Daniel 3
3
Si Nabucodonosor Nagmando sa Tanan sa Pagsimba sa Bulawan nga Estatwa
1Si Haring Nabucodonosor nagpahimo sing estatwa nga bulawan nga nobenta ka tapak ang kataason kag siyam ka tapak ang kasangkaron, kag ginpatindog niya ini sa patag sang Dura sa probinsya sang Babilonia. 2Dayon ang hari nagmando nga ang tanan niya nga mga opisyales magtipon sing tingob: mga prinsipe, mga gobernador, kabulig nga mga gobernador, mga kumisyonado, mga tesorero, mga hukom, mga pangulo, kag ang iban pa nga mga opisyales sang mga probinsya. Ini sila gintipon sa pagtambong sang paghalad sang estatwa nga ginpatindog ni Haring Nabucodonosor. 3Gani ini tanan nga mga opisyales nagtipon sa pagtambong sang paghalad sang estatwa kag nagtindog sila sa atubangan sini. 4Ang manugpahibalo nagsinggit sa mabaskog nga tingog, “Mga tawo sang tanan nga mga kapungsoran, halin sa nagkalainlain nga mga rasa kag nagahambal sang nagkalainlain nga mga linggwahe! 5Mabatian ninyo ang tunog sang mga trumpeta, nga pagasundan sang pagtukar sang mga klarinete, lira, bandolina, kag arpa, dayon ang iban nga mga instrumento magabuylog. Sa pagsugod sang musika, magasaludo kag magasimba kamo sa estatwa nga bulawan nga ginpatindog ni Haring Nabucodonosor. 6Ang bisan sin-o nga indi magsaludo kag magsimba pagaihaboy gilayon sa horno nga nagadabadaba.” 7Gani sang pagkabati nila sang tunog sang mga instrumento, ang mga tawo sang tanan nga mga kapungsoran, sang nagkalainlain nga mga rasa kag linggwahe nagsaludo kag nagsimba sa bulawan nga estatwa nga ginpatindog ni Haring Nabucodonosor.
Ang Tatlo ka mga Abyan ni Daniel Ginsumbong tungod sang Ila Paglapas
8Karon pila sang mga taga-Babilonia ang naghimulos sini nga kahigayunan sa pagsumbong sa mga Judio. 9Nagsiling sila kay Haring Nabucodonosor, “Kabay nga magkabuhi ka sing malawig, Mahal nga Hari! 10Nagmando ka, Mahal nga Hari, nga sa pagtunog sang musika ang tanan magsaludo kag magsimba sa estatwa nga bulawan. 11Ang bisan sin-o nga indi magsaludo kag magsimba sini ihaboy sa horno nga nagadabadaba. 12May pila ka mga Judio nga ginpadumala mo sang probinsya sang Babilonia nga amo sanday Sadrac, Mesac, kag Abednego nga wala nagatuman sang imo mando, Mahal nga Hari. Wala sila nagasimba sa imo dios, ukon nagaluhod sa estatwa nga bulawan nga imo ginpatindog.”
13Dayon ang hari nagsilabo sa kaakig kag nagmando sia nga pagadalhon sa iya atubang ining tatlo ka tawo. 14Nagsiling sia sa ila, “Sadrac, Mesac, kag Abednego, matuod bala nga indi kamo magsimba sa akon dios kag magluhod sa estatwa nga bulawan nga akon ginpatindog? 15Karon, sa pagkabati gid ninyo sang tunog sang mga trumpeta, klarinete, lira, bandolina, arpa, kag sang iban nga mga instrumento, sa gilayon magsaludo kamo kag magsimba sa estatwa. Kon indi kamo, sa gilayon ihaboy kamo sa horno nga nagadabadaba. Nagahunahuna bala kamo nga may iban pa nga dios nga makaluwas sa inyo?”
