Mga Binuhatan 19

Si Pablo sa Efeso

1Samtang didto si Apolos sa Corinto, si Pablo nag-agi sa interyor sang probinsya tubtob nga nakaabot sia sa Efeso. May nakita sia didto nga mga gintuton-an. 2Ginpamangkot niya sila, “Nabaton bala ninyo ang Espiritu Santo sang magtuo kamo?”

Nagsabat sila, “Wala gani kami makabati nga may Espiritu Santo.”

3Ginpamangkot sila ni Pablo, “Ti, ano nga sahi sang bautiso ang nabaton ninyo?”

Nagsabat sila, “Ang bautiso ni Juan.”

4Nagsiling#Mat. 3:11; Mar. 1:4, 7-8; Luc. 3:4, 16; Juan 1:26-27. si Pablo sa ila, “Ang bautiso ni Juan para sa mga nagbiya sang ila mga sala. Nagsiling si Juan sa mga taga-Israel nga magtuo sila sa isa nga magaabot nga ulihi lang sa iya kag ini amo si Jesus.”

5Sang mabatian nila ini, ginbautisohan sila sa ngalan ni Ginoong Jesus. 6Gintungtong ni Pablo ang iya mga kamot sa ila kag nagkunsad ang Espiritu Santo sa ila. Naghambal sila sa linggwahe nga indi mahangpan kag naghambal man sila sang mensahe sang Dios. 7Mga dose sila tanan.

8Sa sulod sang tatlo ka bulan nagpadayon si Pablo sa pagsulod sa sinagoga, kag sa wala sing kahadlok naghambal sia sa mga tawo kag nagpakigbais sa ila, agod mahaylo niya sila nahanungod sang paghari sang Dios. 9Pero batinggilan ang iban sa ila kag indi magtuo, kag ginpakalain pa nila ang Dalan sang Ginoo sa atubangan sang bug-os nga grupo. Gani ginbayaan sila ni Pablo kag gindala niya ang mga gintuton-an upod sa iya. Adlaw-adlaw#19:9 Ang iban nga mga manuskrito nagadugang sanghalin sa alas 11:00 sa aga tubtob sa alas 4:00 sa hapon. nagpakigsuay sia sa mga nagakadto sa balay tilipunan ni Tirano. 10Nagpadayon ini sa sulod sing duha ka tuig, gani ang tanan nga mga tawo, Judio ukon Hentil nga nagaestar sa probinsya sang Asia nakabati sang pulong sang Ginoo.

Ang mga Kaanakan ni Sceva

11Madamo nga pinasahi nga mga milagro ang ginpanghimo sang Dios paagi kay Pablo. 12Bisan ang mga panyo kag mga tampi nga nagamit niya, kon dalhon ini sa mga masakiton, nagaayo sang ila mga balatian kag kon dalhon ini sa mga ginagamhan sang mga yawa, nagagwa ang malaut nga mga espiritu sa ila. 13May mga Judio nga nagapangadtukadto bisan diin kag nagapanabog sang malaut nga mga espiritu nga nagtilaw man sa paggamit sang ngalan ni Ginoong Jesus. Nagsiling sila sa malaut nga mga espiritu, “Ginatabog ko kamo sa ngalan ni Jesus nga ginawali ni Pablo.” 14Ang nagahimo sini amo ang pito ka mga anak nga lalaki ni Sceva nga isa ka Pinakamataas nga Pari nga Judio.

15Pero ang malaut nga espiritu nagsiling sa ila, “Kilala ko si Jesus kag kilala ko si Pablo, pero kamo inyo, sin-o bala kamo?”

16May kabaris nga ginsaruso sila sang tawo nga gingamhan sang malaut nga espiritu kag nadaog niya sila tanan. Nagpalalagyo sila nga pilason kag gisi ang ila mga bayu halin a balay sang tawo. 17Ang tanan nga mga Judio kag mga Hentil nga nagaestar sa Efeso nakabati sini kag hinadlukan gid sila, kag napasidunggan pa gid ang ngalan ni Ginoong Jesus. 18Madamo sang mga tumoluo ang nag-abot, kag sa atubang sang mga tawo, gin-ako nila kag ginpahayag ang malain nga ila nahimo. 19Madamo sang mga madyikero ang nagdala sing tingob sang ila mga libro kag nagsunog sini sa atubang sang tanan nga mga tawo. Ang bili sang tanan nga mga libro nga ginsunog naglambot sa 50,000 ka pilak.#19:19 PILAK: Ang isa ka pilak minimo nga suhol para sa isa ka adlaw nga pag-obra. 20Sa sining gamhanan nga paagi ang pulong sang Ginoo nagpadayon sa paglapnag kag madamo pa gid ang nagtuluo.

