Ezequiel 20
20
Ang Kabubot-on sang Ginoo kag ang Pagsupak sang Tawo
1Sa ika-10 nga adlaw sang ikalima nga bulan sang ikapito nga tuig sang amon pagkabihag, ang iban nga mga katigulangan sang Israel nag-abot sa pagpakighinun-anon sa akon sa paghibalo sang kabubot-on sang Ginoo. Nagpungko sila sa atubang ko 2kag ang Ginoo nagsiling sa akon, 3“Tawo nga mamalatyon, hambal ka sa sini nga mga tawo kag sugiri sila sang ginasiling sang Ginoo nga Gamhanan: Nag-abot kamo sa paghibalo sang akon kabubot-on, indi bala? Subong nga ako ang Dios nga buhi, indi ako magpakighambal sa inyo. Ako, ang Ginoo nga Gamhanan amo ang naghambal sini.
4“Tawo nga mamalatyon, handa ka bala sa paghukom sa ila? Ti, hukmi sila. Pahanumdoma sila sang makahuloya nga mga butang nga ginhimo sang ila mga katigulangan. 5Sugiri#Exo. 6:2-8. sila sang akon ginasiling. Sang pagpili ko sang Israel, nagsaad ako sa ila. Ginpahayag ko ang akon kaugalingon sa ila didto sa Ehipto kag ginsingganan sila: Ako amo ang Ginoo nga inyo Dios. 6Sa sadto nga tion nagsaad ako sa pagpagwa sa ila sa Ehipto kag dalhon ko sila sa duta nga akon ginpili para sa ila, isa ka maayo kag mapatubason nga duta, ang labing maayo sa tanan nga duta. 7Ginsingganan ko sila nga ihaboy nila ang makangilil-ad nga mga diosdios nga ila ginahigugma kag indi nila pagdagtaan ang ila kaugalingon sang indi matuod nga mga dios sang Ehipto, tungod kay ako amo ang Ginoo nga ila Dios. 8Pero ginsupak nila ako kag indi sila magpamati sa akon. Wala nila pag-ihaboy ang ila makangilil-ad nga mga diosdios kag wala nila ginsikway ang mga dios sang mga Ehiptohanon. Kuntani ipatupa ko na sa ila ang akon nagabalingaso nga kaakig didto sa Ehipto, 9pero wala ko paghimua ini, kay magapakahuya ini sa akon ngalan, tungod kay ginpahibalo ko sa Israel, sa atubang sang mga tawo sa diin sila nagaestar, nga ako magapagwa sa ila sa Ehipto.
10“Gani, ginpagwa ko sila sa Ehipto pakadto sa desierto. 11Ginhatag#Lev. 18:5. ko sa ila ang akon mga sugo kag gintudloan ko sila sang akon mga kasugoan nga nagahatag sing kabuhi sa kay bisan sin-o nga nagatuman sini. 12Ginhatag#Exo. 31:13-17. ko pa gid sa ila ang Adlaw nga Inugpahuway subong tanda sang akon kasugtanan sa ila, sa pagpahanumdom nga ako, ang Ginoo, nagapakabalaan sa ila. 13Pero bisan didto sa desierto ginsupak nila ako. Ginlapas nila ang akon mga kasugoan kag ginsikway ang akon mga sugo nga nagahatag sing kabuhi sa kay bisan sin-o nga nagatuman sini. Ginpasipalahan nila sing bug-os ang Adlaw nga Inugpahuway. Kuntani ipatupa ko sa ila ang akon nagabalingaso nga kaakig didto sa desierto kag sa paglaglag sa ila, 14pero wala ko paghimua ini, kay magapakahuya ini sa akon ngalan, sa tunga sang mga pungsod nga nakakita sang pagpagwa ko sang mga Israelinhon sa Ehipto. 15Gani,#Num. 14:26-35. nagsumpa ako didto sa desierto nga indi ko sila pagdalhon sa duta nga akon ginhatag sa ila, isa ka maayo kag mapinatubason nga duta, ang labing maayo sa tanan nga duta. 16Nagsumpa ako tungod kay ginsikway nila ang akon mga sugo kag ginlapas nila ang akon mga kasugoan, kag ginpasipalahan ang Adlaw nga Inugpahuway. Ginpasulabi nila ang pagsimba sa mga diosdios.
