1 Mga Hari 13
13
1Sa mando sang Ginoo, ang isa ka propeta halin sa Juda nagkadto sa Betel kag nag-abot didto samtang si Jeroboam nagtindog sa altar sa pagdulot sing halad. 2Ang propeta nga nagtuman sang sugo sang Ginoo nagpakamalaut sang altar sa sini nga mga pulong: “O altar, altar, amo ini ang ginasiling sang Ginoo: Ang isa ka bata nga ang iya ngalan si Josias matawo sa panimalay ni David. Pamatyon niya sa imo ang mga pari nga nagaalagad sa mga altar sang mga diosdios nga nagadulot sing mga halad sa imo, kag magasunog sia sing mga tul-an sang mga tawo sa imo.” 3Kag ang propeta nagpadayon sa pagsiling, “Ini nga altar magabuloblag, kag ang abo sa ibabaw sini magalalapta. Dayon makilala ninyo nga ang Ginoo naghambal paagi sa akon.”
4Sang pagkabati sini ni Haring Jeroboam, gintudlo niya sia kag nagmando, “Dakpa ina nga tawo!” Sa gilayon nagkalamatay ang mga ugat sa butkon sang hari kag indi na niya mahulag ini. 5Sa hinali ang altar nagbuloblag kag ang abo naglalapta sa duta, subong sang gintagna sang propeta sa ngalan sang Ginoo. 6Si Haring Jeroboam nagsiling sa propeta, “Kon mahimo magpangamuyo ka para sa akon sa Ginoo nga imo Dios, kag pangabaya sia sa pag-ayo sang akon butkon!”
Ang propeta nagpangamuyo sa Ginoo, kag ang butkon sang hari nag-ayo. 7Dayon ang hari nagsiling sa propeta, “Upod ka sa akon sa balay kag magkaon didto. Hatagan ko ikaw sing padya tungod sang imo nahimo.”
8Ang propeta nagsabat, “Bisan ihatag mo sa akon ang katunga sang imo manggad, indi ako mag-upod sa imo, ukon magkaon ukon mag-inom sang bisan ano upod sa imo. 9Ang Ginoo nagsugo sa akon nga indi ako magkaon ukon mag-inom sang bisan ano, kag indi ako mag-agi sa akon pagpauli sa alagyan nga akon gin-agyan sang akon pag-abot. 10Gani sa iya pagpauli wala sia mag-agi sa dalan nga iya gin-agyan sang iya pag-abot, kundi nag-agi sia sa lain nga dalan.
Ang Tigulang nga Propeta sang Betel
11Karon may isa ka tigulang nga propeta nga nagaestar sa Betel sa sadto nga tion. Ang iya mga anak nga lalaki#13:11 Ang iban nga dumaan nga mga pagbadbadmga anak nga lalaki; sa Hebreoanak nga lalaki. nagkadto sa iya kag ginsugiran sia kon ano ang ginhimo sa Betel sang propeta halin sa Juda sadto nga adlaw, kag kon ano ang ginsiling niya kay Haring Jeroboam. 12Ang tigulang nga propeta nagpamangkot sa ila, “Diin sia mag-agi sang paglakat niya?” Gintudlo nila#13:12 Ang iban nga dumaan nga mga pagbadbadGintudlo nila; sa HebreoNakita nila. kon diin nga dalan 13kag ginsingganan niya sila nga hampiluan ang asno para sa iya. Gintuman nila ini kag nagsakay sia sa sini. 14Nag-agi sia sa dalan nga gin-agyan sang propeta halin sa Juda, kag nakita niya sia nga nagapungko sa idalom sang kahoy nga terebinto. Ginpamangkot niya sia, “Ikaw bala ang propeta halin sa Juda?”
Nagsabat ang tawo, “Huo”.
15Nagsiling sia, “Upod ka sa balay kag magkaon.”