16Si Sadrac, si Mesac, kag si Abednego nagsabat, “Mahal nga Hari, indi kami mag-apin sang amon kaugalingon. 17Kon ang Dios nga amon ginaalagad makasarang sa pagluwas sa amon gikan sa horno nga nagadabadaba kag gikan sa imo gahom, ti, luwason niya kami. 18Pero bisan indi sia magluwas sa amon pat-od gid, O Mahal nga Hari, nga indi kami magsimba sa imo dios, kag indi kami magluhod sa bulawan nga estatwa nga imo ginpatindog.”
Ang Tatlo Ginhukman nga Pagapatyon
19Dayon si Nabucodonosor nagbalingaso kag nagpalamula sa kaakig kay Sadrac, Mesac kag Abednego. Ginmanduan niya ang iya mga tinawo sa pag-init sang horno sing pito ka pilo sang sa kinaandan nga kainit. 20Dayon ginsugo niya ang labing makusog nga mga tawo sa iya mga hangaway sa paggapos sang tatlo ka tawo kag sa paghaboy sa ila sa horno nga nagadabadaba. 21Gani gingapos nila sila nga may bayu, kapa, kalo kag iban pa, kag ginhaboy sila sa horno nga nagadabadaba. 22Karon, tungod kay ang mando sang hari gintuman gid suno sa iya ginsiling, ang horno tama gid kainit, kag ang kalayo nagsunog sang mga tawo nga nagdala sa ila sa horno. 23Dayon si Sadrac, si Mesac, kag si Abednego nga gingapos pa nagtupa sa tunga sang horno nga may nagadabadaba nga kalayo.
24Si Nabucodonosor nagtindog gulpi sa daku nga katingala. Ginpamangkot niya ang iya mga palamangkutan, “Indi bala tatlo ka tawo ang gingapos ta kag ginhaboy sa horno nga nagadabadaba?”
Nagsabat sila, “Huo, Mahal nga Hari.”
25Nagpamangkot sia, “Karon, ngaa apat ka tawo ang ginatan-aw ko nga nagadayandayan sa kalayo. Wala sila magapos, kag wala man sila maano, kag ang ikap-at daw isa ka anak sang mga dios!”#3:25 isa ka anak sang mga dios: ukonisa ka anghel; ukonisa ka anak sang Dios.
Ang Tatlo ka mga Judio Ginbuy-an kag Ginpasaka sa Palangakuan
26Gani si Nabucodonosor nagpalapit sa pwertahan sang horno nga nagadabadaba kag nagpanawag, “Sadrac! Mesac! Abednego! Mga alagad sang Labing Mataas nga Dios! Gwa kamo!” Sa gilayon naggwa sila. 27Ang tanan nga mga prinsipe, mga gobernador, kabulig nga mga gobernador kag ang iban nga mga opisyales sang hari nagtipon sa pagtan-aw sini nga mga tawo, nga wala maano sang kalayo. Ang ila mga buhok wala masirab, ang ila mga bayu wala masunog, kag wala gid sila bisan baho lang sang aso.
28Ang hari nagsiling, “Dayawon ang Dios nanday Sadrac, Mesac, kag Abednego! Ginpadala niya ang iya anghel kag ginluwas ining mga tawo nga nagaalagad kag nagasalig sa iya. Wala sila magtuman sang akon mando kag ginbutang nila ang ila kabuhi sa katalagman sang sa magluhod sila kag magsimba sa iban nga dios luas sa ila Dios.
29“Kag karon nagamando ako nga ang bisan sin-o nga tawo sang bisan ano man nga pungsod, rasa ukon linggwahe nga indi magtahod sa Dios nanday Sadrac, Mesac, kag Abednego, pagahiwahiwaon kag ang iya balay pagagub-on. Wala na sing iban nga dios nga makaluwas kaangay sini.”
30Kag ang hari naghatag kanday Sadrac, Mesac, kag Abednego sing mataas nga mga palangakuan sa probinsya sang Babilonia.
Currently Selected:
Daniel 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
