Exodo 4

Ginhatagan sang Dios si Moises sing Gahom sa Paghimo sang Milagro

1Dayon si Moises nagsabat sa Ginoo, “Pero abi kon ang mga Israelinhon indi magpati sa akon, kag indi magpamati sa akon ginasiling, kundi magsiling sila, ‘Ang Ginoo wala magpakita sa imo,’ ano ang akon himuon?”

2Gani ang Ginoo nagpamangkot sa iya, “Ano bala ang ginauyatan mo?”

Nagsabat sia, “Isa ka sungkod.”

3Ang Ginoo nagsiling, “Ihaboy ina sa duta.” Sang mahaboy na ini ni Moises sa duta, nahimo ini nga man-og, kag nagpalagyo si Moises gikan sini. 4Dayon ang Ginoo nagsiling kay Moises, “Untaya ang imo kamot kag dakpa sa ikog.” Gani gin-untay ni Moises ang iya kamot kag gindakop ini kag nahimo ini liwat nga isa ka sungkod. 5Ang Ginoo nagsiling, “Himua ini, agod nga magtuo sila nga ang Ginoo, ang Dios sang ila mga katigulangan, ang Dios ni Abraham, ang Dios ni Isaac, kag ang Dios ni Jacob, nagpakita sa imo.”

6Ang Ginoo naghambal liwat kay Moises, “Ibutang ang imo kamot sa sulod sang imo bayu.” Gintuman niya ini, kag sang pagwaon niya ang iya kamot, puno na ini sing aro#4:6 ARO: Ini nga pulong sa Hebreo gingamit sa nagkalainlain nga masakit sa panit. kag nanginmaputi gid ini kaayo. 7Dayon ang Ginoo nagsiling, “Ibutang liwat ang imo kamot sa sulod sang imo bayu.” Gintuman niya ini, kag sang pagwaon niya ang iya kamot, nag-ayo na ini subong sang iban nga bahin sang iya lawas. 8Ang Ginoo nagsiling, “Kon indi sila magpati sa imo kag indi madala sa nahauna nga katingalahan nga buhat, magapati sila tungod sang ikaduha. 9Kon indi pa gid sila magpati sa sining duha ka mga katingalahan nga buhat, kag indi magpamati sa imo ginsiling, kuha ka sing tubig halin sa Suba sang Nilo kag ibubo mo sa mamala nga duta. Ina nga tubig mahimo nga dugo.”

10Pero nagsiling si Moises sa Ginoo, “Indi ako pag-ipadala, Ginoo. Indi ako maayo nga manughambal, kag wala gid ako makaagi sa pagpamulongpulong halin sang una tubtob karon sang imo pagsugod hambal sa akon. Indi ako maayo nga manughambal, kay nagautol-utol ako kon maghambal.”

11Ang Ginoo nagsiling sa iya, “Sin-o bala ang naghimo sang baba sang tawo? Sin-o bala naghimo sa iya nga bungol ukon apa? Sin-o bala ang nagbuot nga makakita sia ukon mabulag? Ako, ang Ginoo! 12Karon lakat ka, kay ako ang magabulig sa imo sa paghambal, kag ako ang magatudlo sa imo kon ano ang imo ihambal!”

13Pero nagsabat si Moises, “Kon mahimo, O Ginoo, iban lang ang ipadala kag indi lang ako.”

14Tungod sini ang Ginoo naakig kay Moises kag nagsiling, “Indi bala nga may utod ikaw nga si Aaron nga Levinhon? Nahibal-an ko nga maayo sia maghambal. Kon sa bagay nagapalapit sia sa pagsugat sa imo, kag malipay sia sa pagpakigkita sa imo. 15Hambala sia kag isugid sa iya ang imo inughambal. Buligan ko kamo nga duha sa paghambal, kag tudloan ko kamo sang inyo himuon. 16Sia ang magahambal sa mga tawo para sa imo, kay sia amo ang imo manughambal, kag manginkaangay ikaw sa Dios nga magadikta sa iya sang iya inughambal. 17Dalha ini nga sungkod, kag paagi sini magahimo ikaw sing mga milagro.”

