1 Samuel 27
27
Si David sa Tunga sang mga Filistinhon
1Si David nagsiling sa iya kaugalingon, “Sa pila ka adlaw si Saul magapatay sa akon. Maayo pa nga magpalagyo ako sa Filistia. Dayon si Saul magauntat sa pagpangita sa akon sa Israel kag wala na ako sing katalagman.” 2Gani si David kag ang iya 600 ka mga tinawo nagkadto gilayon kay Akis nga anak ni Maok nga hari sang Gat. 3Si David kag ang iya mga tinawo nag-estar sa Gat upod ang ila mga panimalay. Si David may duha ka mga asawa: si Ahinoam nga taga-Jezreel, kag si Abigail nga taga-Carmel, nga asawa anay ni Nabal. 4Sang pagkabati ni Saul nga si David nagpalagyo sa Gat, nag-untat sia sa pagpangita sa iya.
5Si David nagsiling kay Akis, “Kon abyan mo ako hatagi ako sing isa ka diutay nga banwa nga akon pagaestaran. Indi na kinahanglan nga mag-estar ako upod sa imo sa siudad sang hari.” 6Gani ginhatag ni Akis sa iya ang banwa sang Ziklag, kag sa sini nga kabangdanan ang Ziklag nangin-iya sang mga hari sang Juda halin sadto. 7Si David nag-estar sa Filistia sa sulod sang desi-sais ka bulan.
8Si David kag ang iya mga tinawo sa masunson nagasalakay sang mga Gesurnon, sang mga Girsinhon, kag sang mga Amaleknon, nga nag-estar sa amo nga lugar sa madugay na nga tion. Iya ginasalakay ang ila duta pakadto sa Sur tubtob sa Ehipto. 9Ginapamatay niya ang tanan nga mga lalaki kag mga babayi, kag ginapanguha ang ila mga karnero, mga baka, mga asno, mga kamelyo, kag bisan pa ang ila mga bayu. Dayon nagabalik sia kay Akis, 10nga nagapamangkot sa iya, kon diin sia nagsalakay sina nga adlaw. Dayon si David nagasiling sa iya nga sia nakalambot tubtob sa bagatnan nga bahin sang Juda, ukon sa kadutaan sang tribo ni Jerameel, ukon sa kadutaan sa diin nagaestar ang mga Kenhanon. 11Ginapamatay ni David ang tanan nga mga lalaki kag mga babayi, agod wala sing isa nga makabalik sa Gat sa pagpanugid kon ano ang iya nahimo kag sang iya mga tinawo. Amo ini ang ginhimo ni David sa bug-os nga panahon nga nag-estar sia sa Filistia. 12Pero si Akis nagsalig gid kay David, kag nagsiling sa iya kaugalingon, “Ginakontra gid sia sang iya kaugalingon nga mga tawo nga Israelinhon sa bagay nga magapadayon sia sa pag-alagad sa akon sa iya bug-os nga kabuhi.”
Currently Selected:
1 Samuel 27: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
