Mga Binuhatan 22

1“Mga utod kag mga ginikanan, pamatii ninyo ang akon mga rason sa pag-apin ko sang akon kaugalingon sa inyo atubang!” 2Sang mabatian nila sia nga nagahambal sa Hebreo, naghilipos pa gid sila. Nagpadayon si Pablo sa paghambal:

3“Isa#Bin. 5:34-39. ako ka Judio nga natawo sa Tarso sang Cilicia, pero diri ako nagdaku sa Jerusalem kag nagtuon ako sa idalom sang pagtudlo ni Gamaliel. Natun-an ko sing maid-id ang Kasugoan sang aton mga katigulangan, kag kaangay sa inyo tanan nga yari diri karon, nagmaukod ako sa mga bulohaton sang Dios. 4Ginhingabot#Bin. 8:3; 26:9-10. ko kag ginpamatay ang mga tawo nga nagasunod sa sini nga Dalan. Ginpangdakop ko ang mga lalaki kag mga babayi kag ginpabilanggo sila. 5Sarang makapamatuod ang Pinakamataas nga Pari kag ang tanan nga katapo sang Konseho nga nagahambal ako sing matuod. Ginhatagan nila ako sing mga sulat nga akon gindala sa mga utod nga Judio sa Damasco agod nga makapangdakop ako sini nga mga tawo kag madala ko sila pabalik sa Jerusalem nga nagapos sang kadena agod silutan.

Nagpanugid si Pablo sang Pagkonbertir sa Iya

(Bin. 9:1-19; 26:12-18)

6“Nagahingudto gid ang adlaw sang nagapanglakaton ako kag nagahilapit na sa Damasco, kag sa hinali may masilaw nga kapawa halin sa langit nga nagsilak palibot sa akon. 7Natumba ako sa duta kag may nabatian ako nga tingog nga nagasiling sa akon, ‘Saulo, Saulo! Ngaa bala ginahingabot mo ako?’ 8Nagpamangkot ako, ‘Sin-o ka bala, Ginoo?’ Nagsiling sia sa akon, ‘Ako amo si Jesus nga taga-Nazaret, nga imo ginahingabot.’ 9Nakita sang akon mga kaupdanan ang silak, pero wala sila makabati sang tingog sang nagahambal sa akon. 10Nagpamangkot ako, ‘Ano ang himuon ko, Ginoo?’ kag ang Ginoo nagsabat sa akon, ‘Bangon ka kag magkadto sa Damasco, kag pagasugiran ka didto sang tanan nga ginpat-od sang Dios nga ipahimo sa imo.’ 11Nabulag ako tungod sang kasilaw sadto nga kapawa, gani gintuytoyan ako sang akon mga kaupdanan sa kamot pakadto sa Damasco.

12“Sa sina nga siudad, may isa ka tawo nga ginahingalanan kay Ananias. Isa sia ka tawo nga matinumanon sa aton Kasugoan kag ginatahod gid sia sang tanan nga mga Judio nga nagaestar sa Damasco. 13Nagkadto sia sa akon kag nagtindog sa tupad ko kag nagsiling sia, ‘Utod Saulo, makakita ka na liwat!’ Kag sadto gid nga tion nakakita ako liwat kag gintulok ko sia. 14Nagsiling sia, ‘Ang Dios sang aton mga katigulangan nagpili sa imo agod mahibaluan mo ang iya kabubot-on, kag makita mo ang iya matarong nga Alagad, kag makabati ka sang iya kaugalingon nga tingog. 15Kay manginsaksi ka niya sa pagsugid sa tanan nga mga tawo sang imo nakita kag nabatian. 16Kag karon, ano pa ang ginahulat mo? Tindog ka kag magpabautiso, kag pahugasi ang imo mga sala paagi sa pagpanawag sa iya ngalan.’

Ang Pagtawag kay Pablo sa Pagwali sa mga Hentil

17“Nagbalik ako sa Jerusalem kag sang nagapangamuyo ako sa Templo, may nakita ako nga palanan-awon, 18sa diin nakita ko ang Ginoo nga nagsiling sa akon, ‘Dalidali ka kag bayai gilayon ang Jerusalem, tungod kay ang mga tawo diri indi magbaton sang imo panaksihon nahanungod sa akon.’ 19Nagsabat ako, ‘Ginoo, ila gid nahibaluan nga nagkadto ako sa mga sinagoga, nagpangdakop kag nagpangbunal sa mga nagtuluo sa imo. 20Didto#Bin. 7:58. man ako sang pagpatay sang imo saksi nga si Esteban kag nagsugot man ako sa pagpatay sa iya kag ako ang nagbantay sang mga kunop sang mga nagpatay sa iya.’ 21Ang Ginoo nagsiling sa akon, ‘Lakat ka, kay ipadala ko ikaw sa mga Hentil sa malayo nga lugar.’”

22Ginpamatian sang mga tawo si Pablo tubtob sang pagsiling niya sini. Pero sa tapos sini nagsugod sila sa pagsinggit sing mabaskog, “Patya ninyo sia! Indi sia dapat magkabuhi!” 23Nagsinggit sila, nagwagayway sang ila mga bayu kag nagsabwag sang mga yab-ok sa kahanginan. 24Ginmanduan sang kumander nga Romanhon ang iya mga tinawo nga dalhon si Pablo sa baraks. Ginmanduan man niya sila nga usisaon si Pablo paagi sa pagbunal sa iya, agod nga mahibaluan kon ngaa nagasininggit ang mga Judio sing subong sini batok sa iya. 25Pero sang nahigtan na nila sia agod nga bunalon, nagsiling si Pablo sa opisyal nga nagatindog didto, “Tugot bala sa kasugoan nga bunalon ninyo ang isa ka banwahanon sang Roma nga wala pa gani mahukmi kon may sala sia?”

26Sang pagkabati sini sang opisyal, nagkadto sia sa kumander kag nagsiling, “Ano ining ginahimo mo? Ina nga tawo isa ka banwahanon sang Roma!”

27Gani, ginkadtuan sang kumander si Pablo kag ginpamangkot sia, “Sugiri ako, isa ka bala ka banwahanon sang Roma?”

“Huo,” ang sabat ni Pablo.

28Ang kumander nagsiling, “Nanginbanwahanon ako sang Roma paagi sa pagbayad sang daku nga kantidad.”

Si Pablo nagsabat, “Ako iya banwahanon sang Roma halin sang akon pagkatawo.”

29Sa gilayon nagpalayo ang mga tawo nga magausisa kuntani sa iya. Hinadlukan ang kumander sang mahibaluan niya nga si Pablo isa ka banwahanon sang Roma kag bangod kay ginpakadenahan niya sia.

Si Pablo sa Atubang sang Konseho

30Luyag mahibaluan sang kumander kon ano gid ang ginasumbong sang mga Judio batok kay Pablo. Gani sang madason nga adlaw ginpahubaran niya si Pablo sang mga kadena kag nagmando sia sa pangulo nga mga pari kag sa bug-os nga Konseho nga maghinun-anon. Dayon gindala niya si Pablo kag ginpatindog sa ila atubang.

Currently Selected:

Mga Binuhatan 22: MBBHIL12

Highlight

Copy