2 Mga Hari 17
17
Si Haring Oseas sang Israel
1Sa ika-12 nga tuig sang paggahom ni Haring Acaz sang Juda, si Oseas nga anak ni Ela nanginhari sang Israel, kag naggahom sia sa Samaria sa sulod sang siyam ka tuig. 2Nagpakasala sia batok sa Ginoo, pero indi pareho kalaut sang iban nga mga hari nga naggahom sa Israel una sa iya. 3Si Salmanasar nga hari sang Asiria nagpakig-away batok sa iya. Si Oseas nag-ampo sa iya kag nagbayad sa iya sing buhis tuigtuig. 4Pero isa sadto ka tuig si Oseas nagpadala sing mga mensahero sa kay Haring So sang Ehipto,#17:4 kay Haring So sang Ehipto: ukonhari sang Ehipto sa Sais. nga nagapangayo sing bulig, kag nag-untat sia sa pagbayad sing buhis sa Asiria. Sang pagkahibalo ni Salmanasar sini, ginpadakop niya si Oseas kag ginpabilanggo.
Ang Pagkapukan sang Samaria
5Dayon ginsalakay ni Salmanasar ang Israel, kag ginkibon ang Samaria. Sa ikatlo nga tuig sang pagkibon, 6nga amo ang ikasiyam nga tuig sang paggahom ni Oseas, ang hari sang Asiria#17:6 HARI SANG ASIRIA: Ayhan ini amo si Sargon II, ginbuslan niya si Salmanasar. nag-agaw sang Samaria, gindala ang mga Israelinhon sa Asiria subong mga bihag, kag ginpaestar ang iban sa ila sa siudad sang Hala, ang iban malapit sa Suba sang Habor, sakop sang Gozan kag ang iban sa mga siudad sang Media.
7Ang Samaria napukan tungod kay ang mga Israelinhon nagpakasala batok sa Ginoo nga ila Dios nga nagluwas sa ila sa hari sang Ehipto kag ginpagwa niya sila sa Ehipto. Nagsimba sila sa iban nga mga dios, 8nagsunod sila sa mga pagbinatasan sang mga tawo nga ginpagwa sang Ginoo samtang ang iya mga tawo nagapasulod sa duta, kag ginsunod nila ang mga pagbinatasan nga gintudlo sang mga hari sang Israel. 9Ang mga Israelinhon naghimo#17:9 naghimo: ukonnagsiling. sing mga butang nga wala maluyagi sang Ginoo nga ila Dios. Naghimo sila sang mga lugar sa diin ginasimba ang mga diosdios sa ila tanan nga mga banwa, halin sa pinakadiutay nga barangay tubtob sa pinakadaku nga siudad. 10Sa#1 Hari 14:23. tanan nga mga kabakuloran kag sa idalom sang tagsa ka magapa nga kahoy nagpatindog sila sang mga haligi nga bato, kag mga imahen sang diosa nga si Asera, 11kag nagsunog sila sing insyenso sa tanan nga mga altar sang mga diosdios, nga nagsunod sang ginahimo sang mga tawo nga gintabog paggwa sang Ginoo sa duta. Ginpaakig nila ang Ginoo tungod sang tanan nga ila ginhimo nga malaut, 12kag naglapas sang sugo sang Ginoo nga indi magsimba sa mga diosdios.
13Ang Ginoo nagpadala sang iya mga mensahero kag mga propeta sa pagpaandam sa Israel kag sa Juda nga nagasiling: “Bayai ang inyo malaut nga mga pagginawi kag tumana ang akon mga sugo nga yara sa Kasugoan nga ginhatag ko sa inyo mga katigulangan kag akon ginpaalinton sa inyo paagi sa akon mga alagad nga mga propeta.” 14Pero indi sila magtuman. Nagpatig-a sila kaangay sang ila mga katigulangan nga wala magsalig sa Ginoo nga ila Dios. 15Wala sila magtuman sa iya mga pagtudlo, wala sila magtuman sang kasugtanan nga iya ginhimo upod sa ila mga katigulangan, kag wala sila magpamati sang iya mga paandam. Nagsimba sila sa walay pulos nga mga diosdios kag sila man nanginwalay pulos, kag ginsunod nila ang mga pagbinatasan sang mga pungsod sa palibot, ang butang nga gindumili sa ila sang Ginoo. 16Ginlapas#1 Hari 12:28. nila ang tanan nga mga sugo sang Ginoo nga ila Dios kag naghimo sang duha ka toro nga mga baka nga metal agod simbahon. Naghimo man sila sing imahen sang diosa nga si Asera, nagsimba sa mga bituon, kag nag-alagad sa dios nga si Baal. 17Ginhalad#Deut. 18:10. nila ang ila mga anak nga lalaki kag babayi subong mga halad nga sinunog sa mga diosdios. Nagpamangkot sila sa mga espiritista kag sa mga manughimalad, kag gintugyan nila sing bug-os ang ila kaugalingon sa paghimo sing malaut sa panulok sang Ginoo kag ini nagpaakig sa Ginoo. 18Ang Ginoo naakig sa mga Israelinhon kag gintabog niya sila sa iya atubang, kag ang nabilin amo lamang ang ginharian sang Juda.
19Pero bisan ang mga tawo sang Juda wala magtuman sa mga sugo sang Ginoo nga ila Dios. Ginsunod nila ang mga pagginawi nga ginahimo sang mga tawo sang Israel. 20Ang Ginoo nagsikway sang tanan nga mga Israelinhon, nagsilot sa ila kag gintugyan sila sa ila mga kaaway nga mapintas, tubtob sa ulihi nga gintabog niya sila sa iya atubang.
