2 Macabeo 5
5
Ang mga Palanan-awon Nahanungod sa Inaway
1Sa amo man nga tion si Antioco IV naghimo sang ikaduha niya nga pagsalakay batok sa Ehipto. 2Natabo man nga sa sulod sang kwarenta ka adlaw ang mga tawo sa bug-os nga siudad sang Jerusalem nakakita sang mga palanan-awon nahanungod sa mga manugkabayo nga nagabayo sing bulawan. Mga grupo sila sang mga manugbangkaw nga nasangkapan sang mga espada kag nagapadalagan sang ila mga kabayo sa panganod. 3Nagpakita man ang mga hangaway nga nagasakay sa kabayo nga handa sa pag-away. Ginpakita man ang mga nagkalainlain nga pagsalakay kag pagpangapin, ang matahom nga mga taming, madamo nga mga bangkaw, ang nagabadlak nga mga espada, kag ang paghinabuyay sang mga sumbiling. Nagabanaag ang bulawan nga mga panaming sa lawas kag ang tanan nga mga armas. 4Ang tanan nga mga tawo nagpangamuyo nga ining pagpakita mangintanda sang kadalag-an.
Ginsalakay ni Jason ang Jerusalem
5Tungod sa indi matuod nga balita nga si Antioco napatay na, si Jason nagtipon sang mga tawo nga indi magkubos sa 1,000 kag nagsalakay sing kibot sa siudad. Ang mga hangaway nga nagabantay sang pader nagpalalagyo, tungod kay naagaw ang bug-os nga siudad, si Menelao nagpanago sa pamakod. 6Sa pihak nga bahin si Jason nagpadayon sa pagpamatay nga wala sing kaluoy sang iya mga kasimanwa. Wala niya matalupangdi nga ang kadalag-an niya batok sa iya kasimanwa isa ka daku nga kalaglagan, kundi ginapanan-aw niya ang iya kaugalingon nga nagapangdaog sang mga tropeo batok sa iya mga kaaway, kag indi sa iya kaugalingon nga mga kasimanwa. 7Wala sapayan sini, wala niya maangkon ang kagamhanan, sang ulihi wala sia sing may nakuha sa iya plano nga malaut kundi ang kahuy-anan, kag liwat nagpanago naman sia sa kadutaan sang mga Amonhon. 8Tungod sini napatay sia sa kahuloy-an. Gingamhan sia ni Aretas, ang pangulo sang mga Arabo, nagpalagyo sia halin sa isa ka banwa pakadto sa isa, ginpangita sang tanan nga mga tawo, gindumtan sia tungod sang iya paglapas sa mga kasugoan, ginkangil-aran subong nga isa ka manugpatay sang iya pungsod kag mga kasimanwa, kag tungod sini nagpalagyo sia sa Ehipto. 9Sang ulihi ini nga tawo nga nagtabog sang madamo gikan sa ila pungsod napatay gid man sa iban nga duta, sa tapos sia makapanglugayaw sa Sparta sa tuyo nga basi pa lang nga sa pagkapariente nila sapupuhon nila sia. 10Madamo gid nga mga bangkay ang iya ginhaboy nga wala napalubong, karon yari sia nga wala sing may nagatangis sa iya kamatayon, wala sing seremonya sa paglubong, kag wala sing lugar sa lulobngan sang iya mga katigulangan.
Ginsalakay ni Antioco Epifanes ang Jerusalem
(1 Mac. 1:20-63)
11Pagkabati ni Antioco natungod sang natabo sa Jerusalem, naghunahuna sia nga nagrebelde ang bug-os nga Judea. Subong sang isa ka talunon nga sapat nga naakig, naggwa sia gikan sa Ehipto kag ginsugoran niya ang pagsalakay sang siudad. 12Ginmanduan niya ang iya mga soldado nga pamatyon nga wala sing luoyluoy ang tanan nga ila masugata kag pangduduon ang tanan nga nagapalanago sa ila mga balay. 13Ginpamatay nila ang mga tigulang kag mga bataon, subong man ang mga babayi kag mga kabataan, lakip ang mga dalaga kag mga lapsag. 14Sa sulod sang tatlo ka adlaw 80,000 ang nanginbiktima, 40,000 ang pinamatay kag mga amo man kadamo ang ginpamaligya bilang mga ulipon.
