Exodo 19

Ang mga Israelinhon sa Bukid sang Sinai

1-2Ang mga Israelinhon naghalin sa Refidim, kag sa nahauna nga adlaw sang ikatlo nga bulan sa tapos sila makahalin sa Ehipto, nag-abot sila sa desierto sang Sinai. Didto nagpatindog sila sang kampo sa kunsaran sang Bukid sang Sinai. 3Dayon nagtaklad si Moises sa bukid sa pagpakigkita sa Dios.

Ang Ginoo nagtawag sa iya halin sa bukid, kag nagsiling, “Amo ini ang isiling mo sa mga Israelinhon nga mga kaliwat ni Jacob: 4‘Nakita ninyo kon ano ang ginhimo ko sa mga Ehiptohanon, kag kon daw ano ang pagdala ko sa inyo subong sang isa ka agila nga nagadala sang iya mga buto sa ibabaw sang iya mga pakpak, kag gindala ko kamo diri sa akon. 5Karon,#Deut. 4:20; 7:6; 14:2; 26:18; Tit. 2:14.#1 Ped. 2:9. kon magtuman kamo sa akon kag maghimo sang akon kasugtanan, manginkatawhan ko kamo. Ang bug-os nga duta akon, pero kamo manginpinili ko nga mga tawo. 6Kamo#Bug. 1:6; 5:10. mangin-isa ka pungsod sang mga tawo nga magaalagad sa akon subong mga pari, isa ka pungsod nga nahalad sa akon lamang.’ Amo ini ang isiling mo sa mga Israelinhon.” 7Gani si Moises nagdulhog kag ginpatawag sing tingob ang mga pangulo sang mga tawo kag ginsugid sa ila ang tanan nga mga butang nga ginsugo sang Ginoo sa iya. 8Dayon ang tanan nga mga tawo nagsabat, “Tumanon namon ang tanan nga ginsugo sang Ginoo.” Nagtaklad liwat sa bukid si Moises kag ginsugid niya ang sabat sang mga tawo.

9Ang Ginoo nagsiling kay Moises, “Magakadto ako sa imo paagi sa madamol nga panganod, agod ang mga tawo makabati sa akon nga nagahambal sa imo kag magapati sa imo halin karon.”

Ginsugid ni Moises sa Ginoo ang sabat sang mga tawo. 10Kag ang Ginoo nagsiling kay Moises, “Kadtoi ang mga tawo kag pahandaa sila karon nga adlaw kag sa buas sa pagsimba. Kinahanglan labhan nila ang ila mga bayu, 11kag maghanda pa gid sila para sa isa ka buas. Sa sina nga adlaw, ako, ang Ginoo, magapanaog pakadto sa Bukid sang Sinai, sa diin ang tanan nga mga tawo makakita sa akon. 12Kinahanglan#Heb. 12:18-20. butangan mo sing mga dulonan ang palibot sang bukid, kag singgana ang mga tawo, ‘Andam kamo nga indi magtaklad sa bukid ukon magtindog nga malapit sini. Ang bisan sin-o nga makatandog sini, pagapatyon. 13Dapat sia batuhon ukon panaon, nga wala sing isa nga makatandog sa iya. Amo ini ang himuon sa tawo ukon sa sapat, kinahanglan patyon sila.’ Pero kon patunogon ang budyong, dayon ang mga tawo magataklad sa bukid.”

14Gani nagdulhog si Moises halin sa bukid pakadto sa mga tawo kag ginpahanda sila sa pagsimba. Ginlabhan nila ang ila mga bayu, 15kag nagsiling si Moises sa ila, “Maghanda kamo sa isa ka buas, indi kamo anay magpakighirop sa inyo nga mga asawa.”

16Sang#Bug. 4:5.#Deut. 4:11-12. pagkaaga sang ikatlo nga adlaw may daguob kag kilat sa bukid, may madamol nga gal-om, kag may matunog nga huni sang budyong nga nabatian. Ang tanan nga mga tawo sa kampo nagkurog sa kahadlok. 17Ginpangulohan ni Moises ang mga tawo sa paggwa sa kampo sa pagpakigkita sa Dios, kag nagtindog sila sa kunsaran sang bukid. 18Ang bug-os nga Bukid sang Sinai natabunan sang aso, tungod kay ang Ginoo nagpanaog sa sini nga bukid paagi sa kalayo. Ang aso nagtub-ok subong sang aso halin sa hornohan, kag ang tanan nga mga tawo nagkulurog gid sa kahadlok. 19Ang tunog sang budyong nagtudo pa gid. Naghambal si Moises, kag ang Dios nagsabat sa iya sa daguob. 20Ang Ginoo nagpanaog pakadto sa putokputokan sang Bukid sang Sinai. Gintawag niya si Moises sa pagkadto sa putokputokan sang bukid kag si Moises nagtaklad. 21Ang Ginoo nagsiling kay Moises, “Dulhog ka kag paandami ang mga tawo nga indi sila maglakbang sa mga dulonan sa pagpalapit kag sa pagtulok sa akon, kay basi madamo sa ila ang magakalamatay. 22Bisan ang mga pari nga magpalapit sa akon, kinahanglan magpakabalaan sila sang ila kaugalingon, kay kon indi silutan ko sila.”

23Si Moises nagsiling sa Ginoo, “Ang mga tawo indi makataklad tungod kay ikaw nagpaandam sa amon nga nagasiling, ‘Butangi sing mga dulonan ang bukid kag pakabalaana ini.’”

24Ang Ginoo nagsiling sa iya, “Dulhog ka, kag dalha si Aaron sa pagtaklad upod sa imo. Pero ang mga pari kag ang mga tawo indi dapat maglakbang sa mga dulonan sa pagtaklad pakadto sa akon, kay kon maglakbang sila silutan ko sila.” 25Gani si Moises nagdulhog sa mga tawo kag ginsugiran sila sang ginsiling sang Ginoo.

Currently Selected:

Exodo 19: MBBHIL12

Highlight

Copy