Ang Pagbalik ni Moises sa Ehipto

18Nagbalik si Moises kay Jetro nga iya ugangan, kag nagsiling sa iya, “Kon mahimo tugoti ako sa pagbalik sa akon mga pariente sa Ehipto, sa pagtan-aw sa ila kon buhi pa sila.” Nagpasugot si Jetro kag nagsiling, “Maayo lang nga paglakat.”

19Sang didto pa si Moises sa Midian, ang Ginoo nagsiling sa iya, “Magbalik ka sa Ehipto kay ang tanan nga luyag magpatay sa imo nagkalamatay na.” 20Gani gindala ni Moises ang iya asawa kag ang iya mga kabataan nga lalaki, ginpasakay niya sila sa asno, kag nagbalik sila sa Ehipto. Gindala man niya ang sungkod nga ginsiling sang Dios nga dal-on niya.

21Ang Ginoo nagsiling liwat kay Moises, “Karon kay manugbalik ka na sa Ehipto, himuon mo gid ang tanan nga mga milagro sa atubang sang hari paagi sa gahom nga ginhatag ko sa imo. Pero patig-ahon ko ang iya tagipusoon, kag indi niya pagtugotan ang mga tawo sa paglakat. 22Dayon amo ini ang dapat mo isiling sa hari, ‘Amo ini ang ginasiling sang Ginoo: si Israel panganay ko nga anak nga lalaki. 23Nagsiling#Exo. 12:29. ako sa imo, palakta ang akon anak nga lalaki, agod makasimba sia sa akon, pero indi ka magtugot. Karon patyon ko ang imo panganay nga anak nga lalaki.’”

24Sa lugar nga ila ginpahuwayan sang gab-i sa dalanon pakadto sa Ehipto, ginkadtuan sang Ginoo si Moises, kag patyon sia kuntani. 25Dayon si Sipora nga iya asawa nagkuha sing isa ka matalom nga bato, kag gintuli ang iya anak nga lalaki, kag paagi sini gintandog niya ang mga tiil#4:25 MGA TIIL: Ginapanghunahuna sang iban nga ini mapino nga pulong para sa kinatawo. ni Moises. Nagsiling sia, “Ikaw ang dugoon ko nga bana.” 26Gani wala ginpatay sang Ginoo si Moises. Tungod sini si Sipora nagsiling sa iya, “dugoon ko nga bana,” bangod sang pagtuli.

27Sa sina nga tion ang Ginoo nagsiling kay Aaron, “Kadto ka sa desierto sa pagsugata kay Moises.” Naglakat sia sa pagsugata kay Moises sa balaan nga bukid, kag sang masugata niya si Moises, ginhalukan niya sia. 28Dayon ginsugiran ni Moises si Aaron sang tanan nga ginsiling sang Ginoo sa iya, sang nagsiling ang Ginoo nga magbalik sia sa Ehipto. Iya man ginsugid ang nahanungod sa mga milagro nga ginsugo sang Ginoo sa iya nga iya himuon. 29Gani si Moises kag si Aaron naglakat pakadto sa Ehipto kag nagtipon sang tanan nga mga pangulo sang Israel. 30Ginsugid ni Aaron sa ila ang tanan nga ginsiling sang Ginoo kay Moises, kag naghimo si Moises sang tanan nga mga milagro sa atubang sang mga tawo. 31Nagtuo sila, kag sang pagkabati nila nga ang Ginoo nagkadto sa ila, kag nakakita kon daw ano ang pagpintas sa ila, nagluhod sila kag nagsimba sa Dios.

Currently Selected:

Exodo 4: MBBHIL12

Highlight

Copy