1 Mga Hari 16
16
1Ang Ginoo naghambal kay Jehu nga propeta nga anak ni Hanani, kag ginhatag niya ini nga mensahe para kay Baasa: 2“Walawala gid ikaw pero ginhimo ko ikaw nga pangulo sang akon mga tawo nga Israelinhon. Kag karon nagpakasala ka, kaangay kay Jeroboam, kag gindala ang akon mga tawo sa pagpakasala. Ang ila mga sala nagpaakig sa akon, 3gani tapuson ko ikaw kag ang imo panimalay, subong sang ginhimo ko kay Jeroboam. 4Ang bisan sin-o nga katapo sang imo panimalay nga mapatay sa siudad pagakaunon sang mga ido, kag ang bisan sin-o nga mapatay sa wayang pagakaunon sang mga uwak.”
5Ang tanan nga ginhimo ni Baasa, kag ang tanan niya nga maisog nga mga binuhatan nasulat sa Maragtas sang mga Hari sang Israel. 6Si Baasa napatay kag ginlubong sa Tirsa, kag ang iya anak nga si Ela nagbulos sa iya subong nga hari.
7Ang mensahe sang Ginoo batok kay Baasa kag sa iya panimalay ginhatag ni Jehu nga propeta tungod sang mga sala nga nahimo ni Baasa batok sa Ginoo. Ginpaakig niya ang Ginoo indi lamang sang kalautan nga iya ginhimo, pareho sang ginhimo ni Haring Jeroboam nga una sa iya, kundi tungod man kay ginpatay niya ang bug-os nga panimalay ni Jeroboam.
Si Haring Ela sang Israel
8Sa ika-26 nga tuig sang paghari ni Haring Asa sa Juda, si Ela nga anak ni Baasa nanginhari sang Israel, kag naggahom sia sa Tirsa sing duha ka tuig. 9Si Zimri nga isa sang iya mga opisyales nga amo ang nagadumala sang katunga sang mga karwahi sang hari nagplano batok sa iya. Isa ka adlaw ang hari nagapahuboghubog sa Tirsa, sa balay ni Arsa nga amo ang nagadumala sang palasyo. 10Si Zimri nagsulod sa balay, ginpatay si Ela, kag gintal-usan niya sia subong nga hari. Natabo ini sang ika-27 nga tuig sang paggahom ni Haring Asa sang Juda.
11Sang paghari ni Zimri ginpatay niya ang tanan nga mga katapo sang panimalay ni Baasa. Ang tanan niya nga mga pariente nga lalaki kag mga amigo iya ginpamatay. 12Gani, suno sa ginsiling sang Ginoo batok kay Baasa paagi kay Jehu nga propeta, ginpamatay ni Zimri ang bug-os nga panimalay ni Baasa. 13Ginpaakig ni Baasa kag sang iya anak nga si Ela ang Ginoo, ang Dios sang Israel, tungod sang ila pagsimba sa mga diosdios kag tungod sang ila pagdala sa Israel sa pagpakasala. 14Ang tanan nga ginhimo ni Ela nasulat sa Maragtas sang mga Hari sang Israel.
Si Haring Zimri sang Israel
15Sa ika-27 nga tuig sang paggahom ni Haring Asa sang Juda, si Zimri naggahom sa Tirsa sa bug-os nga Israel sa sulod sang pito ka adlaw. Ang mga Israelinhon nga mga hangaway nagkibon sang siudad sang Gibeton sa Filistia, 16kag sang pagkabati nila nga si Zimri nagplano batok sa hari nga si Ela kag ginpatay niya sia, dayon si Omri nga pangulo sang ila mga hangaway ila ginhimo nga hari sang Israel. 17Si Omri kag ang iya mga hangaway naghalin sa Gibeton kag nagkadto sa pagkibon sang Tirsa. 18Sang pagkakita ni Zimri nga ang siudad naagaw na, nagkadto sia sa nasulod nga pamakod sang palasyo, kag gintutdan niya ang palasyo. Dayon napatay sia sa dabdab sang kalayo. 19Natabo ini tungod sang iya mga sala sa Ginoo. Pareho kay Jeroboam nga una sa iya ginpalain man niya ang buot sang Ginoo tungod sang iya mga sala kag sa iya pagdala sa Israel sa pagpakasala. 20Ang tanan nga ginhimo ni Zimri, lakip ang iya paghimbon, nasulat sa Maragtas sang mga Hari sang Israel.
Si Haring Omri sang Israel
21Ang mga tawo sang Israel wala mag-isa: ang iban sa ila luyag maghimo nga hari kay Tibni nga anak ni Ginat, kag ang iban luyag kay Omri. 22Sang ulihi ang luyag kay Omri nagdaog, si Tibni napatay kag si Omri nanginhari. 23Gani sa ika-31 nga tuig sang paggahom ni Haring Asa sang Juda, si Omri nanginhari sang Israel, kag naggahom sia sa sulod sang dose ka tuig. Sa nahauna nga anom ka tuig naggahom sia sa Tirsa, 24kag dayon ginbakal niya ang bakulod sang Samaria sing 6,000 ka bilog nga pilak sa tawo nga ginhingalanan kay Semer. Si Omri nagbutang sing pamakod sa bakulod, nagpatindog sia sing banwa didto, kag ginhingalanan ini Samaria suno sa ngalan nga Semer nga amo ang tag-iya anay sang bakulod.
25Si Omri nagpakasala sa Ginoo sing labi pa sang sa ila nga nahauna sa iya. 26Pareho kay Jeroboam nga nahauna sa iya, ginpaakig niya ang Ginoo, ang Dios sang Israel, sa iya pagpakasala kag sa pagdala sa mga tawo sa pagpakasala kag sa pagsimba sa mga diosdios. 27Ang tanan nga ginhimo ni Omri, kag ang tanan niya nga maisog nga mga binuhatan nasulat sa Maragtas sang mga Hari sang Israel. 28Si Omri napatay kag ginlubong sa Samaria, kag ang iya anak nga si Acab nagbulos sa iya subong nga hari.
Si Haring Acab sang Israel
29Sa ika-38 nga tuig sang paggahom ni Haring Asa sa Juda, si Acab nga anak ni Omri nanginhari sang Israel, kag naggahom sia sa Samaria sing baynte dos ka tuig. 30Nagpakasala sia sa Ginoo labaw pa sang sa ila nga nahauna sa iya. 31Kulang pa para sa iya ang pagpakasala pareho kay Haring Jeroboam; sobra pa ang iya ginhimo kag ginpangasawa niya si Jezebel, ang bata ni Haring Etbaal sang Sidon kag ginsimba niya si Baal. 32Nagpatindog si Acab sing templo sa Samaria para kay Baal, naghimo sia sing altar para sa iya kag ginbutang ini sa templo. 33Nagpatindog man sia sing imahen sang diosa nga si Asera. Naghimo sia sing labaw pa sang sa tanan nga mga hari sang Israel nga nahauna sa iya sa pagpaakig sa Ginoo, ang Dios sang Israel. 34Sa#Jos. 6:26. tion sang iya paggahom si Hiel nga taga-Betel nagpatindog liwat sang Jerico. Suno sa mensahe sang Ginoo paagi kay Josue nga anak ni Nun, napatay ang kamagulangan nga anak ni Hiel nga si Abiram sang pagpatindog niya sang sadsaran sang Jerico, kag napatay ang iya kamanghuran nga anak nga si Segub sang pag-obra niya sang mga pwerta.
Currently Selected:
1 Mga Hari 16: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
