Amos 6
6
Ang Paglaglag sang Israel
1Makaluluoy kamo nga nagapatawhay lang sang inyo pangabuhi sa Sion, kag kamo nga yara sa Samaria nga nagabatyag nga indi maano—kamo nga bantog nga mga tawo sining gamhanan nga pungsod sang Israel, kamo nga ginadangpan pirme sang mga tawo! 2Lakat kamo kag tan-awon ang siudad sang Kalne. Dayon magpadulong kamo sa daku nga siudad sang Hamat, kag magdulhog sa Gat, ang siudad sang mga Filistinhon. Mas maayo pa bala sila sang sa mga ginharian sang Juda kag Israel? Mas malapad pa bala ang ila duta sang sa inyo? 3Abi ninyo mapaisol ninyo ang adlaw sang kalaglagan, pero ang inyo ginahimo nagapadali sadto nga adlaw. 4Makaluluoy kamo nga nagahigda#6:4 Sa nahauna nga tion ginahambal diri ang kinabatasan sang paghigda ukon paghilayhilay kon nagakaon. Sa panahon sang Bag-o nga Kasugtanan, nanginkinabatasan ini. sa inyo malahalon nga mga katre, nga paghilayhilay#6:4 Sa nahauna nga tion ginahambal diri ang kinabatasan sang paghigda ukon paghilayhilay kon nagakaon. Sa panahon sang Bag-o nga Kasugtanan, nanginkinabatasan ini. sa inyo mga higdaan, kag nagapagusto sing kaon sang karne sang kordero kag sang tinday sang baka. 5Maluyag kamo magkumposo sing mga kalantahon, subong sang ginhimo ni David, kag magtukar sini sa mga arpa. 6Nagainom kamo sing bino sa mga yahong, kag nagahaplas sang inyo kaugalingon sang pinakamalahalon nga pahamot, pero wala kamo nagakasubo sang kalaglagan sang mga kaliwat ni Jose. 7Gani kamo ang nahauna nga pagabihagon. Ang inyo mga piesta kag mga bangkite magauntat.
8Ang Ginoo nga Gamhanan nagsumpa nga nagasiling: “Nagakaakig ako sa bugal sang mga pumoluyo sang Israel. Ginakangil-aran ko ang ila dalagku nga mga balay. Igatugyan ko sa kaaway ang ila kapital nga siudad kag ang tanan nga yara dira.”
9Kon may napulo lamang ka tawo nga mabilin sa isa ka panimalay, mapatay sila tanan. 10Kon ang pariente sang napatay mag-abot sa pagkuha sang bangkay sa pagsunog sini, magapanawag sia sa bisan kay sin-o nga nagapanago sa balay, “May iban pa bala nga napatay diri?”
May magasabat, “Wala!” Dayon may magasabat nga pariente, “Maghipos ka! Mag-andam kita nga indi magsambit sang ngalan sang Ginoo.”
11Sa pagmando sang Ginoo, ang mga balay nga dalagku kag magamay pagawas-agon. 12Magadalagan bala ang mga kabayo sa mga pil-as? Nagagamit bala ang mga tawo sang mga baka sa pag-arado sang dagat? Pero ang katarungan ginhimo ninyo nga hilo, kag ang husto ginapagwa ninyo nga sayop.
13Nagapabugal kamo sa inyo pag-agaw sang banwa sang Lodebar.#6:13 LODEBAR: Ini nga ngalan pareho sang Hebreo nga pulong nga kon sayuron “wala pulos.” Nagasiling kamo, “May tuman kami nga kusog sa pag-agaw sang Karnaim.”#6:13 KARNAIM: Ang ngalan sining diutay nga banwa nagakahulogan “mga sungay,” isa ka simbulo sang kusog.
14Ang Ginoo, ang Dios sang mga hangaway amo gid ang nagasabat, “Igapadala ko ang hangaway sang isa ka dumoluong nga pungsod batok sa inyo nga mga pumoluyo sang Israel. Piguson nila kamo halin sa Alagyan sang Hamat sa aminhan tubtob sa Sapa sang Araba sa bagatnan.”
Currently Selected:
Amos 6: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
