2 Mga Hari 9
9
Si Jehu Ginhaplas nga Manginhari sang Israel
1Sa pihak nga bahin, si Eliseo nga propeta nagpatawag sang isa sang mga pamatan-on nga propeta kag nagsiling sa iya, “Mag-aman ka kag magkadto sa Ramot nga sakop sang Galaad. Dalha ining tibod sang lana sang olivo, 2kag kon makaabot ka didto pangitaa si Jehu nga anak ni Josafat kag apo ni Nimsi. Dalha sia sa sekrito nga kwarto nga malayo sa iya mga kaupdanan, 3ibubo ining lana sang olivo sa iya ulo, kag magsiling, ‘Ang Ginoo nagsiling nga ginahaplas niya ikaw nga manginhari sang Israel.’ Dayon maghalin ka didto sing dalidali.”
4Gani ang pamatan-on nga propeta nagkadto sa Ramot, 5sa diin nakita niya ang mga opisyales sang mga hangaway nga nagahinun-anon. Nagsiling sia, “Sir, may ihambal ako sa imo.”
Nagpamangkot si Jehu, “Sin-o sa amon ang ginahambalan mo?”
Nagsabat sia, “Ikaw, sir.” 6Dayon#1 Hari 19:16. sila nga duha nagsulod sa isa ka balay, kag ang pamatan-on nga propeta nagbubo sang lana sang olivo sa ulo ni Jehu kag nagsiling sa iya, “Ang Ginoo, ang Dios sang Israel, nagasiling: ‘Ginahaplas ko ikaw nga manginhari sang akon mga tawo nga Israelinhon. 7Patyon mo ang imo agalon nga hari nga anak ni Acab, agod masilutan ko si Jezebel tungod sang iya pagpamatay sang akon mga propeta kag sang akon iban nga mga alagad. 8Ang tanan nga mga katapo sang panimalay kag mga kaliwat ni Acab dapat mapatay; papason ko ang tagsa ka lalaki sa iya panimalay, bata kag tigulang. 9Himuon ko sa iya panimalay ang akon ginhimo sa panimalay ni Haring Jeroboam sang Israel kag sa panimalay ni Haring Baasa sang Israel. 10Si#1 Hari 21:23. Jezebel indi pag-ilubong, ang iya bangkay pagakaunon sang mga ido sa kadutaan sang Jezreel.’” Sa tapos masiling ini sang pamatan-on nga propeta naggwa sia sa kwarto kag nagpalagyo.
11Nagbalik si Jehu sa iya kaupod nga mga opisyales, kag ginpamangkot sia, “Kamusta man? Ano bala ang kinahanglan sadtong buang nga tawo sa imo?”
Nagsabat si Jehu, “Nahibal-an na ninyo ang iya kinahanglan.”
12Nagsabat sila, “Wala kami makahibalo. Sugiri kami sang iya ginsiling!”
Nagsiling si Jehu, “Ginsugiran niya ako nga ang Ginoo nagasiling: ‘Ginahaplas ko ikaw nga manginhari sang Israel.’”
13Sa gilayon ang mga kaupod ni Jehu nga mga opisyales naghumlad sang ila mga kunop sa ibabaw sang hagdanan agod iya pagatindugan, nagpatunog sang mga trumpeta kag nagsinggit, “Mabuhay si Jehu nga hari!”
Si Haring Joram sang Israel Ginpatay
14-15Dayon si Jehu nagplano batok kay Haring Joram nga yadto didto sa Jezreel, sa diin nagapaayo sang iya mga pilas nga iya naagom sa inaway didto sa Ramot batok kay Haring Hazael sang Siria. Gani si Jehu nagsiling sa iya kaupod nga mga opisyales, “Kon kamo nagaapin sa akon, sigurohon ninyo nga wala sing isa nga makagwa sa Ramot nga maglakat kag magpaandam sa mga tawo sa Jezreel.” 16Dayon nagsakay sia sa iya karwahi kag nagkadto sa Jezreel. Si Joram wala pa gid mag-ayo, kag si Haring Ocozias sang Juda yadto didto nga nagabisita sa iya.
17Ang gwardya nga nagabantay sa tore sa Jezreel nakakita kay Jehu kag sang iya mga tinawo nga nagapalapit. Nagsinggit sia, “Nakita ko nga may mga tawo nga nagasakay sa kabayo nga nagapalapit!”
Si Joram nagsabat, “Padala ka sang isa ka manugkabayo sa paghibalo kon sila mga abyan ukon mga kaaway.”
18Ang manugkabayo naggwa sa pagsugata kay Jehu kag ginsingganan sia, “Luyag mahibal-an sang hari kon nag-abot ka subong abyan.”
Nagsabat si Jehu, “Wala ka sing labot! Sunod ka sa akon!”
Ang gwardya sa tore nagsugid nga ang manugkabayo nakalambot didto sa grupo, pero wala makabalik. 19Ginpadala pa gid ang isa ka manugkabayo, nga namangkot kay Jehu sang amo man nga pamangkot. Sa liwat nagsabat si Jehu, “Wala ka sing labot sini! Sunod ka sa akon.”
