Ester (Griego) F
F
Nadumdoman ni Mardoqueo ang Iya Damgo
4 Dayon si Mardoqueo nagsiling, “Ang Dios nagtugot nga ini tanan nga mga butang magkahalanabo! 5 Kag nadumdoman ko ang akon damgo nahanungod sini. Ang tagsa ka detalye nga akon nakita sa damgo nanginmatuod: 6 ang diutay nga busay nga nanginsuba, ang kaagahon nga nanginmasanag nga kaadlawon, kag pagkabugana sang tubig. Ang suba amo si Ester nga ginpangasawa sang hari kag nangin-iya rayna. 7 Ang duha ka dragon larawan nakon kag ni Haman. 8 Ang mga pungsod amo ang tanan nga mga tawo nga nagplano sa paglaglag sa mga Judio. 9 Ang akon pungsod amo ang Israel nga nagpanawag sa Dios agod buligan kag naluwas. Ang Ginoo nagluwas sang iya mga katawhan! Ginluwas niya kita sa tanan nga mga kalautan paagi sa paghimo sang dalagku nga mga katingalahan nga wala gid niya mabuhat sa iban nga mga kapungsoran. 10 Ina tungod kay ginhandaan niya sang isa ka pinasahi nga palaabuton ang iya mga katawhan nga lain sang sa iban nga mga pungsod. 11 Dayon nag-abot ang adlaw kag ang oras nga ining duha ka palaabuton pagahukman. Nag-abot ang tion nga ang Dios naghukom sang mga kapungsoran. 12 Gindumdom sang Dios ang iya pinili nga mga tawo kag iya sila ginhatagan sing katarungan. 13 Ang mga katawhan sang Dios magtilipon sa iya atubang sa ika-14 kag ika-15 sang bulan sang Adar kag ila ini saulogon nga may daku nga pagkinasadya kag kinalipay. Gani ini nga kahiwatan pagasaulogon sa tagsa ka tuig tubtob sa katubtoban.
Paaman
Ang nasambit nga sulat tuhoy sa kapiestahan sang Purim gindala ni Dositeo, isa ka pari kag Levita, sadtong ikaapat nga tuig sang paggahom ni Tolomeo kag Cleopatra. Kaupod ni Dositeo ang iya anak nga si Tolomeo kag sila nga duha nagpanaksihon nga ang sulat matuod kag ang nagbadbad sini amo si Lisimaco nga anak ni Tolomeo nga katapo sang isa ka panimalay sa Jerusalem.
Currently Selected:
Ester (Griego) F: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012