Ezequiel 45
45
Ang Bahin sang Ginoo sa Pungsod
1Kon ang duta mapartida na sa tagsa ka tribo, ang isa ka parti sini painon nga manginbalaan sa Ginoo. Ang kalabaon sini desi-sais ka kilometro kag ang kasangkaron sini dose ka kilometro.#45:1 Ang isa ka dumaan nga pagbadbaddose ka kilometro; sa Hebreoanom ka kilometro. Ang kabilogan sini nga lugar manginbalaan. 2Sa sini nga duta magtigana sing isa ka lote para sa Templo nga ang kalaparon 840 ka tapak nga kwadrado. Sa bug-os nga palibot may bakante nga lugar nga otsentay kwatro ka tapak ang kasangkaron. 3Ang katunga sini nga duta, ang isa ka lote desi-sais ka kilometro ang kalabaon kag anom ka kilometro ang kalaparon pagapainon. Patindugan ini sang Templo, ang labing balaan nga lugar sa tanan. 4Ini nga lugar manginbalaan nga bahin sang pungsod, nga napain para sa mga pari nga nagaalagad sa Ginoo sa Templo. Amo ini ang pagatindugan sang ila mga balay kag ang balaan nga lugar para sa Templo. 5Ang katunga pa gid sini nga lugar pagapainon subong nga pagkabutang sang mga Levita, nga nagaobra sa Templo. May mga banwa didto nga ila pagaestaran.#45:5 Ang isa ka dumaan nga mga pagbadbadmga banwa didto nga ila pagaestaran; sa Hebreobaynte ka mga kwarto.
6May duta man nga painon para sa isa ka siudad nga ang kalabaon desi-sais ka kilometro kag ang kasangkaron mga tatlo ka kilometro. Magatambi ini sa balaan nga lugar, kag mangin-iya ini sang tanan nga mga tawo sang Israel.
Ang Duta para sa Pangulo
7May duta nga painon man para sa pangulo nga nagagahom. Halin sa balaan nga lugar kag sa siudad magalambot ini sa nakatundan pakadto sa Dagat sang Mediteraneo; kag halin sa sidlangan pakadto sa nasidlangan nga dulonan sang pungsod sa bagay nga ang kalabaon sini pareho man sang kalabaon sang duta nga ginhatag sa mga tribo sang Israel. 8Ini nga duta manginbahin sang pangulo nga nagagahom sa Israel, agod indi na niya paghingabuton ang mga pumoluyo, kundi ihatag niya ang nabilin nga duta sa mga tribo sang Israel.
Ang mga Pagsulondan para sa Pangulo
9Ang Ginoo nga Gamhanan nagsiling, “Kamo nga mga pangulo sang Israel, sobra na ang inyo pagpakasala! Untati ninyo ang pagpamintas kag pagpamigos. Himua ninyo ang matarong kag husto. Indi na gid ninyo pagtabugon liwat ang akon mga tawo sa ila duta. Ako, ang Ginoo nga Gamhanan, amo ang nagasiling sini sa inyo.
10“Ang#Lev. 19:36. tagsatagsa kinahanglan maggamit sang husto nga mga timbangan kag mga talaksan:
11“Ang efa kag ang bat mangin-isa sing takos. Ang omer ang basihan sini:
1 ka omer = 10 ka efa = 10 ka bat
12“Ang inyo mga timbangan amo ang masunod:
20 ka gera = 1 ka siklo
60 ka siklo = 1 ka mina
13-15“Amo ini ang sulondan sa paghanda sang inyo mga dulot: sa trigo, isa sang sesenta ka parti sang inyo patubas; kag sa sebada, isa man sang sesenta ka parti sang inyo patubas. Sa lana sang olivo, isa sang 100 ka parti sang patubas sang inyo mga kahoy. Taksa ninyo ini sa bat. Ang napulo ka bat isa ka omer ukon isa ka koro. Sa mga karnero, isa ka bilog sa tagsa ka 200 gikan sa halalban sang Israel.
“Magdala man kamo sing mga halad nga kalan-on, mga sapat para sa mga halad nga sinunog, kag mga sapat para sa mga halad sa paghiambit, agod mapatawad ang inyo mga sala. Ako, ang Ginoo nga Gamhanan, amo ang nagamando sini.
16“Ang tanan nga mga tawo sang duta dapat magdala sini nga mga halad sa pangulo nga nagagahom sa Israel. 17Iya katungdanan ang paghatag sing mga sapat para sa mga halad nga sinunog kag mga halad nga kalan-on, kag mga halad nga ilimnon para sa bug-os nga pungsod sang Israel sa mga Piesta sang Lati, kag sa mga Adlaw nga Inugpahuway kag sa iban nga mga piesta. Sia ang magahatag sang mga halad para sa sala, mga halad nga kalan-on, mga halad nga sinunog, kag mga halad sa paghiambit, sa pagkuha sang mga sala sang mga tawo sang Israel.”
Ang mga Piesta
(Exo. 12:1-20; Lev. 23:33-43)
18Ang Ginoo nga Gamhanan nagsiling, “Sa nahauna nga adlaw sang nahauna nga bulan ihalad ninyo ang isa ka torite nga baka nga wala sing bisan ano nga depekto kag pakabalaana ang Templo. 19Ang pari magakuha sing dugo sang sapat nga ginhalad subong isa ka halad tungod sa sala kag ipalhit ini sa mga bakalan sang Templo, sa apat ka mga pamusod sang altar, kag sa mga haligi nga alagyan pakadto sa nasulod nga pasiyuhan. 20Amo man ini ang himuon ninyo sa ikapito nga adlaw sang bulan, para sa bisan sin-o nga nakasala sang indi hungod ukon nakasala nga wala niya mahibaloi. Sa sini nga paagi mapakabalaan ninyo ang Templo.
21“Sa#Exo. 12:1-20; Num. 28:16-25. ika-14 nga adlaw sang nahauna nga bulan magasugod kamo sa pagsaulog sang Piesta sang Pascua. Sa sulod sang pito ka adlaw ang tagsatagsa magakaon sang tinapay nga wala sing lebadora. 22Sa nahauna nga adlaw sang piesta ang nagagahom nga pangulo dapat magdulot sang isa ka torite nga baka subong isa ka halad tungod sa iya mga sala kag sa sala sang tanan nga mga tawo. 23Sa tagsa ka adlaw sang simana sang piesta magahalad sia sa Ginoo sang pito ka bilog nga torite nga mga baka kag pito ka mga karnero nga lalaki nga wala sing bisan ano nga depekto kag sunogon niya ini sing bug-os. Kinahanglan maghalad man sia sing isa ka toro nga kanding kada-adlaw subong isa ka halad tungod sa sala. 24Sa tagsa ka torite nga baka kag karnero nga lalaki nga ginahalad, kinahanglan may upod nga halad nga kalan-on nga ang kadamuon tunga sa sako nga harina kag tatlo ka litro nga lana sang olivo.
25“Para#Lev. 23:33-36; Num. 29:12-38. sa Piesta sang Palasilungan nga nagasugod sa ika-15 nga adlaw sang ikapito nga bulan, ang pangulo magadulot sa tagsa ka adlaw sang simana sang amo man nga halad para sa sala, amo man nga mga halad nga sinunog sing bug-os, kag amo man nga mga halad nga kalan-on kag lana sang olivo.”
Currently Selected:
Ezequiel 45: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