20Sa liwat ang gwardya nagsugid nga ang manugkabayo nakalambot sa grupo, pero wala makabalik. Kag nagsiling pa gid sia, “Ang pangulo sang grupo nagapadalagan sang iya karwahi sing tudotudo gid kaangay ni Jehu!”
21Nagsugo si Joram, “Ihanda ang akon karwahi. Ginhanda ini, kag sia kag si Haring Ocozias naggwa, nga nagasakay sa ila tagsatagsa ka karwahi sa pagsugata kay Jehu. Ginsugata nila sia sa uma ni Nabot. 22Si Joram nagpamangkot sa iya, “Nagaabot bala ikaw sa paghidait?”
Nagsabat si Jehu, “Ano ang pagluntad sang paghidait, nga sa gihapon nagapadayon ang tanan nga pagbinabaylan kag pagsimba sa diosdios nga ginsugoran sang imo iloy nga si Jezebel?”
23Samtang ginapaliso ni Joram ang iya karwahi sa pagpalagyo, nagsinggit sia, “Ginaluiban kita, Ocozias!” 24Ginkuha ni Jehu ang iya pana, kag sa iya bug-os nga kusog ginpana niya si Joram kag naigo sia sa likod kag naglapos ini sa iya tagipusoon. Natumba si Joram kag napatay sa iya karwahi, 25kag ginsingganan ni Jehu ang iya kabulig nga si Bidkar, “Kuhaa ang iya bangkay kag ihaboy sa uma ni Nabot. Dumdoma nga sang nagasakay kita nga nagasunod kay Acab nga amay ni Haring Joram, ang Ginoo naghambal sini nga mga pulong batok kay Acab: 26‘Nakita#1 Hari 21:19. ko ang pagpatay kay Nabot kag sang iya mga anak nga lalaki kahapon. Kag nagasaad ako nga silutan ko ikaw sa sini man nga uma.’” Nagsugo si Jehu sa iya kabulig, “Gani kuhaa ang bangkay ni Joram kag ihaboy sa uma nga iya ni Nabot, suno sa ginsiling sang Ginoo nga matabo.”
Si Haring Ocozias sang Juda Ginpatay
27Nakita ni Haring Ocozias ang natabo, gani nagpalagyo sia sa iya karwahi padulong sa banwa sang Bet-hagan, nga ginalagas ni Jehu. Si Jehu nagsugo sa iya mga tinawo, “Patya man ninyo sia!” Kag ginpilasan nila sia samtang nagapadalagan sia sang iya karwahi pataklad sa Gur, malapit sa banwa sang Ibleam. Pero nakapalagyo pa sia tubtob nakalambot sia sa siudad sang Megido sa diin napatay sia. 28Ang iya mga opisyales nagkuha sang iya bangkay kag gindala ini pabalik sa Jerusalem nga nakarga sa karwahi, kag ginlubong sia sa lulobngan sang mga hari sa Siudad ni David.
29Si Ocozias nanginhari sang Juda sa ika-11 nga tuig nga si Joram nga anak ni Acab amo ang hari sang Israel.
Si Jezebel nga Rayna Ginpatay
30Si Jehu nag-abot sa Jezreel. Si Jezebel nga nakabati sang natabo, nagpamutang sing kolor sa iya mata, nagpahinar sang iya buhok, kag nagpamintana sa palasyo sa pagtan-aw sa kalsada. 31Samtang nagapasulod si Jehu sa pwerta, nagsinggit si Jezebel, “Ikaw Zimri!#9:31 ZIMRI: Opisyal sang mga hangaway sang Israel nga nagpatay sang hari sang Israel (tan-awa ang 1 Hari 16:8-12). Ikaw nga manugpatay! Ngaa bala yari ka diri?”
32Si Jehu nagtangla kag nagsinggit, “Sin-o bala ang nagaapin sa akon?” May duha ukon tatlo ka mga opisyales sang palasyo nga naggawa sa bintana, 33kag si Jehu nagsiling sa ila, “Ihulog ninyo sia!” Ginhulog nila si Jezebel kag ang iya dugo nag-agsik sa pader kag sa mga kabayo. Ginpalakat ni Jehu ang iya kabayo kag ginpaagyan sang iya karwahi ang iya bangkay. 34Dayon nagsulod sia sa palasyo, kag nagkaon kag nag-inom. Pagkatapos niya himo sini, nagsiling sia, “Dalha ninyo inang ginpakamalaut nga babayi kag ilubong sia. Kon sa bagay, sia anak sang hari.” 35Pero ang mga tawo nga naggwa sa paglubong sa iya nakakita nga ang nabilin na lang amo ang iya bagol, kag ang mga tul-an sang iya mga kamot kag mga tiil. 36Sang#1 Hari 21:23. ginsugid nila ini kay Jehu, nagsiling si Jehu, “Amo ini ang ginsiling sang Ginoo nga matabo, sang sia naghambal paagi sa iya alagad nga si Elias: ‘Ang mga ido magakaon sang unod sang bangkay ni Jezebel sa kadutaan sang Jezreel. 37Ang iya lawas magalapta didto kaangay sang ipot, agod nga wala sing isa nga makakilala sa iya.’”
Currently Selected:
2 Mga Hari 9: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