Ang Kinagamo sa Efeso

21Sa tapos mahanabo ini nga mga butang nagpamat-od si Pablo#19:21 nagpamat-od si Pablo: ukonsi Pablo, sa pagtuytoy sang Espiritu, nagpamat-od. sa pagpanglakaton sa Macedonia kag Acaya kag sa pagpadayon sa Jerusalem. Nagsiling sia, “Sa tapos ako makakadto sa Jerusalem, dapat ko man kadtuan ang Roma.” 22Gani ginpadala niya sa Macedonia si Timoteo kag si Erasto, ang duha niya ka manugbulig, samtang sia iya nagpabilin sing madugay sa probinsya sang Asia.

23Sa sadto nga mga inadlaw may daku nga kinagamo sa Efeso tungod sang Dalan sang Ginoo. 24May isa ka platero nga ginahingalanan kay Demetrio nga nagapanghimo sang tulotemplo nga pilak sang diosa nga si Artemis. Ini gingamit nga sulondan sang mga templo kag naghatag sing maayo nga palangitan-an sa iya mga tinawo. 25Gani ginpatawag niya ang iya tanan nga mga manug-obra kag ang iban nga may kaangay sang iya palangitan-an. Nagsiling sia sa ila, “Mga abyan, inyo nahibaluan nga ang aton maayo nga pangabuhi nagahalin sa sini nga palangitan-an. 26Karon nakita kag nabatian ninyo ang ginahimo sining tawo nga si Pablo. Nagasiling sia nga ang mga dios nga ginahimo sang tawo indi gid man mga dios kag nagmadinalag-on sia sa paghaylo sa madamo nga mga tawo diri sa Efeso kag halos sa bug-os nga probinsya sang Asia. 27Gani may katalagman nga ang aton palangitan-an pagapakalainon. Kag indi lang ina, kundi may katalagman man nga ang templo sang bantog nga diosa nga si Artemis manginwala sing pulos kag madula ang iya pagkabantog—ang diosa nga ginasimba sang tanan sa Asia kag sa bug-os nga kalibutan!”

28Sang mabatian ini sang mga tawo naakig gid sila kag nagsugod sila sa pagsinggit, “Gamhanan si Artemis sang Efeso!” 29Ang kinagamo naglapnag sa bilog nga siudad. Dinakop sang mga tawo si Gayo kag si Aristarco, duha ka mga taga-Macedonia nga nagpanglakaton upod kay Pablo. Dinala sila sing dalidali sa palagwaan sing kalingawan. 30Gusto ni Pablo nga magkadto sa atubangan sang mga tawo, pero ginpunggan sia sang mga gintuton-an. 31May mga opisyales sang probinsya nga iya mga abyan nga nagpadala sa iya sang mensahe nga nagapakitluoy nga indi sia magpakita sa palagwaan sing kalingawan. 32Sa amo gid nga tion, indi na maghilibati ang pagtilipon. Ang iban nagsinggit sang isa ka butang kag ang iban naman nagsinggit sing lain tungod kay ang kalabanan sa ila wala gani makahibalo kon ano ang tuyo sang ila pagtililipon. 33Ang iban nga mga tawo naghunahuna nga si Alejandro amo ang may salabton sini kay sia amo ang ginpakadto sang mga Judio sa atubang sang mga tawo. Dayon si Alejandro nagsenyas sang iya kamot sa mga tawo nga maghipos kag nagtinguha sia sa paghambal sa mga tawo sa pagpangapin. 34Pero sang matalupangdan nila nga isa sia ka Judio, nagsagad sila tanan singgit sing tingob sa sulod sang duha ka oras: “Gamhanan si Artemis sang Efeso!”

35Sang ulihi napahipos gid man sang sekretaryo sang siudad ang mga tawo. Nagsiling sia, “Mga taga-Efeso, ang tanan nga mga tawo nakahibalo nga ang siudad sang Efeso amo ang manugtatap sang templo ni Artemis nga gamhanan kag sang balaan nga bato nga nahulog halin sa langit. 36Wala sing may makapanghiwala sini nga mga butang. Gani, magpakatawhay kamo kag indi kamo magpadasudaso. 37Gindala ninyo ini nga mga tawo diri, bisan nga ini sila wala magpangawat sa mga templo ukon magpasipala sa aton diosa. 38Kon may panumbongon si Demetrio kag ang iya mga tinawo batok sa kay bisan sin-o, may mga korte kag may mga awtoridad kita. Didto nila dalhon ang ila mga panumbongon. 39Pero kon may ara pa gid iban nga butang nga luyag ninyo, kinahanglan husayon ini sa isa ka pagtililipon sang mga pumoluyo suno sa kasugoan. 40Kay may katalagman nga isumbong kita sa pagpanggamo tungod sang natabo sa sini nga adlaw. Wala kita sing ibalibad sa sini tanan nga kinagamo kag wala kita sing mahatag nga katarungan sa paghimo sini.” 41Sa tapos sia makahambal sini ginpapauli niya ang mga tawo.

Currently Selected:

Mga Binuhatan 19: MBBHIL12

Highlight

Copy