21Sa tapos mapihak sang Ginoo ang Israel sa Juda, ang mga Israelinhon naghimo kay Jeroboam nga anak ni Nebat nga ila hari. Si Jeroboam amo ang nagtulod sa ila sa pagsikway sa Ginoo, kag gindala sila sa tama nga pagpakasala. 22Ginsunod nila si Jeroboam, kag nagpadayon sa paghimo sang tanan nga mga sala nga iya ginhimo, 23tubtob sa ulihi ang Ginoo nagtabog sa ila sa iya atubang, suno sa iya ginpaandam nga himuon paagi sa iya mga alagad nga mga propeta. Gani ang mga tawo sang Israel gindala subong bihag sa Asiria, sa diin nagaestar sila tubtob sini nga adlaw.
Ang mga Taga-Asiria Nag-estar sa Israel
24Ang hari sang Asiria nagdala sing mga tawo halin sa mga siudad sang Babilonia, Cuta, Iva, Hamat kag Sefarvaim kag ginpaestar sila sa mga siudad sang Samaria,#17:24 SAMARIA: Ang ngalan sining kapital nga siudad amo anay ang ginhingalan sa ginharian sang Israel. sa baylo sang mga Israelinhon nga ginbihag. Ginpanag-iyahan nila ini nga mga siudad kag nag-estar didto. 25Sang pagsugod nila estar didto, wala sila magsimba sa Ginoo, gani nagpadala sia sang mga leon, nga nagpamatay sang iban sa ila. 26Ang hari sang Asiria ginsugiran nga ang mga tawo nga ginpaestar niya sa mga siudad sang Samaria wala makahibalo sang kasugoan sang dios sa sina nga duta, kag gani ang dios nagpadala sang mga leon, nga nagpamatay sa ila. 27Gani ang hari nagmando: “Pabalika ang isa sang mga pari nga gindala naton subong bihag, pabalika sia#17:27 Ang iban nga dumaan nga mga pagbadbadsia; sa Hebreosila. kag paestara didto, kag tudloan ang mga tawo sang kasugoan sang dios sina nga duta.” 28Gani ang isa ka Israelinhon nga pari nga ginpagwa halin sa Samaria naglakat kag nag-estar sa Betel, sa diin nagtudlo sia sa mga tawo sa pagsimba sa Ginoo.
29Pero ang mga tawo nga nag-estar sa Samaria nagpadayon sa paghimo sang ila mga diosdios kag ginbutang nila ini sa mga altar nga ginpatindog sang mga Israelinhon. Ang tagsa ka lainlain nga grupo naghimo sang mga diosdios sa mga siudad sa diin nagaestar sila: 30ang mga tawo sang Babilonia naghimo sing mga imahen sang dios nga si Succot-benot; ang mga tawo sang Cuta naghimo sing mga imahen ni Nergal; ang mga tawo sang Hamat naghimo sing mga imahen ni Asima; 31ang mga tawo sang Iva naghimo sing mga imahen ni Nibhaz kag ni Tartac; kag ang mga tawo sang Sefarvaim nagdulot sang ila mga kabataan subong mga halad nga sinunog sa ila mga dios nga si Adramelec kag si Anamelec. 32Ini nga mga tawo nagsimba man sa Ginoo, kag nagpili gikan sa ila sang tanan nga sahi sang mga tawo sa pag-alagad subong mga pari sa mga lugar sa diin ginasimba ang mga diosdios kag sa pagdulot sing mga halad para sa ila didto. 33Gani nagsimba sila sa Ginoo, pero nagsimba man sila sa ila kaugalingon nga mga dios suno sa mga pagbinatasan sang mga pungsod sa diin sila naghalin.
34Ginahimo#Gen. 32:28; 35:10. nila sa gihapon ang ila daan nga mga pagbinatasan tubtob sini nga adlaw. Wala sila nagasimba sa Ginoo, ukon nagatuman sang mga kasugoan kag mga sugo nga iya ginhatag sa mga kaliwat ni Jacob, nga iya ginhingalanan Israel. 35Ang#Exo. 20:5; Deut. 5:9. Ginoo naghimo sing kasugtanan sa ila kag nagmando sa ila nga nagasiling: “Indi kamo magsimba sa iban nga mga dios. Indi kamo magyaub sa ila, ukon mag-alagad sa ila, ukon magdulot sang mga halad sa ila. 36Dapat#Deut. 6:13. kamo magsimba sa akon, ang Ginoo nga nagdala sa inyo paggwa sa Ehipto paagi sa daku nga gahom kag kusog. Kinahanglan magyaub kamo kag magdulot sing mga halad sa akon. 37Tumana ninyo sa gihapon ang mga kasugoan kag mga sugo nga akon ginsulat para sa inyo. Indi kamo magsimba sa iban nga mga dios, 38kag indi ninyo pagkalimtan ang kasugtanan nga ginhimo ko sa inyo. 39Magtuman kamo sa akon, ang Ginoo nga inyo Dios, kag luwason ko kamo sa inyo mga kaaway.” 40Pero yadto nga mga tawo indi magpamati, kag nagpadayon sila sa pagsunod sang ila daan nga mga pagbinatasan.
41Gani yadto nga mga tawo nagsimba sa Ginoo, pero nagsimba man sila sa ila mga diosdios kag ang ila mga kaliwat naghimo man sang amo nga mga butang tubtob sini nga adlaw.
Currently Selected:
2 Mga Hari 17: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
