2 Macabeo 3
3
Ang Pagbinaisbais ni Onias kag ni Simon
1Samtang ang mga pumoluyo sang balaan nga siudad nagapangabuhi sa paghidait kag ang tanan nga mga kasugoan ginsunod gid tungod sang pagkamatarong sang Pinakamataas nga Pari sang Jerusalem nga si Onias#3:1 ONIAS: Ini amo si Onias III, anak ni Simon II (tan-awa ang 4:4-6; Sirac 50:1-21). kag sang iya pagdumot sang kalautan. 2Bisan gani ang mga hari sang Siria kag Ehipto nagpasidungog sang Templo kag gindugangan nila ang kahimayaan sang Templo paagi sa ila maayo gid nga mga dulot. 3Sa amo man nga bagay si Seleuco#3:3 SELEUCO: Ini amo si Seleuco IV, ginkilala man nga si Filopator, anak ni Antioco III, sang tuig 187 tubtob 175 sa wala pa matawo ang Cristo. nga hari sang Asia, nagpanabat sang tanan nga mga galastuhon nga kinahanglanon para sa mga halad halin sa mga buhis nga iya natipon.
4Pero may isa ka tawo nga ginahingalanan kay Simon, sang tribo ni Bilga,#3:4 Ang iban nga dumaan nga mga pagbadbad Bilga (tan-awa ang Neh. 12:5, 18); sa Griego Benjamin. nga sang pagkatapos mahimo sia nga administrador sang Templo, nagkinagamo sila sang Pinakamataas nga Pari natungod sa mga kasugoan sa mga merkado sang siudad. 5Tungod nga indi sia makadaog kay Onias, nagkadto sia kay Apolonio nga taga-Tarso, nga sa sadto nga tion gobernador sang Coeli-siria kag sang Fenicia. 6Nagpanugid sia nga ang talaguan sang manggad sa Templo puno gid, nga ang kabilogan sang ginhatag indi maisip kag sobra na katama sa kagastohanan sang mga halad, kag ini sarang mabutang sa idalom sang gahom sang hari.
Ginpadala si Heliodoro sa Jerusalem
7Sang pagkitaay ni Apolonio kag sang hari, ginsingganan niya ang hari natungod sang manggad nga ginsugid sa iya. Ginpili sang hari ang iya ministro nga si Heliodoro kag ginmanduan nga kuhaon ang nasambit nga manggad. 8Sa gilayon si Heliodoro naglakat nga nagapakunokuno sa pagpangusisa sang mga kabanwahanan sang Coeli-siria kag sang Fenicia, pero may tuyo sa paghimo sang mando sang hari. 9Pag-abot niya sa Jerusalem, gin-abiabi sia sing maayo sang Pinakamataas nga Pari kag sang siudad, dayon ginpahibalo niya kon ano ang ginsugid sa iya kag ang iya tinutuyo sa pag-abot, kag namangkot sia kon bala amo ini ang matuod nga kahimtangan. 10Ginpaathag sang Pinakamataas nga Pari nga may bahin sang kwarta nga napain para sa mga balo kag sa mga ilo, 11kag ang iban iya ni Hircano, anak ni Tobias, isa ka tawo nga may mataas nga pwesto. Batok sa panumbongon sang maluibon nga Simon, ang kabilogan sang bug-os nga manggad nakalambot lamang sa 30,000 ka libra nga pilak kag 15,000 ka libra nga bulawan. 12Nagdugang pa sia sa pagsiling nga indi mapatihan nga malain ang pagahimuon sa ila nga nagasalig sa pagkabalaan sang lugar kag sa indi masupak nga kahimayaan sang Templo nga ginapasidunggan sa bug-os nga kalibutan.
Ang mga Plano ni Heliodoro sa Pagsulod sa Templo
13Pero tungod sang mando gikan sa hari nagpamat-od si Heliodoro nga kuhaon ang manggad para sa hari. 14Gani sa natalana nga adlaw nagsulod sia sa Templo sa pagdumala sang pag-isip sang tanan nga manggad. Tungod sini nagkinagula ang bug-os nga siudad. 15Ang mga pari nga nagabayo sang ila balaan nga mga bayu naghalapa sa atubangan sang altar kag nagpangamuyo sa Dios nga iya bantayan ang kwarta, kay sia ang naghimo sang kasugoan nahanungod sa kwarta nga ginadeposito sang mga tawo sa Templo. 16Ang bisan sin-o nga makakita sang hitsura sang Pinakamataas nga Pari pat-od gid nga masakit ang tagipusoon, tungod ang pagbaylo sang kolor sang iya nawong nagapakita sang tuman nga kalisod sang iya kalag. 17Ang kasakit nga nagapanalupsop sa bug-os niya nga kasingkasing indi matago tungod sang iya tuman nga kakugmat kag pagpalangurog sang bilog niya nga lawas. 18Ang mga tawo nagdalidali sa paggwa sa ila mga balay sa pagpangamuyo sing tingob tungod sang katalagman nga dagtaan ang Templo. 19Ang mga babayi nga nagatampi lang sing sako nagpuno sang mga dalanon. Ang mga dalaga nga nagapabukot nagdinalagan pakadto sa pwertahan, ang iban sa mga pader sang siudad, kag ang iban nagtamwa sa mga bintana. 20Tanan sila nagbayaw sang ila mga kamot sa pag-ampo sa Dios. 21Makaluluoy gid tan-awon ang mga tawo nga nagahalapa sa duta kag ang Pinakamataas nga Pari nga napun-an sing pag-antos kag kalisod.
