1 Samuel 25
25
Ang Pagkapatay ni Samuel
1Napatay si Samuel, kag ang tanan nga mga Israelinhon nagtipon kag naglalaw sa iya. Dayon ginlubong nila sia sa iya ginaestaran sa Rama.
Si David kag si Abigail
Pagkatapos sini, si David nagsaylo sang iya kampo sa desierto sang Paran. 2-3May isa ka tawo sa kabarangayan ni Caleb nga ginahingalanan kay Nabal, nga taga-Maon, nga ang iya mga pagkabutang didto sa banwa sang Carmel. Manggaranon sia kaayo: may 3,000 sia ka mga karnero kag 1,000 ka mga kanding. Ang ngalan sang iya asawa amo si Abigail. Matahom sia kag maalam, pero ang iya bana masakit maghambal kag malain sing batasan.
Si Nabal nagapanggunting sang iya mga karnero sa Carmel. 4Si David didto sa desierto kag nakabati nahanungod sini, 5gani nagpadala sia sing napulo ka mga pamatan-on nga lalaki nga iya ginsugo sa pagkadto sa Carmel, sa pagpangita kay Nabal, kag sa pagpangamusta sa iya. 6Nagsiling sia sa ila nga singganon si Nabal: “Si David nagapangamusta sa imo, kag nagapanginbulahan sa imo, sa imo panimalay, kag sang tanan nga yara sa imo. 7Nakabati sia nga nagapanggunting ka sang imo mga karnero, kag luyag niya mahibaluan mo nga ang nagabantay sang imo mga karnero nanginkaupod namon kag wala namon sila pag-anha. Wala gid sing may nadula sa ila mga sapat sang tion nga didto sila sa Carmel. 8Pamangkuta sila, kag magasugid sila sa imo. Nagapangabay si David nga tratahon mo sing maayo ang iya mga tawo kay nagakadto kami diri sa adlaw sang piesta. Gani kon mahimo, ang bisan ano nga sarang mo mahatag ihatag sa amon nga imo mga alagad, kag sa imo mahal nga abyan nga si David.”
9Gindala sang mga tawo ni David ini nga mensahe kay Nabal sa ngalan ni David. Dayon naghulat sila didto, 10kag sang ulihi si Nabal nagsabat sa ila, “Si David? Sin-o bala sia? Wala gid ako makabati sa iya! Karon nga mga inadlaw may madamo nga mga ulipon sa sini nga pungsod nga nagpalagyo sa ila agalon! 11Indi ko pag-ihatag ang akon kalan-on kag tubig, kag ang mga sapat nga akon gin-ihaw para sa akon manuggunting sang karnero, sa mga tawo nga wala ko mahibaloi kon diin maghalin!”
12Nagbalik ang mga tinawo ni David sa iya kag ginsugiran sia sang ginsiling ni Nabal. 13Nagmando si David, “Itaklos ang inyo mga espada!” Kag gintuman nila tanan. Nagtaklos man sia sang iya espada kag naglakat upod sang mga 400 sang iya mga tinawo, samtang ang 200 nagpabilin sa pagbantay sang mga kargamento.
14Ang isa sang mga suloguon ni Nabal nagsiling sa iya asawa nga si Abigail, “Nakahibalo ka bala nga si David nagpadala sing mga mensahero halin sa desierto sa pagpangamusta sa amon agalon, pero gin-insultohan niya sila? 15Ini nga mga tawo maayo gid sa amon. Wala gid sila maggamo sa amon, kag sa tanan nga tion nga kami kaupod nila sa uma wala gid sing bisan ano nga butang nga nadula sa amon. 16Gin-apinan nila kami sa adlaw kag sa gab-i sa bug-os nga tion sang kami kaupod nila nga nagabantay sang amon mga kasapatan. 17Karon panghunahuna ka kon ano ang maayo nga himuon. Makatalagam ini para sa amon agalon kag sa bug-os niya nga panimalay. Mabudlay sia intiendihon kag indi sia magpamati sa bisan kay sin-o!”
18Sa gilayon nagkuha si Abigail sing 200 ka bilog nga tinapay, duha ka mga sulodlan nga panit nga puno sing bino, lima ka litson nga mga karnero, isa ka sako nga sinanlag nga trigo, 100 ka pungpong nga ubas nga binulad, 200 ka bilog nga tinapay nga nahimo sa binulad nga higos, kag ginkarga niya ini sa mga asno. 19Dayon nagsiling sia sa iya mga suloguon, “Lakat kamo sing una kag masunod ako sa inyo.” Pero wala niya ginpahibalo ang iya bana.
20Samtang nagasakay sia sa iya asno nga nagaliko sa likuan sang bakulod sa gilayon nasugata niya si David kag ang iya mga tinawo nga nagapadulong sa iya. 21Bag-o gid lang si David nagpanghunahuna sa iya kaugalingon, “Ngaa nga ginbantayan ko pa ang mga pagkabutang sini nga tawo diri sa desierto? Wala sing isa nga nadula sang iya mga pagkabutang, kag amo pa ini ang iya balos sa akon sang bulig nga akon ginhatag sa iya! 22Kabay nga patyon ako#25:22 Ang isa ka dumaan nga pagbadbadako; sa Hebreoang akon mga kaaway. sang Dios kon indi ko mapatay ang iya tanan nga mga tinawo sa wala pa magbutlak ang adlaw!”
