2 Mga Taga-Corinto 13
13
Katapusan nga mga Paandam kag mga Pag-abiabi
1Ikatlo#Deut. 17:6; 19:15. na ini nga pagkadto ko sa pagbisita sa inyo. Ang kasulatan nagasiling, “Ang bisan ano nga panumbongon dapat pamatud-an sang duha ukon tatlo ka mga saksi.” 2Luyag ko isiling sa inyo nga nakasala sang una, kag pati man sa tanan, nga ang ginsiling ko sadto anay sang ikaduha ko nga pagbisita sa inyo, ginasiling ko liwat, karon nga malayo ako sa inyo: sa akon pagkadto dira liwat wala gid sing may makalikaw sa akon silot. 3Himuon ko ini tungod kay luyag ninyo ang pagpamatuod nga si Cristo nagahambal paagi sa akon. Kon si Cristo maghambal sa inyo indi sia maluya, kundi nagapakita sia sang iya gahom sa inyo. 4Kay bisan nga sa kaluyahon ginlansang sia sa krus, sa gahom sang Dios nagakabuhi sia. Sa amon paghiusa sa iya kami man mga maluya, pero sa amon kaangtanan sa inyo, magakabuhi kami upod sa iya paagi sa gahom sang Dios.
5Usisaa ang inyo kaugalingon, agod mahibal-an ninyo kon bala nagakabuhi kamo sa pagtuo. Matuod gid nga kamo nakahibalo nga si Jesu-Cristo yara sa inyo, luas lang kon indi kamo makalampuwas sa pagtilaw. 6Karon nagalaom ako nga kamo nakahibalo nga kami gintilawan kag matuod nga mga apostoles. 7Nagapangamuyo kami sa Dios nga indi kamo maghimo sing malaut—indi agod sa pagpakita nga nagmadinalag-on kami, kundi nga maghimo kamo sing husto, bisan nga kami kasubong sang napaslawan nga mga apostoles. 8Kay indi kami makahimo sing bisan ano nga batok sa kamatuoran, kundi suno lamang sa kamatuoran. 9Nagakalipay kami kon kami maluya pero kamo mabakod. Amo gani ina nga nagapangamuyo man kami nga manginhimpit kamo. 10Kag amo ina nga nagasulat ako sini samtang malayo ako sa inyo, agod nga kon mag-abot ako dira indi kinahanglan nga magmapintas ako sa akon paggamit sang awtoridad nga ginhatag sa akon sang Ginoo. Ini nga awtoridad para sa pagpalig-on kag indi sa pagguba sa inyo.
11Sa katapusan, mga kautoran, paalam na! Magtinguha kamo nga manginhimpit. Magpamati kamo sa akon laygay. Maghilisugot kamo kag magkabuhi sa paghidait. Kag ang Dios sang paghigugma kag paghidait manginkaupod ninyo.
12Mag-abiabihay kamo subong mga mag-ulotod kay Cristo.
Ang tanan nga mga tumoluo nagapadala sang ila mga pag-abiabi sa inyo.
13Ang pagpakamaayo ni Ginoong Jesu-Cristo, ang gugma sang Dios kag ang pagpakig-ambit sang Espiritu Santo manginyara sa inyo tanan.
Currently Selected:
2 Mga Taga-Corinto 13: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