Ang Ginoo Nagaamlig sang Iya Templo
22Samtang nagaampo sila sa Ginoo nga Makagagahom nga indi maano ang manggad nga ila sang mga nagdeposito sini, 23si Heliodoro nagpadayon sa pagtuman sang ginsugo sa iya. 24Sang makasulod sia upod sang iya mga tinawo sa talaguan sang manggad, nagpakita ang espiritu sang Makagagahom nga Dios. Indi makahambal kag napun-an sing kahadlok ang tanan nga nag-ulopod kay Heliodoro. 25Nakita gid nila sang ila duha ka mata ang kabayo nga napunihan sing maayo kag ang isa ka makahaladlok nga manugkabayo nga nasangkapan sang bulawan nga hinganiban. Sa hinali nagsirbe ang kabayo kag ginsipa si Heliodoro sang iya duha ka panguna nga tiil. 26Sa amo man nga tion nagpakita ang duha ka mabukod kag tuman ka gwapo nga mga pamatan-on nga napanaptan sing malahalon kag matahom nga bayu. Ginpatung-an nila si Heliodoro kag walay luoyluoy nga ginputik sia. 27Hinali lang nga natumba si Heliodoro sa duta kag nalikupan sing madamol nga kadulom. Ginbuligan sia sang iya mga tinawo kag ginpahigda sa yayungan. 28Ini nga tawo nga sa wala lang madugay nagsulod sa talaguan sang kwarta upod ang iya madamo nga mga tinawo kag mga gwardya, karon ginayayungan nga wala sing animo. Gani ginkilala nila tanan#3:28 nila tanan: Ang iban nga mga manuskrito may niya. ang daku nga gahom sang Dios.
Si Onias Nagpangamuyo nga si Heliodoro Magaayo
29Samtang nagahigda si Heliodoro nga indi makahambal kag indi na gid matabangan bangod sang gahom sang Dios, 30ang mga Judio nagdayaw sa Ginoo nga naghimaya sing makatilingala sang iya Templo. Ang Templo nga sa wala lang madugay napuno sing kahadlok kag pagkinagamo, karon napun-an sing kasadya kag kalipay tungod sang pagpakita sang Makagagahom nga Ginoo. 31Ang iban sang mga kaupdanan ni Heliodoro sa gilayon nagpakitluoy kay Onias sa pag-ampo sa Labing Mataas nga Dios, nga luwason ang kabuhi sining tawo nga nagahimumogto. 32Tungod sang kakulba sang Pinakamataas nga Pari nga basi magdumdom ang hari nga si Heliodoro ginkastigo sang mga Judio, naghalad sia para mag-ayo ini nga tawo. 33Kag samtang ang Pinakamataas nga Pari nagahalad para sa kapatawaran sang sala, ang mga pamatan-on nga nagpakita sang una kay Heliodoro nagpakita liwat nga nagasuksok sang amo man gihapon nga bayu. Nagtindog sila sa tupad ni Heliodoro kag nagsiling, “Magpasalamat ka kay Onias nga Pinakamataas nga Pari kay tungod sa iya ang Ginoo nagtugot nga indi ka mapatay. 34Tungod kay ginsilutan ikaw sang Ginoo sang langit, ipahibalo mo sa tanan nga mga katawhan ang pagkahalangdon sang gahom sang Dios.” Sang matapos mahambal nila ini, nadula sila.
Si Heliodoro Nagdayaw sa Dios
35Si Heliodoro nagdulot sing halad sa Ginoo kag nagsaad nga may panumpa sa nagluwas sang iya kabuhi. Sa tapos sini, nagpaalam sia kay Onias kag upod sa iya mga soldado nagbalik sa hari. 36Sa atubang sang tanan nga mga tawo nagpanaksihon sia natungod sang mga buhat sang Labing Gamhanan nga Dios nga nakita gid sang iya mga mata.
37Sang mamangkot ang hari kay Heliodoro kon sin-o ang madason nga tawo nga bagay ipadala sa Jerusalem para sa isa ka bulohaton, nagsabat sia, 38“Kon may isa ikaw ka kaaway ukon isa ka rebelde batok sa gubyerno, ipadala sia didto. Kon makatibawas pa sia, magabalik sia nga puno sing labhag kag lapdos kag ginapaniguro ko gid nga may tumalagsahon nga gahom sang Dios sa sina nga lugar. 39Ang Dios nga nagaestar sa langit amo gid ang nagabantay kag nagaapin sina nga Templo. Iya ginapapas kag ginalaglag ang tanan nga may tuyo sa paghalit sini.” 40Amo ini ang natabo kay Heliodoro kag ang pagluwas sang talaguan sang kwarta sa Templo.
Currently Selected:
2 Macabeo 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012