2 Pedro 1
1
1Ako si Simon Pedro, isa ka alagad kag apostol ni Jesu-Cristo, nagasulat sa mga ginhatagan sing pagtuo nga hamili subong sang amon pagtuo, paagi sa pagkamatarong ni Jesu-Cristo nga aton Dios kag Manluluwas.
2Kabay nga ang pagpakamaayo kag paghidait magbugana sa inyo, paagi sa inyo pagkilala sa Dios kag kay Jesus nga aton Ginoo.
Ang Pagtawag kag Pagpili sang Dios
3Ang gahom mismo sang Dios naghatag sa aton sang tanan naton nga mga kinahanglanon sa pagkabuhi sang diosnon nga kabuhi paagi sa aton pagkilala sang nagtawag sa aton sa pag-ambit sang iya#1:3 sa pag-ambit sang iya: Ang iban nga mga manuskrito maypaagi sa iya. makatilingala nga kaayo. 4Sa sini nga paagi, iya kita ginhatagan sing hamili kag tama ka dalagku nga mga kaayuhan nga iya ginsaad, agod nga paagi sa sini nga mga kaayuhan malikawan ninyo ang makahalalit nga kailigbon sa sini nga kalibutan, kag maambit ninyo ang kinaugali sang Dios. 5Tungod sini, tinguhaa ninyo nga idugang sa inyo pagtuo ang kaayo; kag sa kaayo ang ihibalo; 6sa ihibalo ang pagpugong sang kaugalingon, sa pagpugong sang kaugalingon ang pagbatas; sa pagbatas ang pagkadiosnon; 7sa pagkadiosnon ang paghiliutod nga kalulo; kag sa paghiliutod nga kalulo ang paghigugma. 8Kon ini nga mga butang yara sa inyo sing bugana, ini sila magapapisan sa inyo kag manginmabinungahon kamo sa inyo pagkilala sa aton Ginoo nga si Jesu-Cristo. 9Pero ang bisan sin-o nga wala sini daw sa harapon sia nga indi makakita sa malayo, kag nagakalipat nga natinluan na sia gikan sa iya nagligad nga mga sala.
10Gani, mga utod ko, tinguhai pa gid ninyo ang pagpalig-on sang pagtawag kag pagpili sang Dios sa inyo, kay kon inyo ginahimo ini indi gid kamo magbiya sang inyo pagtuo.#1:10 magbiya sang inyo pagtuo: ukonmagpakasala. 11Sa sini nga paagi, ihatag sa inyo ang bug-os nga kinamatarong sa pagsulod sa walay katapusan nga Ginharian sang aton Ginoo kag Manluluwas nga si Jesu-Cristo.
12Tungod sini, pahanumdomon ko kamo sa gihapon sini nga mga butang, bisan pa nga inyo na ini nahibaluan kag napalig-on na gid kamo sa kamatuoran nga inyo nabaton. 13Samtang buhi pa ako, ginakabig ko nga akon katungdanan ang pagpahanumdom sa inyo sini nga mga butang. 14Kay nakahibalo ako nga sa indi madugay ubahon ko na ining mamalatyon nga lawas, suno sa ginsiling sa akon sing maathag sang aton Ginoong Jesu-Cristo. 15Gani, tinguhaon ko gid ang pagpangita sing paagi nga inyo madumdoman ini nga mga butang sa tanan nga tion kon patay na ako.
Mga Saksi sang Kagamhanan ni Cristo
16Kay ang amon pagpakilala sa inyo sang gamhanan nga pag-abot sang aton Ginoong Jesu-Cristo wala nasandig sa patupato nga mga sugilanon. Nakita gid sang amon mga mata ang iya pagkahalangdon. 17Didto#Mat. 17:1-5; Mar. 9:2-7; Luc. 9:28-35. kami sang ginhatagan sia sing kadungganan kag kadayawan sang Dios nga Amay. Nakabati kami sang tingog halin sa halangdon nga presensya sang Dios nga nagasiling, “Amo ini ang akon hinigugma nga Anak, nga sa iya nahamuot gid ako!” 18Kami gid nakabati sini nga tingog halin sa langit, sang didto kami upod sa iya sa balaan nga bukid.
19Gani nagasalig pa gid kami sa mga pulong nga ginwali sang mga propeta. Maayo gid para sa inyo nga hatagan ninyo ini sang inyo igtalupangod, tungod kay kaangay ini sang isa ka suga nga nagasiga sa madulom nga lugar, tubtob nga ang Adlaw magpamanagbanag kag ang kapawa sang kabugwason magsilak sa inyo mga tagipusoon. 20Pero labaw sa tanan, dumdoma ninyo ini: wala sing tawo nga sa iya lamang kaugalingon makapaathag sang mensahe sang mga propeta nga nasulat sa mga Kasulatan. 21Kay wala sing mensahe sang mga propeta nga naghalin sa kabubot-on lang sang tawo, kundi ang mga tawo nga gingamhan sang Espiritu Santo, samtang naghambal sila sang mga pulong nga naghalin sa Dios.
Currently Selected:
2 Pedro 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
