1 Timoteo 1
1
1Ako si Pablo nga isa ka apostol ni Cristo Jesus suno sa sugo sang Dios nga aton Manluluwas kag ni Cristo Jesus nga nagahatag sa aton sang paglaom.
2Ginasulat#Bin. 16:1. ko ini sa imo Timoteo, ang akon matuod nga anak sa pagtuo:
Kabay nga ang Dios nga Amay kag si Cristo Jesus nga aton Ginoo maghatag sa imo sing pagpakamaayo, kaluoy kag paghidait.
Mga Paandam batok sa Indi Matuod nga Pagtulon-an
3Luyag ko nga magpabilin ka sa Efeso suno sa ginpangabay ko gid sa imo, sang nagapakadto ako sa Macedonia. May mga tawo didto nga nagapanudlo sang indi matuod nga mga pagtulon-an, kag dapat mo sila manduan nga mag-untat. 4Singgani sila nga untatan nila inang mga patupato nga sugilanon, kag ang malawig nga mga lista sang ila mga katigulangan. Kay ini nagatuga lamang sang mga pagsinuay, kag wala sing kaangtanan sa plano sang Dios para sa aton, nga aton mahibaluan paagi sa pagtuo. 5Ang tinutuyo sini nga sugo amo ang pagpukaw sang gugma nga nagahalin sa putli nga tagipusoon, sa matinlo nga konsensya kag matuodtuod nga pagtuo. 6May mga tawo nga nagbiya na sa sini, kag nagtalang sa ila dalanon tungod sang wala pulos nga mga pagsinuay. 7Luyag sila nga manginmanunodlo sang kasugoan sang Dios, pero wala gani nila mahangpi ang ila nga ginahambal ukon ang ila ginatudlo nga may daku nga pagsalig.
8Nakahibalo kita nga ang Kasugoan maayo, kon ginagamit ini sing nagakaigo. 9Dapat naton dumdomon nga ang mga kasugoan wala ginhimo para sa maayo nga mga tawo, kundi para sa mga malinapason kag mga kriminal, para sa mga wala nagatuman sa Dios kag mga makasasala, para sa mga di-diosnon kag di-espirituhanon, para sa mga tawo nga nagapamatay sang ila mga amay ukon iloy, para sa iban nga mga manugpatay, 10para sa mga makihilawason, para sa mga nagapakighilawas sa ila pareho nga lalaki ukon pareho nga babayi, para sa mga nagapangkidnap, para sa mga butigon kag nagapanaksi sang indi matuod, ukon sa mga nagahimo sang bisan ano nga batok sa matuod nga pagtulon-an. 11Ini nga pagtulon-an suno sa Maayong Balita nga gintugyan sa akon nga iwali, ang Maayong Balita halin sa halangdon kag dalayawon nga Dios.
Ang Pagpasalamat tungod sang Kaluoy sang Dios
12Nagapasalamat ako kay Cristo Jesus nga aton Ginoo, nga naghatag sa akon sing kusog sa pagpangabudlay. Nagapasalamat ako sa iya, kay iya ako ginkabig nga takos kag iya ako ginpili sa pag-alagad sa iya, 13bisan#Bin. 8:3; 9:4-5. pa nga sang una ginpakamalaut, ginhingabot kag ginpakahuy-an ko sia. Pero ang Dios nagkaluoy sa akon, tungod kay wala pa ako sadto nagatuo kay Jesu-Cristo kag gani wala ako makahibalo sang akon ginahimo. 14Kag ang aton Ginoo nanginmaayo gid sa akon kag iya ako ginhatagan sing pagtuo kag gugma nga nangin-aton sa aton paghiusa kay Cristo Jesus. 15Matuod ini nga mga pulong nga dapat naton batunon sing bug-os kag tuohan: si Cristo Jesus nag-abot sa kalibutan sa pagluwas sang mga makasasala, kag ako gid ang labing malaut sa ila tanan. 16Pero tungod gid sini ang Dios nagkaluoy sa akon, agod nga mapahayag ni Cristo Jesus ang iya bug-os nga pagpailob sa akon, ako nga labing malaut sa mga makasasala, sa paghimo sa akon nga sulondan sa mga magatuo sa iya sa ulihi kag magabaton sang kabuhi nga wala sing katapusan. 17Sa Hari nga wala sing katapusan, di-mamalatyon kag di-makita, ang isa lamang ka Dios, sa iya ang kadungganan kag kadayawan sa wala sing katubtoban! Kabay pa.
18Timoteo, anak ko, ginatugyan ko sa imo ini nga sugo suno sa mga pulong nga gintagna sang una sang mga propeta#1:18 MGA PROPETA: Ayhan Cristohanon nga mga propeta nga ginatumod sa 4:14. nahanungod sa imo. Gamita yadtong mga pulong subong imo mga hinganiban sa pagpakig-away sing maayo. 19Tipigi ang imo pagtuo kag matinlo nga konsensya. Ang iban nga mga tawo wala magpamati sa ila konsensya, gani napaslawan sila sing bug-os sa ila Cristohanon nga pagtuo. 20Ang iban sini sa ila amo sanday Himeneo kag Alejandro nga akon ginsilutan paagi sa pagtugyan sa gahom ni Satanas, agod matudloan sila sa pag-untat sang ila pagpakamalaut sa Dios.
Currently Selected:
1 Timoteo 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
