2 Samuel 11
11
Si David kag si Batseba
1Sa#1 Cron. 20:1. tapos ang tigtulognaw, sa panahon nga ang mga hari nagalakat sa pagpakig-away, ginpadala ni David si Joab upod ang iya mga opisyales kag ang mga hangaway sang Israel; ginlutos nila ang mga Amonhon kag ginkibon ang siudad sang Raba. Pero si David nagpabilin sa Jerusalem.
2Isa sadto ka hapon, si David nagbangon gikan sa iya pagpahuway kag nagsaka sia sa atop sang palasyo. Samtang nagadayandayan sia sa atop, may nakita sia nga isa ka babayi nga nagapaligo. Matahom sia kaayo. 3Gani nagpasugo sia sa pag-usisa kon sin-o ini nga babayi, kag nahibal-an niya nga sia amo si Batseba, anak nga babayi ni Eliam kag asawa ni Urias nga Hethanon. 4Si David nagpasugo nga dalhon ini nga babayi sa iya, gindala nila sia kay David kag ginhuliran sia ni David. (Bag-o lang sia makatapos sang iya pagpaninlo sa iya pamulanon.) Dayon nagpauli sia. 5Sang ulihi, nasapwan niya nga nagabusong sia, gani ginpahibalo niya si David.
6Dayon si David nagpadala sang mensahe kay Joab: “Papaulia diri sa akon si Urias nga Hethanon.” Gani ginpadala ni Joab si Urias kay David. 7Sang pag-abot niya, ginpamangkot sia ni David kon kamusta si Joab kag ang mga hangaway, kag kon paano man ang inaway. 8Dayon nagsiling sia kay Urias, “Pauli ka anay sa imo balay kag magpahuway.” Si Urias naglakat kag ginpadalhan sia ni David sing regalo sa iya balay. 9Pero si Urias wala magpauli, didto sia nagtulog sa pwerta sang palasyo upod sa mga gwardya sang hari. 10Sang pagkabati ni David nga si Urias wala magpauli, namangkot sia, “Bag-o ka lang mag-abot kag dugay na nga wala ka makapauli, ngaa nga wala ka magpauli sa inyo?”
11Nagsabat si Urias, “Ang mga tawo sang Israel kag sang Juda yadto sa patag-awayan, kag ang Kaban sang Kasugtanan upod sa ila; ang akon pangulo nga si Joab kag ang iya mga opisyales yadto didto sa kawayangan. Makabatas bala ako magpauli sa pagkaon kag pag-inom kag paghulid sa akon asawa? Nagsumpa ako sa atubang sang Ginoo nga indi ko paghimuon ina nga butang!”
12Si David nagsiling, “Kon amo pabilin ka diri sa bug-os nga adlaw, kag buas pabalikon ko ikaw.” Gani si Urias nagpabilin sa Jerusalem sadto nga adlaw kag sa madason pa gid nga adlaw. 13Gin-agda sia ni David sa pagpanihapon upod sa iya kag ginhubog sia. Pero sa liwat si Urias wala magpauli sa iya balay, sa baylo nagtulog sia sa kwarto sang gwardya sa palasyo nga ang iya ginhigdaan amo lang ang iya habol.#11:13 habol: ukonkatre.
14Sang madason nga adlaw si David nagsulat kay Joab kag ginpadala niya ini kay Urias. 15Nagsulat sia: “Ibutang si Urias sa nauna nga mga soldado sa diin ang inaway malapuyot kag dayon bayaan ninyo sia agod mapatay.” 16Gani samtang ginakibon ni Joab ang siudad, ginbutang niya si Urias sa lugar sa diin mabakod ang mga kaaway. 17Ang mga soldado sang mga kaaway naggwa sa siudad kag nagpakig-away sa mga hangaway ni Joab, kag ginpatay nila ang pila ka mga opisyales ni David, kag si Urias napatay man.
18Dayon si Joab nagpahibalo kay David nahanungod sang inaway, 19kag ginsingganan niya ang iya mensahero, “Sa tapos masugiran mo ang hari sang tanan nahanungod sa inaway, 20ayhan mangakig sia kag mamangkot sa imo, ‘Ngaa nga nagpalapit gid kamo sa siudad sa pagpakig-away batok sa ila? Wala bala kamo makahibalo nga sarang nila kamo mapana halin sa mga pader? 21Wala#Huk. 9:53. bala kamo makadumdom kon paano napatay si Abimelec nga anak ni Gideon? Natabo yadto sa Tebes sa diin ang isa ka babayi naghulog sing galingan nga bato halin sa pader kag ginpatay sia. Gani, ngaa nga nagpalapit kamo sa pader?’ Kon ang hari magpamangkot sini sa imo sugiri sia, ‘Ang imo opisyal nga si Urias napatay man.’”
22Gani, ang mensahero nagkadto kay David kag ginsugiran sia sang ginsugo sa iya ni Joab. 23Nagsiling sia, “Ang mga kaaway mas makusog sang sa amon kag naggwa sila sa siudad kag nagpakig-away sa amon sa kawayangan, pero gindusdos namon sila pabalik sa pwerta sang siudad. 24Dayon ginpana nila kami halin sa pader kag napatay ang iban sang imo opisyales, Mahal nga Hari, kag ang imo opisyal nga si Urias napatay man.”
25Si David nagsiling sa mensahero, “Paisuga si Joab kag singgana sia nga indi magpakaluya, kay indi gid mapaktan kon sin-o ang mapatay sa inaway. Singgana sia nga salakayon niya liwat sing mabaskog ang siudad kag agawon ini.”
26Sang pagkabati ni Batseba nga ang iya bana napatay, naglalaw sia. 27Sang matapos na ang paglalaw, ginpakuha sia ni David kag gindala sa palasyo. Nangin-asawa niya sia kag nag-anak sia kay David sing isa ka lalaki. Pero ang Ginoo wala malipay sa ginhimo ni David.
Currently Selected:
2 Samuel 11: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
