag sang makaabot ako didto, nakita ko nga may madamo nga mga kahoy sa magtimbang nga pangpang. 8Nagsiling sia sa akon, “Ini nga tubig nagailig sa duta pakadto sa sidlangan padulhog sa Kapatagan sang Jordan kag pakadto sa Patay nga Dagat. Kon mag-ilig ini pakadto sa Patay nga Dagat nagapatab-ang ini sang tubig. 9Bisan diin mag-ilig ini nga sapa, yara ang tanan nga sahi sang mga sapat kag mga isda. Ang sapa magapatab-ang sang tubig sa Patay nga Dagat, kag bisan diin ini nagailig, nagadala ini sing kabuhi. 10Halin sa mga Tuboran sang Engedi tubtob sa mga Tuboran sang Eneglaim, may mga mangingisda sa baybayon sang kadagatan, kag didto iladlad nila ang ila mga lambat agod magmala. May madamo nga nagkalainlain nga mga isda didto subong sang yara sa Dagat sang Mediteraneo. 11Pero ang mga tubig sa mga luyan kag sa mga punong sa higad sang baybay indi magtab-ang, kundi pabay-an ini nga mangin-asinan. 12Sa#Bug. 22:2. tagsa ka pangpang sang sapa ang tanan nga sahi sang kahoy magatubo, kag amo ini ang pagakuhaan sang pagkaon. Ang ila mga dahon indi malaya, kag indi ini mag-untat sa pagpamunga. Magapamunga sila kada-bulan, tungod kay gintubigan sila paagi sa sapa nga nagailig halin sa Templo. Ang mga kahoy magahatag sing kalan-on kag ang ila mga dahon pagagamiton subong mga bulong.”
Ang mga Dulonan sang Duta
13Ang Ginoo nga Gamhanan nagsiling, “Amo ini ang mga dulonan sang duta nga pagapartihon sa dose ka mga tribo, nga ang tribo ni Jose magabaton sing duha ka parti.#47:13 DUHA KA PARTI: Ang mga tribo ni Manases kag ni Efraim, nga mga anak ni Jose, ginhatagan sing tag-isa ka parti. 14Nagsumpa ako sa inyo mga katigulangan nga ihatag ko sa ila ini nga duta. Gani, partiha ninyo ini sing palareho.
15“Ang naaminhan nga dulonan nagapadulong sa sidlangan halin sa Dagat sang Mediteraneo pakadto sa siudad sang Hetlon, sa Alagyan sa Hamat, tubtob sa siudad sang Zedad,#47:15 Ang isa ka dumaan nga pagbadbadAlagyan sa Hamat, tubtob sa siudad sang Zedad; sa HebreoAlagyan sa Zedad pakadto sa siudad sang Hamat. 16sa mga siudad sang Berota kag Sibraim, nga yara sa gintung-an sang ginharian sang Damasco kag sang ginharian sang Hamat, kag sa siudad sang Ticon nga yara sa dulonan sang ginharian sang Hauran. 17Gani ang naaminhan nga dulonan nagapadulong halin sa sidlangan sang Mediteraneo pakadto sa Siudad sang Enon kag ang mga ingod nga mga kadutaan sang Damasco kag Hamat tubtob sa aminhan sini.
18“Ang nasidlangan nga dulonan nagapadulong sa bagatnan halin sa isa ka lugar sa gintung-an sang kadutaan sang Damasco kag Hauran, nga ang Suba sang Jordan amo ang dulonan sang duta sang Israel sa nakatundan kag ang Galaad sa sidlangan, tubtob sa Tamar sa Patay nga Dagat.
19“Ang nabagatnan nga dulonan nagapadulong sa nabagatnan-nakatundan halin sa Tamar pakadto sa mga tubig sang Kades-meriba kag dayon pakadto sa naaminhan-nakatundan nga nagatambi sa dulonan sang Ehipto pakadto sa Dagat sang Mediteraneo.
20“Ang nakatundan nga dulonan amo ang Mediteraneo kag nagapadulong ini sa naaminhan sa isa ka lugar sa nakatundan sang Alagyan sang Hamat.
21“Partiha ini nga duta sa inyo mga tribo. 22Mangin-inyo ini panublion nga walay katapusan. Ang mga dumoluong nga nagaestar upod sa inyo nga ang ila mga kabataan nagkalatawo diri magabaton man sang ila parti sang duta kon inyo ini partihon. Pagakabigon sila nga tumandok nga mga Israelinhon, kag magabaton sila sang ila parti sang duta upod sa mga tribo sang Israel paagi sa pagabutgabot. 23Ang tagsa ka dumoluong nga pumoluyo magabaton sang iya parti upod sa mga tawo sang tribo sa diin sia nagaestar. Ako, ang Ginoo nga Gamhanan, amo ang naghambal sini.”
Currently Selected:
Ezequiel 47: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
