2 Samuel 20
20
Ang Pagrebelde ni Seba
1May#1 Hari 12:16; 2 Cron. 10:16. isa ka tawo didto sa Gilgal nga huroshuros nga ginahingalanan kay Seba, ang anak ni Bicri sang tribo ni Benjamin. Nagpatunog sia sing trumpeta kag nagsinggit, “Pukanon ta si David! Indi kita magsunod sa iya! Mga tawo sang Israel, pauli kita!” 2Gani ang mga tawo sang Israel nagbiya kay David kag nagbuylog kay Seba, pero ang mga tawo sang Juda nag-unong kag nag-upod kay David halin sa Jordan pakadto sa Jerusalem.
3Si#2 Sam. 16:22. David nagpauli sa iya palasyo sa Jerusalem, ginkuha niya ang iya napulo ka mga babayi nga ginbilin sa pagtatap sang palasyo kag ginpabantayan sila. Ginhatagan niya sila sang ila mga kinahanglanon, pero wala sia maghiusa sa ila. Ginbukot niya sila kag nagkabuhi sila sa bug-os nila nga kabuhi kaangay sang mga balo.
4Ang hari nagsiling kay Amasa, “Tawga sing tingob ang mga tawo sang Juda kag magbalik ka diri upod sa ila sa isa ka buas.” 5Si Amasa naglakat sa pagtawag sa ila, pero wala sia makabalik sa tion nga ginsiling sang hari. 6Gani ang hari nagsiling kay Abisai, “Si Seba magahatag sa aton sing mas daku pa nga palaligban sang sa kay Absalom. Dalha ang akon mga tawo kag pangitaa sia, kay basi makasulod sia sa iban nga siudad nga napamakuran, kag indi naton sia madakpan.” 7Gani ang mga tinawo ni Joab nga mga gwardya sang hari, kag ang iban nga mga soldado nag-upod kay Abisai. Naghalin sila sa Jerusalem sa pagpangita kay Seba. 8Sang pag-abot na nila sa daku nga bato sa Gabaon, nasugata nila si Amasa. Si Joab lupit sa hinganiban nga nagataklos sang iya espada. Sang nagapalapit sia, ang iya espada nadagdag. 9Si Joab nagsiling kay Amasa, “Kamusta ka, abyan?” kag gin-uyatan ni Joab sang iya tuo nga kamot ang bungot ni Amasa nga kuno abi mahalok sia. 10Si Amasa wala makapanginlaman nga si Joab sa iya wala nga kamot nagauyat sang espada kag dayon ginbuno sia ni Joab sa tiyan kag nagwagay ang iya tinai sa duta. Napatay sia gilayon, gani wala na sia ginbuno ni Joab liwat.
Dayon si Joab kag ang iya utod nga si Abisai nagpadayon sa pagpangita kay Seba. 11Ang isa sang mga tinawo ni Joab nagtindog sa tupad sang bangkay ni Amasa kag nagsinggit, “Ang tanan nga nagaapin kay Joab kag kay David magsunod kay Joab!” 12Ang bangkay ni Amasa nagahamyang sa tunga sang dalan nga nagapaligo sa iya kaugalingon nga dugo. Ang isa ka tinawo ni Joab nakakita nga ang tagsatagsa nga makakita sini nagadulog sa pagtan-aw, gani ginsagnoy niya ang bangkay halin sa dalan pakadto sa latagon kag gintabunan niya ini sing habol. 13Sang makuha na ang bangkay sa dalan, ang tagsatagsa nag-upod kay Joab sa pagpangita kay Seba.
14Si Seba nag-agi sa kadutaan sang tanan nga mga tribo sang Israel kag nag-abot sia sa siudad sang Abel-Bet-Maaca, kag ang tanan nga mga kabarangayan ni Bicri nagtipon sing tingob kag nagsunod sa iya pasulod sa siudad. 15Ang mga tinawo ni Joab nakabati nga si Seba yadto didto, gani nagkadto sila kag ginkibon ang siudad. Naghimo sila sing trinsera nga duta sa gwa sang pader, kag nagsugod sila sa pagkutkot sa idalom sang pader agod matumba ini. 16May isa ka maalam nga babayi sa sulod sang siudad nga nagsinggit halin sa pader, “Pamati kamo! Pamati kamo! Singgana ninyo si Joab nga magkadto diri kay luyag ako magpakighambal sa iya.” 17Si Joab nagkadto sa iya, kag ang babayi nagpamangkot sa iya, “Ikaw bala si Joab?”
Nagsabat sia, “Huo.”
Ang babayi nagsiling, “Pamatii bala ako.”
Nagsabat sia, “Sigi, nagapamati ako.”
18Nagsiling ang babayi, “Sang una anay may isa ka hulobaton nga nagasiling, ‘Lakat kag magkuha sang imo sabat sa siudad sang Abel’—kag amo ina ang ila ginhimo. 19Ang amon siudad isa ka bantog nga siudad, isa sang labing malinong kag mainunongon sa Israel. Ngaa bala nagtinguha kamo sa pagguba sini? Luyag bala ninyo gub-on ang siudad nga iya sang Ginoo?”
20Si Joab nagsabat, “Indi gid ako magguba ukon maglaglag sang inyo siudad! 21Indi amo ina ang amon tuyo. Ang isa ka tawo nga ginahingalanan kay Seba nga anak ni Bicri nga taga-kabakuloran sang Efraim nagsugod sa pagrebelde batok kay Haring David. Itugyan ini nga tawo sa akon kag magahalin ako sa inyo siudad.”
Ang babayi nagsiling, “Ihaboy namon sa imo ang iya ulo sa gwa sang pader.” 22Dayon ginkadtuan niya ang mga pumoluyo sang siudad kag ginsugiran sang iya plano. Ginpugotan nila si Seba kag ginhaboy ang iya ulo kay Joab sa gwa sang pader. Ginpatunog ni Joab ang trumpeta kag ang tanan niya nga mga tinawo naghalin sa siudad kag nagpauli. Kag si Joab nagbalik sa hari sa Jerusalem.
Ang mga Opisyales ni David
23Si Joab amo ang pangulo sang mga hangaway sang Israel; si Benaya nga anak ni Joiada amo ang pangulo sang mga gwardya ni David; 24si Adoniram amo ang pangulo sa pilit nga pag-obra; si Josafat nga anak ni Ahilud amo ang gintugyanan sang mga dokumento; 25si Seva amo ang sekretaryo sang korte sang hari; si Sadoc kag si Abiatar amo ang mga pari, 26kag si Ira nga taga-Jair isa man sang mga pari ni David.
Currently Selected:
2 Samuel 20: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