15Indi pa kontento si Antioco sini, gani nangahas sia sa pagsulod sa pinakabalaan nga Templo sa bug-os nga kalibutan, nga ginagiyahan ni Menelao nga nangintraidor sa iya pagtuluohan kag pungsod. 16Paagi sa iya mahigko nga mga kamot iya ginpanguha ang balaan nga mga kagamitan, kag iya ginpanghaboy paagi sa iya malaut nga mga kamot ang mga kagamitan nga ginhalad sang iban nga mga hari para sa kauswagan, kahimayaan kag kadungganan sang Templo. 17Tungod sang tuman nga pagkabugalon ni Antioco, wala niya matalupangdi nga ang Ginoo naakig sa malip-ot nga tion tungod sang mga sala sang mga pumoluyo sang siudad, gani ginpabayaan niya ang balaan nga Templo. 18Kon wala lang mahigtan sang ila mga sala ining mga pumoluyo, kuntani ginbunal man si Antioco sa tion sang iya pag-abot kag nabalabagan sa iya malain nga tinutuyo subong sa ginhimo kay Heliodoro sang pagpadala sa iya ni Haring Seleuco sa pag-usisa sang talaguan sang manggad. 19Pero ang Ginoo wala nagpili sang mga tawo para sa kaayuhan sang iya Templo, kundi nagpili sang iya Templo para sa kaayuhan sang mga tawo. 20Gani ining Templo nga nag-ambit sang mga kalalat-an nga gin-antos sang mga tawo, nag-ambit man sang ila malayo nga dinangatan, ginpabay-an ini sang Makagagahom sa tion sang iya kaakig, pero ginpabalik sa iya bug-os nga kahimayaan sang mapaumpawan sa iya kaakig ang Labing Gamhanan.
Isa pa ka Pagsalakay batok sa Jerusalem
21Gindala ni Antioco ang 135,000 ka libra nga pilak nga iya ginkawat sa Templo, kag nagdalidali sia pabalik sa Antioquia. Tungod sang iya tuman nga kahambog kag gapalanglapaw nga handom, iya kuntani himuon nga maagyan sang barko ang mamala nga duta kag malaktan sang mga tiil ang kadagatan. 22Nagbilin sia sang mataas nga mga pangulo sa pagpigos sang pungsod: sa Jerusalem iya ginbutang si Felipe, taga-Frigia, nga sa pamatasan mas mabaris pa sang sa tawo nga nagpili sa iya, 23sa Bukid sang Gerizim, iya ginbutang si Andronico. Dugang sini iya ginbutang si Menelao nga nangin-agalon sang iya mga kasimanwa kag labing malain sa tanan. Tungod sang kaakig sang hari sa mga Judio, 24iya ginpadala si Apolonio, nga heneral sang taga-Misia, upod ang 22,000 ka mga soldado kag ginmanduan niya sila sa pagpamatay sang tanan nga mga pamatan-on nga lalaki kag ibaligya ang mga babayi kag ang mga kabataan nga lalaki subong mga ulipon. 25Pag-abot niya sa Jerusalem nagpakunokuno sia nga isa sia ka tawo nga mahidaiton. Ginhulat niya ang balaan nga Adlaw nga Inugpahuway kag iya ginhimuslan ang pagpahuway sang mga Judio sa ila pag-obra, paagi sa pagsugo sang iya mga soldado sa pagparada nga nasangkapan sang hinganiban. 26Ginpapatay niya ang tanan nga naggwa sa pagtan-aw, dayon upod sa iya armado nga mga soldado nagkadto sila sa bug-os nga siudad kag ginpamatay ang madamo nga mga tawo.
27Pero si Judas Macabeo, upod ang iya siyam ka mga kaupdanan, nagpalalagyo sa desierto, kag nagpangabuhi kaangay sang mga sapat nga talunon sa kabakuloran, nga wala sing ginakaon luas sang talunon nga mga tanom agod indi sila madagtaan.
Currently Selected:
2 Macabeo 5: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012