Ester (Griego) 9
9
Ginlutos sang mga Judio ang Ila mga Kaaway
1Umabot#1 Mac. 7:49; 2 Mac. 15:36. ang ika-13 nga adlaw sang Adar nga amo ang natalana nga petsa sa pagtuman sang mando sang hari, 2ang mga kaaway sang mga Judio amo ang nalaglag. Kinulbaan ang mga tawo bisan diin kay wala sing sarang makapakig-away batok sa mga Judio. 3Sa pagkamatuod, ang mga gobernador, mga manugtatap kag mga manunulat sang ginharian nagpakita sang pagtahod sa mga Judio tungod kay nahadlok sila kay Mardoqueo. 4-5Tungod sang mando nanginbantog ang iya ngalan sa bug-os nga ginharian.
6Sa Susa, ang kapital nga siudad mismo, ang mga Judio nagpatay sang 500 nila ka mga kaaway, 7-10kag ginpangkuha nila ang ila mga pagkabutang. Upod sa mga nagkalamatay ang napulo ka mga anak ni Haman nga anak ni Hamedata, nga kaaway sang mga Judio: Parsanesten, Delfon, Fasga, Paradata, Barea, Sarbasa, Marmasima, Aropeus, Arseus, kag Zaboteus.
11Sa sina nga adlaw, ginsugid sa hari kon pila gid ang ginpamatay sa siudad sang Susa. 12Dayon nagsiling ang hari kay Ester, “Diri sa siudad lamang ang mga Judio nakapatay sang 500 nila ka mga kaaway. Daw ano pa ayhan kadamo ang sa mga probinsya! Isiling sa akon, kon ano pa ang imo luyag kay igahatag ko ini sa imo.”
13Si Ester nagsabat, “Ang pagpamatay diri sa siudad nga natabo karon pagapadayunon sang mga Judio tubtob buas kag bitayon ang mga bangkay sang napulo ka mga anak ni Haman.” 14Nagpasugot ang hari kag gani ginpahanugotan niya ang mga Judio sa pagbitay sang mga bangkay sang napulo ka mga anak ni Haman nga makita sang mga tawo. 15Sang ika-14 nga adlaw sang Adar ang mga Judio sa Susa nagtilipon liwat kag nagpamatay sang tres sientos (300) pa gid ka mga tawo sa siudad. Pero ang mga pagkabutang nila wala ginkuha sang mga Judio.
16Sa mga probinsya ang mga Judio nagtingob man kag nagpangapin sang ila kaugalingon. Ginpamatay nila ang kinse mil (15,000) sang ila mga kaaway sa ika-13 nga adlaw sang Adar, pero wala sila nagkuha sang ila mga pagkabutang. 17Sang madason nga adlaw, sa ika-14 sang Adar, gin-untatan ang pagpamatay. Sa baylo, ang mga Judio nagbuhat sini nga adlaw sang pagpahuway kag pagkinalipay. 18Pero ang mga Judio sa Susa nagpahuway kag nagkinalipay sa ika-15 nga adlaw kay nagpamatay sila sa ika-13 kag ika-14 sang Adar. 19Amo ini ang kabangdanan kon ngaa nga ang mga Judio nga nagaestar sa mga kabanwahanan nagakinasadya, nagahatagay sang mga dulot nga pagkaon sa isa kag isa sa ika-14 sang Adar kag ang mga Judio sa mga siudad nagabuhat man sini sa ika-15 sang Adar.
Ang Piesta sang Purim
20Ini nga mga hitabo ginpasulat ni Mardoqueo sa isa ka libro kag ginpadala sa tanan nga mga Judio nga nagaestar sa malayo kag malapit sa kabug-osan sang ginharian sang Persia. 21Ginsilingan niya sila sa pagsaulog sang ika-14 kag ika-15 sang Adar subong mga adlaw sang kapiestahan. 22Amo ini ang mga adlaw nga ginlutos nila ang ila mga kaaway. Ang mga Judio nagbuhat sining kahiwatan sa bug-os nga bulan sang Adar bilang piesta kay amo ini ang bulan nga sa diin ang ila kasubo kag walay paglaom ginbayluhan sang kasadya kag pagkinalipay. Ginpanugyan man sa ila ang paghiwat sang pagkinasadya kag pagsinalusalo, ang paghatag sang dulot nga pagkaon sa mga abyan kag mga imol. 23Gani ginbaton kag gintuman sang mga Judio ang tanan nga sinulat nga mando ni Mardoqueo.
24Ginpasulat#Est. 3:7. ni Mardoqueo kon paano si Haman nga anak ni Hamedata nga taga Macedonia nagpakig-away batok sa mga Judio, kon paano ang pagsulat niya sang mando sa ngalan sang hari kag pagpagabutgabot sa pagtalana sang adlaw nga pagalaglagon ang mga Judio, 25kag kon paano pa gid ang pagkadto niya sa hari agod ipangabay nga bitayon si Mardoqueo. Pero si Haman nag-ani sang malain nga bunga sang iya mga padihot batok sa mga Judio. Sia kag ang iya mga anak ginpangbitay. 26-28Ginbaton sang mga Judio ang panugyan ni Mardoqueo indi lamang tungod sang iya sulat kundi subong man tungod sang ila mga pag-antos kag sang mga nagkalatabo sa ila. Ginbuhat nila ini subong isa ka sugo para sa ila, sa ila mga kaliwatan kag sa tanan nga luyag mangin-Judio. Ining mga adlaw dapat saulogon sing nagakaigo bilang handumanan, sa tagsa ka panag-on, sa tagsa ka siudad, probinsya kag pungsod. Ang mga Judio magdumdom kag magsaulog sining mga adlaw sang Purim sa tanan nga tion sa palaabuton kag indi gid ini pagpatumbayaan. (Ginatawag nga Purim ining kapiestahan tungod kay ang purim sa ila pulong nagakahulogan “pagabutgabot.”)
29-30Dayon si Rayna Ester nga anak ni Aminadab, upod kay Mardoqueo nga Judio nagsulat sang ila mga ginhimo. Ang sulat ginpabakod paagi sa awtoridad ni Ester bilang rayna sa panugyan nga saulogon ang Purim. 31Sila nga duha nanginresponsable sa pagtukod sining kahiwatan kag sa pagpatuman gid sini sa kabug-osan. 32Si Ester nagpalig-on sini nga kapiestahan sa walay katubtoban, kag ang kalig-unan sang iya mando ginsulat sa libro.
Currently Selected:
Ester (Griego) 9: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012