Deuteronomio 20
20
Ang mga Kasugoan Nahanungod sa Gera
1“Kon magkadto kamo sa pagpakig-away batok sa inyo mga kaaway, kag makita ninyo ang mga karwahi kag mga kabayo kag mga hangaway nga mas madamo pa sang sa inyo, indi kamo magkahadlok sa ila. Ang Ginoo nga inyo Dios, nga naghilway sa inyo pa gwa sa Ehipto, magaupod sa inyo. 2Sa wala pa kamo makasugod sa pagpakig-away, ang isa ka pari magapalapit sa atubang kag magasiling sa mga hangaway, 3‘Mga tawo sang Israel, pamati kamo! Sa sini nga adlaw magapakig-away kamo. Indi kamo magkahadlok sa inyo mga kaaway, ukon madulaan sing kaisog, ukon magsalasala. 4Ang Ginoo nga inyo Dios nagaupod sa inyo kag padag-on niya kamo.’
5“Dayon ang mga opisyales magasiling sa mga tawo, ‘May yara bala sa inyo nga bag-o lang makapatindog sing balay kag wala pa niya mahalad ini? Kon may yara, sarang sia makapauli, kay basi mapatay sia sa inaway kag iban ang magahalad sang iya balay. 6May yara bala sa inyo nga bag-o lang makatanom sing ubas kag wala pa gid sia makapulos sang iya bunga? Kon may yara, sarang sia makapauli, kay basi mapatay sia sa inaway kag iban ang makapulos sang iya bino. 7May yara bala sa inyo nga kalasalon diri? Kon may yara, magpauli sia kay basi mapatay sia sa inaway kag iban ang mangasawa sang iya inugpakasal.’
8“Ang mga opisyales magasiling man sa ila, ‘May yara bala sa inyo nga nahadlok kag ginakulbaan? Kon may yara, magpauli sia, kay basi kulbaan man ang iya kaupdanan.’ 9Kon makatapos na ang mga opisyales hambal sa mga hangaway, magpili sila sing mga pangulo sa pagdumala sa tagsa ka grupo.
10“Kon magsalakay kamo sang isa ka siudad, hatagi anay sing kahigayunan ang mga pumoluyo sa pag-ampo. 11Kon abrihan nila ang ila pwerta nga tanda sang ila pag-ampo, himuon ninyo sila nga mga ulipon kag piliton sa pag-alagad sa inyo. 12Pero kon ang mga pumoluyo sina nga siudad indi mag-ampo kundi mabato, kibuna ninyo sila. 13Dayon kon ang Ginoo nga inyo Dios magtugyan sa inyo sang siudad, pamatya ninyo ang tanan nga mga lalaki. 14Pero sarang ninyo mabihag ang mga babayi, ang mga kabataan, ang mga kasapatan, kag ang tanan nga mga butang nga yara sa siudad. Sarang ninyo magamit ang tanan nga mga pagkabutang sang inyo mga kaaway. Ang Ginoo naghatag sini sa inyo. 15Amo ini ang himuon ninyo sa mga siudad nga malayo sa duta nga inyo pagaestaran.
16“Pero kon maagaw ninyo ang mga siudad sa duta nga ginahatag sa inyo sang Ginoo nga inyo Dios, pamatya ninyo ang tanan. 17Pamatya ninyo ang tanan nga mga tawo: ang mga Hethanon, ang mga Amornon, ang mga Canaanhon, ang mga Peresnon, ang mga Hevhanon, kag ang mga Jebusnon suno sa ginsugo sang Ginoo sa inyo. 18Pamatya ninyo sila, agod indi nila kamo madala sa pagpakasala batok sa Ginoo paagi sa pagtudlo sa inyo sa paghimo sang tanan nga makangilil-ad nga mga butang nga ila ginahimo sa pagsimba sa ila mga dios.
19“Kon ginakibon ninyo ang isa ka siudad agod maagaw ini, indi ninyo pagpanapson ang mga kahoy nga nagapamunga, bisan nga madugay ang inyo pagkibon. Kauna lang ninyo ang bunga pero indi pagtapsa ang kahoy kay indi ini ang inyo mga kaaway. 20Sarang ninyo matapas ang iban nga mga kahoy kag gamiton ini sa pagkibon tubtob maagaw ang siudad.
Currently Selected:
Deuteronomio 20: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
