Ezequiel 43
43
Ang Pagbalik sang Ginoo sa Templo
1Gindala ako sang tawo sa pwerta nga nagaatubang sa sidlangan, 2kag#Ezeq. 10:3-4, 18-19; 11:22-23; Bug. 1:15. didto nakita ko ang masilaw nga kasanag nga nagapahayag sang presensya sang Dios sang Israel nga nagapadulong halin sa sidlangan. Ang tingog sang Dios daw dagat nga nagadaguhob, kag ang duta nagabanaag sang iya masilaw nga kasanag. 3Ini nga palanan-awon pareho sang akon nakita sang pag-abot sang Dios sa paglaglag sang Jerusalem, kag pareho sang palanan-awon nga akon nakita sa ubay sang Suba sang Kebar. Dayon naghapa ako sa duta. 4Ang masilaw nga kasanag nag-agi sa sidlangan nga pwerta kag nagsulod sa Templo.
5Gin-alsa ako sang Espiritu sang Ginoo kag gindala sa nasulod nga pasiyuhan, sa diin nakita ko ang Templo nga napuno sang himaya sang Ginoo. 6Ang tawo nagtindog sa tupad ko didto, kag nabatian ko ang Ginoo nga naghambal sa akon halin sa Templo: 7“Tawo nga mamalatyon, yari ang akon trono. Magaestar ako diri upod sa mga tawo sang Israel kag magagahom sa ila sa walay katapusan. Ang mga tawo sang Israel ukon ang ila mga hari indi na gid magpakahuya liwat sang akon balaan nga ngalan paagi sa pagsimba sa iban nga mga dios kag sa pagpatindog sang mga monumento sang#43:7 sa pagpatindog sang mga monumento sang: ukonsa pagpanglubong sang. ila patay nga mga hari. 8Ang mga hari naghimo sang mga atangan kag mga bakalan sang ila palasyo nga iping gid sa mga atangan kag mga bakalan sang akon Templo, gani ang pader lamang amo ang nagaulot sa amon. Ginpakahuy-an nila ang akon balaan nga ngalan paagi sa tanan nga makangilil-ad nga mga butang nga ila ginhimo, gani ginlaglag ko sila sa akon kaakig. 9Karon kinahanglan mag-untat sila sa pagsimba sa iban nga mga dios kag kuhaon nila ang mga monumento#43:9 kuhaon nila ang mga monumento: ukonkuhaon nila ang mga bangkay. sang ila mga hari. Kon himuon nila ini, magaestar ako sa tunga nila sa walay katapusan.”
10Kag ang Ginoo nagpadayon sa pagsiling, “Tawo nga mamalatyon, sugiri ang mga tawo sang Israel nahanungod sang Templo, kag patun-i sa ila ang plano sini. Pabatyaga sila sing kahuya tungod sang kalautan nga ila ginahimo. 11Dayon kon magkahuya sila sang ila ginhimo, isaysay sa ila ang plano sang Templo: ang desinyo sini, ang iya mga alagyan pasulod kag pa gwa, ang iya korte, ang pagpahamtang sang tanan nga bahin, ang iya mga kasugoan kag mga pagsulondan. Isulat mo ini tanan para sa ila agod ila makita kon paano ang pagpahamtang sang tanan nga mga butang kag matuman nila ang tanan nga mga kasugoan. 12Amo ini ang kasugoan sang Templo: Ang tanan nga lugar sa palibot sini sa ibabaw sang bukid balaan.”
Ang Altar
13Amo#Exo. 27:1-2; 2 Cron. 4:1. ini ang takos sang altar, nga ang inugtakos nga gamiton pareho man sang gintakos sa Templo. Sa bug-os nga palibot sang sadsaran sang altar may tarog nga baynte ka pulgada ang kalabaon kag baynte man ka pulgada ang kasangkaron nga may sanipa sa nagwa nga kilid nga napulo ka pulgada ang kataason. 14Ang naubos gid nga bahin sang altar apat ka tapak ang kataason. Ang madason nga bahin nagauplok sing baynte ka pulgada sa bug-os nga palibot, kag ang kataason sini pito ka tapak. Ang madason pa gid nga bahin nagauplok man sing baynte ka pulgada sa bug-os nga palibot. 15Ang naibabaw nga bahin, sa diin ang mga halad ginasunog, pito man ka tapak ang kataason. Ang mga sungaysungay sa apat ka pamusod amo ang labing mataas sa tanan. 16Ang naibabaw nga bahin sang altar baynte ka tapak nga kwadrado. 17Ang natungatunga nga bahin baynte kwatro ka tapak nga kwadrado man sa tagsa ka kilid. May sanipa ini sa nagwa nga kilid nga napulo ka pulgada ang kataason. Ang tarog baynte ka pulgada ang kasangkaron. Ang mga halintang pasaka sa altar yara sa sidlangan nga bahin.
Ang Paghalad sang Altar
18Ang#Exo. 29:35-37; 1 Mac. 4:52-56. Ginoo nga Gamhanan nagsiling sa akon, “Tawo nga mamalatyon, magpamati ka sa akon ginasiling. Kon matapos na ang altar, ihalad mo ini paagi sa pagsunog sing mga halad sa sini kag paagi sa pagwisik sa sini sing dugo sang mga sapat nga ginahalad. 19Ang Levita nga mga pari nga mga kaliwat ni Sadoc amo lamang ang magapalapit sa akon presensya sa pag-alagad sa akon. Ako, ang Ginoo nga Gamhanan, amo ang nagamando sini. Hatagan mo sila sing torite nga baka nga idulot subong isa ka halad tungod sa sala. 20Magkuha ka sang dugo sini kag ipalhit mo ini sa mga sungaysungay nga yara sa mga pamusod sang naibabaw nga bahin sang altar kag sa mga pamusod sang natunga nga bahin kag sa bug-os nga palibot sang sanipa sini. Sa sini nga paagi matinluan mo ang altar kag mapakabalaan ini. 21Kuhaon mo ang torite nga baka nga ginadulot subong isa ka halad tungod sa sala kag sunoga ini sa napat-od nga lugar sa gwa sang Templo. 22Sa madason nga adlaw magkuha ka sing kanding nga lalaki nga wala sing bisan ano nga depekto kag idulot ini subong isa ka halad tungod sa sala. Tinloi ang altar paagi sa dugo sini subong sang imo ginhimo sa torite nga baka. 23Kon matapos mo ini, magkuha ka sing torite nga baka kag torite nga karnero nga wala sing bisan ano nga depekto, 24kag dalha ini sa akon. Ang mga pari magawisik sing asin sa sini, kag magasunog sini subong isa ka halad sa akon. 25Kada adlaw sa sulod sang isa ka simana maghalad ka sing isa ka kanding, isa ka toro nga baka, kag isa ka toro nga karnero subong mga halad tungod sa sala. Kinahanglan ini sila tanan wala sing bisan ano nga depekto. 26Sa sulod sang isa ka simana ang mga pari magpakabalaan sang altar kag mag-aman sini para gamiton. 27Sa tapos sang isa ka simana, ang mga pari magasugod sa pagdulot sa altar sang mga halad nga sinunog kag sang mga halad sa paghiambit nga ginadulot sang mga tawo. Dayon magakalipay ako sa inyo tanan. Ako, ang Ginoo nga Gamhanan, amo ang naghambal sini.”
Currently Selected:
Ezequiel 43: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
