Amos 2
2
Moab
1Ang#Isa. 15:1–16:14; 25:10-12; Jer. 48:1-47; Ezeq. 25:8-11; Sof. 2:8-11. Ginoo nagasiling, “Ang mga pumoluyo sang Moab liwatliwat nga nagpakasala, kag tungod sini silutan ko gid sila, kay ginsunog nila tubtob mangin-apog ang mga tul-an sang hari sang Edom. 2Padalhan ko sing kalayo ang duta sang Moab sa pagsunog sang mga pamakod sang Keryot. Ang mga pumoluyo sang Moab magakalamatay sa malapuyot nga inaway, samtang ang mga soldado nagasininggit kag ang mga trumpeta ginapatunog. 3Pagapatyon ko ang pangulo sang Moab kag ang tanan nga mga opisyales sini.” Amo ini ang hambal sang Ginoo.
Juda
4Ang Ginoo nagasiling, “Ang mga pumoluyo sang Juda liwatliwat nga nagpakasala, kag tungod sini silutan ko gid sila, kay gintamay nila ang akon gid mga ginatudlo kag wala nila pagtumana ang akon mga sugo. Ginpatalang sila sang indi matuod nga mga dios nga gin-alagad sang ila mga katigulangan. 5Gani padalhan ko sing kalayo ang Juda sa pagsunog sang mga pamakod sang Jerusalem.”
Ang Paghukom sang Dios sa Israel
6Ang Ginoo nagasiling, “Ang mga pumoluyo sang Israel liwatliwat nga nagpakasala, kag tungod sini silutan ko gid sila, kay ginabaligya nila nga mangin-ulipon ang wala sala nga mga tawo nga wala makabayad sang ila mga utang, kag ang mga imol nga indi gani makabayad sang bili sang isa ka pares nga sandalyas. 7Ginatapak nila ang mga maluya kag makaluluoy kag ginadaugdaog ang mga imol. Indi lang ang pamatan-on nga lalaki kundi subong man ang iya amay nagapakighilawas sa amo man nga ulipon nga babayi, gani ginapasipalahan nila ang akon balaan nga ngalan. 8Sa tagsa ka lugar nga ila ginasimbahan nagahigda sila sa mga bayu nga ginprenda sa ila. Sa templo sang ila Dios nagainom sila sing bino nga ila ginkuha sa mga nakautang sa ila sing kwarta.
9“Pero#Deut. 3:8-11. bisan pa sini, O akon mga tawo, tungod sa inyo ginlaglag ko sing bug-os ang mga Amornon, mga tawo nga subong kataas sang mga kahoy nga sedro kag subong kabakod sang terebinto. 10Ginpagwa ko kamo sa Ehipto, gintuytoyan sa desierto sa sulod sang kwarenta ka tuig, kag ginhatag ko ang duta sang mga Amornon nga mangin-inyo. 11Ginpili#Num. 6:1-8. ko ang iban sang inyo mga anak nga lalaki nga manginpropeta, kag ang iban sang inyo mga pamatan-on nga mangin-Nazareo.#2:11 NAZAREO: Mga Israelinhon nga naghimo sing isa ka pinasahi nga saad sa paghalad sang ila kaugalingon sa Dios. Ini sila indi mag-inom sing bino ukon serbesa, indi man magpagunting sang ila buhok ukon magtandog sang lawas sang patay (tan-awa ang Num. 6:1-8). Mga tawo sang Israel, indi bala ini matuod? Ako, ang Ginoo, naghambal sini. 12Pero ginpainom ninyo ang mga Nazareo sing bino, kag ginmanduan ang mga propeta nga indi maghambal sang akon mga pulong. 13Karon ipiton ko kamo subong sang pag-ipit sang karo nga puno sing patubas. 14Bisan ang madasig magdalagan indi makapalagyo, ang makusog magaluya, kag ang mga soldado indi makaluwas sang ila kaugalingon nga kabuhi. 15Ang mga manugpana indi makabato, ang madasig magdalagan indi makaluwas, kag ang mga tawo nga nagasakay sa kabayo indi makapalagyo sa pagluwas sang ila kabuhi. 16Sa sadto nga adlaw bisan ang pinakamaisog nga mga soldado magabilin sang ila mga hinganiban kag magapalagyo.” Ang Ginoo naghambal sini.
Currently Selected:
Amos 2: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
