2 Samuel 7
7
Ang Mensahe ni Natan kay David
(1 Cron. 17:1-15)
1Karon nagaestar na si David sa iya palasyo, kag ang Ginoo nag-apin sa iya sa tanan niya nga mga kaaway. 2Dayon ang hari nagsiling kay Natan nga propeta, “Tan-awa! Ako iya nagaestar sa palasyo nga nahimo sa kahoy nga sedro, pero ang Kaban sang Kasugtanan sang Dios yara lang sa tolda!”
3Si Natan nagsabat, “Himua ang tanan nga luyag mo, tungod kay ang Ginoo nagaupod sa imo.” 4Pero sa sadto nga gab-i ang Ginoo nagsiling kay Natan, 5“Lakat ka kag singgana ang akon alagad nga si David nga ako nagasiling sa iya, ‘Indi ikaw ang magapatindog sang isa ka templo nga akon pagaestaran. 6Halin sang pagpagwa ko sang mga tawo sang Israel sa Ehipto tubtob sini nga adlaw, wala ako mag-estar sa templo; nagpanglakaton ako nga nagaestar sa isa ka tolda. 7Sa akon pagpanglakaton upod sa mga tawo sang Israel wala gid ako magreklamo sa mga pangulo#7:7 mga pangulo: (tan-awa ang 1 Cron. 17:6); sa Hebreomga tribo. nga akon gintugyanan kon ngaa wala sila magpatindog para sa akon sang templo nga nahimo sa sedro.’
8“Gani singgana ang akon alagad nga si David nga ako, ang Ginoo sang mga hangaway nagasiling sa iya, ‘Halin sa pagkamanugbantay sang mga karnero sa latagon, ginpili ko ikaw nga manginpangulo sang akon mga tawo nga Israelinhon. 9Gin-updan ko ikaw bisan diin ikaw magkadto, kag ginlutos ko ang tanan mo nga mga kaaway sa atubang mo. Himuon ko ikaw nga bantog subong sang labing gamhanan nga mga pangulo sang kalibutan. 10-11Magapili ako sing isa ka lugar para sa akon mga tawo nga Israelinhon kag paestaron ko sila didto, sa diin magaestar sila nga indi na gid pagtublagon. Sugod sang ila pagsulod sa sini nga duta, ginsalakay sila sang mapintas nga mga tawo, pero indi na ini matabo liwat sa ila. Nagasaad ako nga apinan ko ikaw nga indi maano batok sa tanan nimo nga mga kaaway, kag hatagan ko ikaw sing mga kaliwat. 12Kon#Sal. 89:3-4; 132:11; Juan 7:42; Bin. 2:30. mapatay ka kag ilubong upod sa imo mga katigulangan, himuon ko ang isa sang imo mga anak nga manginhari, kag palig-unon ko ang iya ginharian. 13Sia ang magapatindog sing isa ka templo para sa akon, kag himuon ko nga ang iya mga kaliwat magagahom sa walay katapusan. 14Ako#Sal. 89:26-27; 2 Cor. 6:18; Heb. 1:5. mangin-iya amay, kag sia mangin-akon anak. Kon maghimo sia sing malain, ako magasilot sa iya subong sang isa ka amay nga nagasilot sang iya anak. 15Pero indi ko sia pagpatumbayaan subong sang akon ginhimo kay Saul, nga akon ginsikway agod ikaw manginhari. 16Indi#Sal. 89:36-37. ka mawad-an sing mga kaliwat, kag himuon ko ang imo ginharian nga manginwalay katapusan. Ang imo harianon nga paggahom wala sing katapusan.’”
17Ginsugid ni Natan kay David ang tanan nga ginpahayag sang Dios sa iya.
Ang Pangamuyo ni David sa Pagpasalamat
(1 Cron. 17:16-27)
18Dayon si Haring David nagsulod sa Tolda sang presensya sang Ginoo, nagpungko kag nagpangamuyo, “O Ginoo nga Gamhanan, ako kag ang akon panimalay indi takos sang tanan nga imo ginhimo sa akon. 19Pero karon, O Ginoo nga Gamhanan, sobra pa ang imo ginhimo; nagsaad ka nahanungod sa akon mga kaliwat sa palaabuton nga mga panahon. Kag imo ini ginpakita sa isa ka tawo, O Ginoo nga Gamhanan! 20Karon, ano pa bala ang akon masiling sa imo! Imo ako nakilala, ang imo alagad. 21Imo kabubot-on kag tinutuyo ang paghimo sini; ginhimo mo ini tanan nga dalagku nga mga butang agod sa pagtudlo sa akon. 22Daw ano kagamhanan sa imo, O Ginoo nga Gamhanan! Wala sing isa nga kaangay sa imo, wala sing iban nga dios kundi ikaw lamang suno sa amon gid nabatian. 23Wala#Deut. 4:34. sing iban nga pungsod sa duta nga kaangay sa Israel, nga imo ginluwas gikan sa pagkaulipon agod imo manginkaugalingon nga mga tawo. Nanginbantog ka sa bug-os nga kalibutan tungod sang dalagku kag makatilingala nga mga butang nga imo ginhimo para sa ila,#7:23 ila: Sa Hebreoinyo. paagi sa pagtabog pagwa#7:23 Ang isa ka dumaan nga pagbadbadpagtabog pagwa (tan-awa ang 1 Cron. 17:21); sa Hebreoinyo duta. sang mga kapungsoran kag sang ila mga dios sa atubang sang imo mga tawo, nga imo ginpagwa sa Ehipto agod mangin-imo kaugalingon nga mga tawo. 24Ginhimo mo ang Israel nga mangin-imo kaugalingon nga mga tawo sa walay katubtoban, kag ikaw, O Ginoo, nangin-ila Dios.
25“Kag karon, O Ginoong Dios, tumana sa gihapon ang imo ginsaad sa akon kag sa akon kaliwatan kag himua ang imo ginsiling. 26Ang imo pagkabantog magalapnag, kag ang mga tawo magasiling sa walay katapusan, ‘Ang Ginoo sang mga hangaway amo ang Dios sang Israel.’ Kag himuon mo gid nga ang akon mga kaliwat magahari sa gihapon. 27O Ginoo sang mga hangaway, Dios sang Israel! Tungod kay imo ini ginpahayag sa akon nga imo alagad, nga himuon mo ang akon mga kaliwat nga mga hari, may kaisog ako sa pagpangamuyo sini sa imo.
28“Kag karon, O Ginoo nga Gamhanan, ikaw amo ang Dios, ginatuman mo sa gihapon ang imo mga saad, kag ginhimo mo ining makatilingala nga saad sa akon. 29Karon kon mahimo bendisyuni ang akon mga kaliwat agod sila magapadayon sa pagbaton sang imo mga kaayuhan. Ikaw, O Ginoo nga Gamhanan, ang nagsaad sini, kag kabay ang imo pagpakamaayo sa akon mga kaliwat manginwalay katapusan.”
Currently Selected:
2 Samuel 7: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