23Sang makita ni Abigail si David, sa gilayon nagpanaog sia sa iya asno kag magsaludo 24sa tiilan ni David kag nagsiling sa iya, “Kon mahimo pamatii ako! Ako lang ang basula. 25Kon mahimo indi pagsapaka inang wala sing pulos nga si Nabal! Bagay gid sia sa iya ngalan nga nagakahulogan, buangbuang!#25:25 BUANGBUANG: Amo ini ang kahulogan sang Hebreo nga ngalan nga Nabal. Wala ko makita ang mga suloguon nga imo ginpadala. 26Ang Ginoo amo ang nagpugong sa imo gikan sa pagtimalos kag sa pagpamatay sang imo mga kaaway. Kag karon nagasumpa ako sa imo sa buhi nga Ginoo nga ang imo mga kaaway kag ang tanan nga luyag maghalit sa imo pagasilutan subong kay Nabal. 27Kon mahimo, batuna ining akon mga regalo nga gindala sa imo kag ihatag ini sa imo mga tinawo. 28Kon mahimo patawara ako sang akon mga kakulangan. Ang Ginoo magahimo sa imo nga hari, kag subong man ang imo mga kaliwat tungod kay nagapakig-away ka para sa iya, kag indi ka maghimo sing malaut#25:28 indi ka maghimo sing malaut: ukonwala sing malaut nga matabo sa imo. samtang ikaw nagakabuhi. 29Kon may magsalakay sa imo kag magtinguha sa pagpatay sa imo, ang Ginoo nga imo Dios magaluwas sa imo, subong sang isa ka tawo nga nagatipig sang malahalon nga pagkabutang. Pero kon nahanungod sa imo mga kaaway, ipanghaboy niya sila sa malayo, subong sang paglabyog sang isa ka tawo sang bato. 30Kag kon matuman sang Ginoo ang tanan nga maayo nga mga butang nga iya ginsaad sa imo, kag maghimo sa imo nga hari sang Israel, 31dayon indi ka magbasol sang imo kaugalingon ukon maghinulsol tungod sa pagpatay nga wala sing kabangdanan ukon sa pagtimalos. Kag kon ang Ginoo maghatag sa imo sing kaayuhan, kon mahimo indi ako pagkalimti.”
32Nagsiling si David sa iya, “Dayawon ang Ginoo, ang Dios sang Israel, nga nagpadala sa imo karon nga adlaw sa pagpakigkita sa akon! 33Salamat sa Dios tungod sang imo pagkamahinangpanon kag sang imo ginhimo karon nga adlaw sa pagpugong sa akon sa pagpakasala paagi sa pagpatay kag pagtimalos. 34Ang Ginoo ang nagpugong sa akon sa paghimo sing malaut sa imo. Kag kon wala ikaw magdalidali sa pag-abot kag sa pagpakigkita sa akon, nagasumpa ako sa buhi nga Dios sang Israel, nga sa pagbutlak sang adlaw wala sing may mabilin sa mga tawo ni Nabal!” 35Dayon ginbaton ni David ang gindala ni Abigail sa iya nga mga regalo kag nagsiling sa iya, “Pauli ka kag indi na magpalibog. Himuon ko ang imo luyag.”
36Si Abigail nagbalik kay Nabal, nga yara sa iya balay nga nagahiwat sing punsyon nga daw iya sang hari. Hubog sia kag masinadyahon, gani wala sia pagsugiri ni Abigail tubtob sa madason nga aga. 37Dayon sang naumpawan sia, ginsugiran sia ni Abigail sang tanan. Gin-atake sia sa korason kag indi na sia makahulag. 38Sang makaligad pa gid ang napulo ka adlaw ginpagrabe sang Ginoo si Nabal kag napatay sia.
39Sang pagkabati ni David nga napatay si Nabal, nagsiling sia, “Dayawon ang Ginoo! Sia ang nagtimalos kay Nabal tungod sang iya pag-insulto sa akon, kag nagpugong sa akon nga iya alagad sa paghimo sing malain. Ang Ginoo nagsilot kay Nabal tungod sang iya malaut nga hinimuan.”
Dayon nagpasugo si David kay Abigail nga pangasaw-on niya sia. 40Ang iya mga suloguon nagkadto kay Abigail sa Carmel kag nagsiling sa iya, “Si David nagpadala sa amon sa pagkuha sa imo nga mangin-asawa niya.”
41Si Abigail nagluhod kag nagsiling, “Ako alagad niya, kag handa sa paghinaw sang mga tiil sang iya mga suloguon.” 42Nagdalidali sia sa pagtindog kag nagsakay sa iya asno upod sa lima ka mga babayi nga nagaalagad sa iya. Nag-upod sia sa mga suloguon ni David kag nangin-asawa sia ni David.
43Ginpangasawa ni David si Ahinoam sang Jezreel, kag karon iya man ginpangasawa si Abigail. 44Sa#2 Sam. 3:14-16. pihak nga bahin ginhatag ni Saul si Mikal, anak niya nga babayi nga asawa anay ni David, kay Palti, anak ni Lais nga taga-Galim.
Currently Selected:
1 Samuel 25: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
