2 Mga Taga-Corinto 6
6
1Gani, sa aton pagpangabudlay kaupod sa Dios, nagapakitluoy kami sa inyo nga indi ninyo pag-usikan ang kaayo sang Dios nga inyo nabaton. 2Pamatii#Isa. 49:8. ninyo ang ginasiling sang Dios:
“Ginpamatian ko ikaw sang nag-abot ang tion nga ipakita ko sa imo ang akon kaayo,
ginbuligan ko ikaw sang nag-abot ang adlaw nga ikaw luwason ko.”
Magpamati kamo! Amo ini ang tion sa pagbaton sang kaayo sang Ginoo, amo ini ang adlaw sang kaluwasan!
3Indi kami luyag nga ang bisan sin-o may isaway sa amon pag-alagad, gani wala kami nagasablag sa dalanon ni bisan sin-o. 4Sa baylo, sa tanan nga amon ginahimo, ginapakita namon nga mga alagad kami sang Dios, paagi sa amon pagbatas sang mga kahul-anan, mga kabudlayan, kag mga kasakitan nga may pagpailob. 5Nakaagi#Bin. 16:23. kami bunal, bilanggo, kag ginpulihan sang mga tawo. Nakaagi kami sing tama nga pagpangabudlay kag wala tulogtulog kag wala kaunkaon. 6Paagi sa kaputli, sa ihibalo, sa pagpaumod, sa kalulo, ginpakita namon nga mga alagad kami sang Dios—sa gahom sang Espiritu Santo, sa amon matuodtuod nga paghigugma, 7sa amon mensahe sang kamatuoran, kag sa gahom sang Dios. Ang amon pagkamatarong amo ang amon hinganiban sa pagsalakay sang amon kaaway kag sa pag-apin sang amon kaugalingon. 8Ginpasidunggan kami kag gintamay, ginpakahuy-an kag gindayaw. Ginkabig kami nga mga butigon, bisan pa nga nagahambal kami sang kamatuoran, 9nga wala makilal-i, pero kilala kami sang tanan, yara sa katalagman sang kamatayon, pero inyo gid makita nga kami nagakabuhi sa gihapon. Bisan ginsilutan kami, pero wala kami mapatay, 10ginpaantos kami, pero malipayon kami sa gihapon, daw imol kami, pero ginapamanggad namon ang madamo nga mga tawo, daw wala kami sing pagkabutang, pero sa pagkamatuod nagaangkon kami sang tanan.
11Hinigugma nga mga abyan sa Corinto! Wala sing lipudlipod ang amon paghambal sa inyo, kag ang amon tagipusoon bukas sa inyo. 12Wala kami nagkulang sang amon paghigugma sa inyo, kundi kamo ang nagkulang sang inyo paghigugma sa amon. 13Nagahambal ako karon subong nga daw mga kabataan ko kamo: ipakita sa amon ang amo man nga balatyagon nga amon ginabatyag para sa inyo. Ipakita ang inyo paghigugma sa amon.
Pagpaandam batok sa Pagpadaladala sa Di-tumoluo
14Indi kamo magtinguha sa pagpangabudlay kaupod sa mga di-tumoluo, kay indi ini mahimo. Kay ano ang pag-updanay sang matarong kag malaut? Ano bala ang pag-updanay sang kadudulman kag kapawa? 15Ano bala ang paghisugot ni Cristo kag sang Yawa? Ano bala ang paghisugot sang tumoluo kag di-tumoluo? 16Ano#1 Cor. 3:16; 6:19; Lev. 26:12; Ezeq. 37:27. bala ang pagsinanto sang templo sang Dios sa mga diosdios? Kay kita amo ang templo sang Dios nga buhi! Subong nga ang Dios gid nagsiling:
“Magaestar
kag magapakig-upod ako sa ila,
ako mangin-ila Dios,
kag sila mangin-akon mga katawhan.”
17Gani#Isa. 52:11. ang Ginoo nagasiling:
“Dapat kamo magbiya
kag magbulag sa ila.
Indi kamo magtandog sang mahigko,
kag pagabatunon ko kamo.
18Mangin-amay#2 Sam. 7:14; 1 Cron. 17:13; Isa. 43:6; Jer. 31:9. ninyo ako,
kag kamo mangin-akon mga anak nga lalaki kag babayi,
nagasiling ang Ginoo nga Makagagahom.”
Currently Selected:
2 Mga Taga-Corinto 6: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
