Ezequiel 27
27
Ang Ambahanon sa Paglubong sang Tiro
1Ang Ginoo naghambal sa akon, 2“Tawo nga mamalatyon, magkanta ka sing ambahanon sa lubong para sa Tiro, 3inang siudad nga yara sa higad sang dagat kag naganegosyo sa mga pumoluyo sa baybayon. Sugiri sia sang ginasiling sang Ginoo nga Gamhanan:
“O Tiro, nagapabugal ikaw sang imo himpit nga katahom.
4Ang imo ilistaran amo ang dagat.
Ang mga nagpatindog sa imo naghimo sa imo subong sang isa ka matahom nga sakayan.
5Ang ila gingamit mga kahoy nga abeto halin sa Bukid sang Hermon,
kag kahoy nga sedro halin sa Libano ang ila ginhimo nga imo palo.
6Nagkuha sila sa Basan sing mga kahoy nga terebinto nga himuon nga mga gaod.
Ginhimo nila nga mabakod ang imo kobierta gikan sa kahoy nga ginatawag pino halin sa Cipre,
kag ginhaklapan ini sing tiposo.
7Ang imo mga layag bordado nga lino halin sa Ehipto,
nga madali makilala bisan sa malayo.
Ang imo mga trapal nahimo sa labing maayo nga panapton,
nga purpora halin sa isla sang Cipre.
8Ang imo mga manuggaod nagikan sa mga siudad sang Sidon kag Arbad.
Ang imo batid nga mga tinawo amo ang mga sakayanon.
9Ang mga panday sang sakayan
mga batid nga mga tawo halin sa Biblos.
Ang mga sakayanon nga nagabiyahe
nagnegosyo sa imo balaligyaan.
10“Ang mga soldado halin sa Persia, Lidya, kag Libya nagbuylog sa imo mga hangaway. Ginsab-it nila ang ila mga taming kag mga helmet sa imo mga baraks. Sila amo ang naghatag sa imo sing kabantugan. 11Ang mga soldado halin sa Arbad nagbantay sang imo mga pader kag ang mga hangaway sa Gamad nagbantay sang imo mga tore. Ginsab-it nila ang ila mga taming sa imo mga pader nga amo ang nagpatahom sa imo.
12“Nagnegosyo ikaw sa duta sang Tarsis kag nagbaton sing pilak, salsalon, lata, kag tingga subong bayad sang imo madamo nga mga inugbaligya. 13Nagnegosyo ikaw sa Gresia, Tubal, kag Mesec kag ang imo mga inugbaligya ginbayluhan sing mga ulipon kag sang mga gamit nga bronsi. 14Nagbaligya ikaw sang imo mga pagkabutang agod ibakal sing mga kabayo nga inug-obra kag mga kabayo para sa inaway, kag mga mula halin sa Bet-togarma. 15Ang mga Rodianhon#27:15 Ang isa ka dumaan nga pagbadbadRodianhon; sa HebreoDedan. nagpakignegosyo sa imo; ang mga pumoluyo sa madamo nga mga baybayon naghatag sa imo sing mga tiposo kag mga bantolinaw subong bayad sang imo mga inugbaligya. 16Ang mga Aramnon#27:16 Aramnon: Ang iban nga dumaan nga mga pagbadbadSirianhon, ukonEdomnon. nagbakal sang imo mga inugbaligya kag sang imo mga prudokto. Naghatag sila sing mga esmeralda, mga panapton nga pula, binordahan, mapino nga lino, banawog, kag mga rubi subong bayad sang imo mga inugbaligya. 17Ang Juda kag ang Israel nagbayad sang imo mga inugbaligya sing trigo, dugos, lana sang olivo, kag mga balsamo. 18-19Ang mga tawo sa Damasco nagbakal sang imo mga inugbaligya kag madamo nga mga prudokto, kag ginbayran nila ikaw sing bino halin sa Helbon kag delana halin sa Sahar. Ang imo mga prudokto ginbayluhan nila sing salsalon kag mga balsamo. 20Ang mga pumoluyo sang Dedan nagbaylo sing mga inughampilo nga panapton para sa imo mga prudokto. 21Ang mga Arabiahanon kag ang mga pangulo sa duta sang Kedar nagbayad sang imo mga inugbaligya sing mga kordero, mga karnero, kag mga kanding. 22Ang mga negosyante sang Seba kag Rama nagbaylo sing mga labing maayo nga mga balsamo, mga alahas, kag mga bulawan para sa imo mga inugbaligya. 23Ang mga siudad sang Haran, Cane, kag Eden, ang mga negosyante sang Seba, ang mga siudad sang Asur kag Kilmad—sila tanan nagpakignegosyo sa imo. 24Nagbaligya sila sa imo sing malahalon nga mga panapton, mga panapton nga pula kag binordahan, mga alpombra nga lainlain ang kolor, kag labing maayo nga mga lubid kag mga kalat. 25Ang#Bug. 18:11-19. imo mga inugbaligya ginkarga sa dalagku kag mga sakayan sa negosyo.
“Kaangay ikaw sang sakayan sa dagat
nga kargado sang mga inugbaligya.
26Sang pagdala sa imo sang mga manuggaod sa kadagatan,
ang salatan nga hangin nagguba sa imo sa tunga sang kadagatan.
27Ang tanan mo nga manggad kag mga inugbaligya,
ang tanan mo nga mga sakayanon,
ang tanan mo nga mga panday sang sakayan kag mga negosyante,
ang tagsa ka soldado nga yara sa sakayan,
sila tanan nagkalalumos,
sang malunod ang imo sakayan.
28Ang sininggit sang nagkalalumos nga mga sakayanon
nagalanog sa baybayon.
29“Karon ang tagsa ka sakayan wala na sing tawo,
kag ang tagsa ka sakayanon nagtakas.
30Tanan sila naglalaw sing mapait para sa imo,
nga nagasabwag sing yab-ok sa ila mga ulo kag nagaligid sa abo.
31Ginkiskisan nila ang ila mga ulo tungod sa imo
kag nagsuksok sing bayu sa paglalaw.
Ang ila tagipusoon nagahinakit samtang nagahibi sila.
32Amo ini ang ila panalambiton para sa imo:
‘Sin-o bala ang mapaanggid sa Tiro,
nga karon malinong na sa kadagatan?
33Sang gindala ang imo mga inugbaligya sa iban nga mga pungsod
ginhatagan mo ang tagsa ka pungsod sang ila mga kinahanglanon.
Ang mga hari nagmanggaranon
tungod sang kadamuon sang imo mga prudokto.
34Karon nalunod ka sa dagat,
naglugdang ka sa madalom nga dagat.
Ang imo mga prudokto kag ang tanan nga nagpangabudlay para sa imo
nadula upod sa imo sa dagat.’
35“Ang tanan nga nagaestar sa baybayon ginkugmat tungod sang imo dinangatan. Bisan ang ila mga hari kinulbaan, kag ang kahadlok makit-an sa ila mga guya. 36Nadula ikaw sa walay katubtoban, kag ang mga negosyante sa bug-os nga kalibutan hinadlukan nga basi amo man ang ila madangatan.”
Currently Selected:
Ezequiel 27: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
