3 Juan 1
1
1Ako,#Bin. 19:29; Rom. 16:23; 1 Cor. 1:14. ang Tigulang sang iglesia nagasulat sa imo Gayo nga abyan kag akon gid ginahigugma.
2Hinigugma ko nga Gayo, nagapangamuyo ako nga manginyara ka sa maayo nga kahimtangan kag sa maayo nga lawas, subong man nga nahibaluan ko nga yara sa maayo nga kahimtangan ang imo espiritu. 3Nalipay gid ako sang pag-abot sang pila ka mga kautoran, kag nagsugid sila sa akon kon daw ano ang imo katutom sa kamatuoran, subong nga nagakabuhi ka sa gihapon suno sa kamatuoran. 4Wala sing butang nga mas makalipay pa sa akon sang sa mabatian ko nga ang akon mga anak nagakabuhi suno sa kamatuoran.
Gindayaw si Gayo
5Hinigugma ko nga Gayo, matutom ka gid sa mga butang nga imo ginahimo para sa mga kautoran, ilabi na gid sa mga estranghero. 6Ginsugid nila diri sa iglesia ang nahanungod sang imo gugma. Kon sarang mahimo, buligi sila nga makapadayon sa ila pagpanglakaton sa pamaagi nga malipay ang Dios. 7Kay nagpanglakaton sila sa pag-alagad kay Cristo, nga wala nagabaton sang bisan ano nga bulig gikan sa mga di-tumoluo. 8Gani kita nga mga Cristohanon kinahanglan magsakdag sini nga mga tawo, agod may bahin kita sa ila pagpangabudlay sa kamatuoran.
Si Diotrefes kag si Demetrio
9Nagpadala ako sing malip-ot nga sulat sa mga katapo sang iglesia. Pero si Diotrefes nga luyag magpangulo sa ila, indi magkilala sang akon awtoridad. 10Gani kon mag-abot ako dira ibuyagyag ko ang iya tanan nga mga hinimuan: ang tama kalain nga mga butang nga iya ginapanghambal nahanungod sa amon, kag ang mga kabutigan nga iya ginapanugid. Pero indi lamang amo ina, kundi indi pa niya pagbatunon ang mga kautoran kon magkadto sila dira, kag ginapunggan pa gani niya ang mga luyag magbaton sang mga kautoran, kag ginatinguhaan niya nga tabugon sila sa iglesia!
11Hinigugma ko nga Gayo, indi pag-iluga ang malain, kundi iluga ang maayo. Ang bisan sin-o nga nagahimo sing maayo iya sang Dios, kag ang bisan sin-o nga nagahimo sing malain wala makakita sa Dios.
12Ang tagsatagsa nagasugid nga si Demetrio maayo nga tawo, kag ang kamatuoran mismo nagapamatuod sini. Kami man makapanaksi nahanungod sa iya kag nakahibalo kamo nga ang amon ginahambal matuod.
Katapusan nga mga Pag-abiabi
13May madamo pa ako nga inugsugid sa imo, pero indi ko luyag isulat ini. 14Nagalaom ako sa pagpakigkita sa imo sa indi madugay, kag magasugilanon ugaling kita.
15Ang paghidait manginyara sa imo.
Ang tanan mo nga mga abyan nagapadala sang ila mga pag-abiabi sa imo. Abiabiha sing tag-isaisa ang tanan naton nga mga abyan.
Currently Selected:
3 Juan 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012