17“Pero ginkaluoyan ko sila. Wala ko sila paglaglaga ukon pagpamatya didto sa desierto. 18Sa baylo, ginpaandaman ko didto ang ila mga kaanakan: Indi pagtumana ang mga kasugoan nga ginhimo sang inyo mga katigulangan, indi pagsunda ang ila mga pagginawi ukon magdagta sang inyo kaugalingon sang ila mga diosdios. 19Ako ang Ginoo, nga inyo Dios. Tumana ang akon mga kasugoan kag mga sugo. 20Pakabalaana ang Adlaw nga Inugpahuway, agod mangintanda ini sang kasugtanan nga aton ginhimo, kag magapahanumdom sa inyo nga ako ang Ginoo nga inyo Dios.
21“Pero yadto nga kaliwatan nagsupak man sa akon. Ginlapas nila ang akon mga kasugoan kag wala magtuman sang akon mga sugo, nga nagahatag sing kabuhi sa tagsatagsa nga nagatuman sini. Ginpasipalahan nila ang Adlaw nga Inugpahuway. Kuntani ipatupa ko sa ila ang akon nagabalingaso nga kaakig didto sa desierto kag pamatyon sila tanan. 22Pero wala ko sila paglaglaga, kay magapakahuya ini sa akon ngalan sa tunga sang mga kapungsoran nga nakakita sang akon pagpagwa sang mga Israelinhon sa Ehipto. 23Gani,#Lev. 26:33. nagsumpa ako liwat didto sa desierto nga akon sila paaplaagon sa bug-os nga kalibutan. 24Ginhimo ko ini tungod kay ginsikway nila ang akon mga sugo, ginlapas nila ang akon mga kasugoan, ginpasipalahan nila ang Adlaw nga Inugpahuway, kag nagsimba sila sa mga diosdios nga ginsimba man sang ila mga katigulangan.
25“Dayon ginhatagan ko sila sing mga kasugoan nga indi maayo, kag mga sugo nga wala nagahatag sing kabuhi. 26Gintugotan ko sila sa pagdagta sang ila kaugalingon paagi sa ila mga dulot, kag gintugotan ko sila sa paghalad sang ila panganay nga mga anak nga lalaki agod sa pagsilot sa ila. Ginhimo ko ini sa pagpakilala sa ila nga ako amo ang Ginoo.
27“Gani karon, tawo nga mamalatyon, sugiri ang mga Israelinhon kon ano ang akon ginasiling sa ila, ako ang Ginoo nga Gamhanan. Isa ini ka paagi sang pagpasipala sang ila mga katigulangan sa akon nga amo ang ila pagkadi-matutom. 28Gindala ko sila sa duta nga akon ginsaad nga ihatag sa ila. Sang makita nila ang mataas nga mga bakulod kag madabong nga mga kahoy, nagdulot sila sing mga halad didto. Ginpaakig nila ako paagi sa ila mga halad nga sinunog kag mga halad nga ilimnon. 29Ginpamangkot ko sila: Ano bala ining mataas nga mga lugar nga inyo ginakadtuan? Gani gintawag ini ‘Mataas nga mga Lugar’#20:29 MATAAS NGA MGA LUGAR: Mga lugar nga ginasimbahan sang mga pagano sa diin ang mga Hebreo gindumilian sa pagsimba. Ang pulong sa Hebreo nga ginbadbad “Mataas nga mga Lugar” kon pamatian daw pareho sang Hebreo nga mga pulong “sa diin ka makadto.” halin sadto. 30Karon sugiri ang mga Israelinhon kon ano ang akon ginasiling: Ngaa bala maghimo kamo sang mga sala nga ginhimo man sang inyo mga katigulangan kag magsimba sa ila mga diosdios? 31Bisan karon nagadulot kamo sang amo man nga mga dulot kag ginadagtaan ninyo ang inyo mga kaugalingon sang amo man nga mga diosdios sa paghalad ninyo sang inyo mga kabataan sa ila paagi sa kalayo. Dayon kamo nga mga Israelinhon nagakadto pa sa akon sa pagpamangkot kon ano ang akon kabubot-on! Subong nga ako ang Ginoo nga Gamhanan, ang buhi nga Dios, indi ako magpakighinun-anon sa inyo. 32Nakapamat-od na kamo nga manginkaangay sang iban nga mga pungsod, pareho sang iban nga mga tawo nga nagaestar sa iban nga mga pungsod kag nagasimba sa mga kahoy kag dalagku nga mga bato. Pero indi gid ini matabo.”