16Pero ang propeta halin sa Juda nagsabat, “Indi ako makaupod sa imo balay ukon makabaton sa imo pangagda. Indi ako magkaon ukon mag-inom sang bisan ano upod sa inyo diri, 17tungod kay ang Ginoo nagsugo sa akon nga indi magkaon ukon mag-inom sang bisan ano, kag indi ako mag-agi sa akon pagpauli sa alagyan nga akon gin-agyan sang akon pag-abot.”
18Dayon ang tigulang nga propeta halin sa Betel nagsiling sa iya, “Ako propeta man, pareho sa imo, kag sa sugo sang Ginoo ang isa ka anghel nagsiling sa akon nga dalhon ko ikaw sa balay kag amumahon ko ikaw.” Pero ang tigulang nga propeta nagbutig.
19Gani ang propeta halin sa Juda nag-upod sa balay sang tigulang nga propeta kag nagkaon upod sa iya. 20Sang nagapungko sila sa lamisa, ang pulong sang Ginoo nag-abot sa tigulang nga propeta, 21kag nagsiling sia sa propeta halin sa Juda, “Ang Ginoo nagasiling, ‘Tungod kay ikaw naglapas sa akon kag wala mo gintuman ang akon ginsugo sa imo, 22kundi nagbalik ka kag nagkaon sa lugar nga akon ginsiling nga indi ka dira magkaon, pagapatyon ikaw kag ang imo lawas indi pag-ilubong sa lulobngan sang imo panimalay.’”
23Sa tapos sila makakaon, ginhampiluan sang tigulang nga propeta ang asno para sa propeta halin sa Juda. 24Ginsakyan niya ini kag naglakat. Sa dalanon ang isa ka leon nagbangga sa iya kag ginpatay sia. Ang iya bangkay nagahamyang sa dalan, kag ang asno kag ang leon nagatindog sa tupad sini. 25May mga tawo nga nag-agi kag nakita nila ang bangkay sa dalan, kag ang leon nagatindog sa tupad sini. Nagkadto sila sa Betel kag ginsugid nila ang ila nakita.
26Sang pagkabati sang tigulang nga propeta nahanungod sini nagsiling sia, “Amo ina nga propeta ang naglapas sang sugo sang Ginoo. Gani ang Ginoo nagpadala sing leon sa pagsalakay kag pagpatay sa iya, suno sa ginsiling sang Ginoo!” 27Dayon nagsiling sia sa iya mga anak nga lalaki, “Hampiloi ninyo ang akon asno.” Gintuman nila ini, 28kag naglakat sia nga nagasakay sa asno kag nakita niya ang bangkay sang propeta nga nagahamyang sa dalan. Ang asno kag ang leon nagatindog pa sa tupad sini. Ang leon wala magkaon sang lawas kag wala man ini magsalakay sang asno. 29Ginkuha sang tigulang nga propeta ang lawas, gintungtong ini sa asno kag gindala pabalik sa Betel, sa paglalaw kag sa paglubong sini. 30Ginlubong niya ini sa lulobngan sang iya kaugalingon nga panimalay, kag sia kag ang iya mga anak nga lalaki naglalaw sini nga nagasiling, “O utod ko, utod ko!” 31Sa tapos ang lubong, ang propeta nagsiling sa iya mga anak nga lalaki, “Kon mapatay ako, ilubong ako sa sini nga lulobngan, kag ibutang ang akon lawas sa tupad niya. 32Ang mga pulong nga iya ginhambal sa sugo sang Ginoo batok sa altar sa Betel kag batok sa tanan nga mga lugar nga ginasimbahan sa mga banwa sang Samaria matuman gid.”
Ang Daku nga Sala ni Jeroboam
33Si Haring Jeroboam sang Israel wala pa gihapon magtalikod halin sa iya malaut nga mga pagginawi, kundi nagpadayon sia sa pagpili sang mga pari halin sa bisan ano nga mga panimalay sa pag-alagad sa mga altar nga iya ginhimo. Ginhimo niya nga pari ang bisan sin-o nga luyag manginpari. 34Ini nga sala niya nagdala sing kapierdihan kag bug-os nga kalaglagan sa iya ginharian.
Currently Selected:
1 Mga Hari 13: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
