Deuteronomio 23
23
Ang mga Ginsikway gikan sa mga Tawo sang Ginoo
1“Wala sing tawo nga ginkapon ukon nautdan sang kinatawo nga mabaton sa katilingban sang mga tawo sang Ginoo.
2“Wala sing unon ukon bisan sin-o sang iya mga kaliwat, tubtob sa ika-10 nga kaliwat nga mabaton sa katilingban sang mga tawo sang Ginoo.
3“Wala#Neh. 13:1-2. sing Amonhon ukon Moabnon, ukon bisan sin-o sang ila mga kaliwat, bisan sa ika-10 nga kaliwatan nga mabaton sa katilingban sang mga tawo sang Ginoo. 4Wala#Num. 22:1-6. sila maghatag sa inyo sang pagkaon kag tubig sang nagapanglakaton kamo halin sa Ehipto, kag ginsuholan nila si Balaam nga anak ni Beor, nga halin sa Petor sang Mesopotamia sa pagpakamalaut sa inyo. 5Pero#Num. 23:7–24:9. ang Ginoo nga inyo Dios wala magpamati kay Balaam. Sa baylo, ginhimo niya ang pagpakamalaut nga bendisyon tungod kay ginhigugma niya kamo. 6Samtang kamo isa ka pungsod, indi gid kamo magbulig sa pagpauswag sini nga mga pungsod.
7“Indi ninyo pagtamaya ang mga Edomnon kay mga pariente ninyo sila. Kag indi pagtamaya ang mga Ehiptohanon kay sang una nag-estar kamo sa ila duta. 8Halin sa ikatlo nga kaliwatan sang ila mga kaliwat sarang mabaton sa katilingban sang mga tawo sang Ginoo.
Ang Pagtinlo sang Kampo sang mga Soldado
9“Sa tion sang inaway kon yara kamo sa inyo kampo, maglikaw kamo sa bisan ano nga makadagta sa inyo. 10Kon ang isa ka tawo nadagtaan tungod kay naawasan sia sa iya pagdamgo sang gab-i, maggwa sia sa kampo kag magpabilin didto. 11Sa kahapunanon magpanghugas sia kag sa pagtunod sang adlaw magabalik sia sa kampo.
12“Sa gwa sang kampo maghimo kamo sang kasilyas. 13Dala kamo sing inugkutkot upod sa inyo kagamitan, agod nga kon magpamuhin kamo makakutkot kamo sing buho kag matabunan ini. 14Tipigi nga manginbalaan ang inyo kampo tungod kay ang Ginoo nga inyo Dios kaupod ninyo sa kampo sa pag-apin sa inyo, kag magapadaog sa inyo batok sa inyo mga kaaway. Indi kamo maghimo sing bisan ano nga butang nga malaut agod indi kamo pagbayaan sang Ginoo.
Ang Nagakalainlain nga mga Kasugoan
15“Kon ang isa ka ulipon magpalagyo sa iya agalon kag magdangop sa imo, indi sia pagpabalika. 16Sarang sia makaestar sa bisan diin sang inyo mga banwa nga iya pilion, kag indi mo sia pagpintasan.
17“Wala#Lev. 19:29. sing lalaki ukon babayi nga Israelinhon nga magbaligya sang iya dungog sa templo.#23:17 MAGBALIGYA SANG IYA DUNGOG SA TEMPLO: Nagasimba ang iban nga mga Canaanhon paagi sa pagkadto sa ila mga templo kag magpakighilawas sa mga nagabaligya sang ila dungog, nga nagarepresentar sang ila mga dios. 18Subong man wala sing kwarta nga nakita sa sini nga paagi nga pagadalhon sa balay sang Ginoo nga inyo Dios sa pagtuman sang isa ka panaad, kay ang Ginoo magakaakig sang nagabaligya sang iya dungog sa templo.
19“Kon#Exo. 22:25; Lev. 25:36-37; Deut. 15:7-11. magpahulam ka sing kwarta, ukon kalan-on, ukon bisan ano nga butang sa imo kapareho nga Israelinhon, indi ka magpasaka. 20Sarang ka makapasaka sang imo ginapahulam sa dumoluong, pero indi sa imo kapareho nga Israelinhon. Tumana ini nga kasugoan, kag ang Ginoo nga imo Dios magapauswag sang tanan nga imo ginahimo sa duta nga imo panag-iyahan.
21“Kon#Num. 30:1-6; Mat. 5:33. magsaad ka sa Ginoo nga imo Dios, indi ka magpabuyanbuyan sa pagtuman sini, kay ang Ginoo nagapaabot nga imo ini tumanon kag sala ang indi pagtuman sini. 22Wala ikaw makasala kon wala ka magsaad sa Ginoo, 23pero kon magsaad ka sing kinabubot-on tumanon mo gid ini.
24“Kon maglakat ikaw sa alagyan sa talamnan sang ubas sang imo kapareho nga Israelinhon, sarang ka makakaon sang ubas nga luyag mo, pero indi ka magdala nga isulod sa imo alat. 25Kon maglakat ka sa alagyan sang talamnan sang iya trigo, sarang ka makakaon sang mga uyas nga imo mapangutol, pero indi paggaraba ini.
Currently Selected:
Deuteronomio 23: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