Ang Pagsilot kag Pagpatawad sang Dios
33“Subong nga ako, ang Ginoo nga Gamhanan, ang Dios nga buhi, ako nagapaandam sa inyo nga sa akon nagabalingaso nga kaakig pagagamhan ko kamo sang akon makusog nga kamot sa bug-os ko nga gahom. 34Ipakita ko sa inyo ang akon gahom kag kaakig kon tipunon ko kamo kag pabalikon halin sa tanan nga mga kapungsoran sa diin ginpaalaplaag ko kamo. 35Pagadalhon ko kamo sa ‘Desierto sang mga Kapungsoran’ kag didto sa aton pag-atubangay kondenahon ko kamo. 36Karon kondenahon ko kamo subong sang akon pagkondenar sa inyo mga katigulangan sa Desierto sang Sinai,” siling sang Ginoo nga Gamhanan.
37“Pagagamhan ko gid kamo kag patumanon sang akon kasugtanan. 38Kuhaon ko sa inyo ang mga nagabato kag ang mga makasasala. Kuhaon ko sila sa kadutaan nga ila ginaestaran karon, pero indi ko sila pagpabalikon sa duta sang Israel. Dayon makilala ninyo nga ako amo ang Ginoo.”
39Ang Ginoo nga Gamhanan nagasiling, “Kag karon, kamo tanan nga mga Israelinhon, padayon kamo sa pag-alagad sa inyo mga diosdios! Pero ginapaandaman ko kamo nga sa tapos sini kinahanglan magtuman kamo sa akon kag indi na ninyo pagpakahuy-an ang akon balaan nga ngalan paagi sa inyo pagdulot sa inyo mga diosdios. 40Didto sa duta sang Israel, sa akon balaan nga bukid,#20:40 BALAAN NGA BUKID: Bukid sang Sion, ang bukid sa Jerusalem nga ang bahin sini ginpatindugan sang Templo kag palasyo. ang mataas nga bukid, tanan kamo nga mga Israelinhon magasimba sa akon. Malipay ako sa inyo kag magapaabot nga dalhan ninyo ako sang inyo mga halad, sang inyo labing maayo nga mga dulot, kag sang inyo balaan nga mga dulot. 41Sa tapos ko kamo makuha sa mga kapungsoran sa diin ginpaalaplaag ko kamo kag matipon sing tingob, batunon ko ang inyo mga halad nga sinunog kag makita sang mga kapungsoran ang akon pagkabalaan. 42Kon mapabalik ko kamo sa duta sang Israel, nga akon ginsaad nga ihatag sa inyo mga katigulangan, dayon makilala ninyo nga ako amo ang Ginoo. 43Dayon madumdoman ninyo ang tanan nga makahuloya nga mga butang nga inyo ginhimo kag ang inyo pagdagta sang inyo kaugalingon. Magakangil-ad kamo sang inyo kaugalingon, tungod sang tanan nga mga kalautan nga inyo ginhimo. 44Kamo nga mga Israelinhon magakilala nga ako amo ang Ginoo, tungod kay wala ko kamo pagsiluti suno sa mga kalautan nga inyo ginhimo, agod mapangapinan ko ang akon kadungganan.” Ang Ginoo nga Gamhanan amo ang naghambal sini.
Ang Kalayo sa Bagatnan
45Ang Ginoo naghambal sa akon, 46“Tawo nga mamalatyon, tulok ka sa bagatnan. Magwali ka batok sa bagatnan kag magtagna ka batok sa kagulangan sang bagatnan. 47Singgana ang kagulangan sa bagatnan sa pagpamati sang ginasiling sang Ginoo nga Gamhanan: Tan-awa, manutod ako kag magasunog ini sang tanan nga mga kahoy nga laya ukon hilaw nga yara sa imo! Wala sing makapalong sini nga kalayo. Magalapta ini halin sa bagatnan pakadto sa aminhan kag ang tanan magabatyag sang kainit sang nagadabadaba nga kalayo. 48Ang tagsatagsa makakita nga ako ang Ginoo, amo ang nagatutod sini, kag wala sing may makapalong sini nga kalayo.”
49Pero magapamatok ako, “Ginoo nga Gamhanan indi ako ang pahimua sina! Ang tagsatagsa nagareklamo nga pirme lang ako nagahambal sa mga palaanggiran.”
Currently Selected:
Ezequiel 20: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
