1 Mga Hari 11
11
Si Solomon Nagtalikod sa Dios
1Si#Deut. 17:17. Solomon naghigugma sa madamo nga mga babayi sang iban nga mga pungsod. Wala labot sang bata sang hari sang Ehipto, nagpangasawa sia sing mga Hethanon, mga Moabnon, mga Amonhon, mga Edomnon, kag mga Sidonhon. 2Ginpangasawa#Exo. 34:16; Deut. 7:3-4. niya sila bisan ang Ginoo nagsugo sa mga Israelinhon nga indi magpangasawa ukon magpamana sa sini nga mga tawo tungod kay ini sila amo ang magadala sa mga Israelinhon sa pagsimba sa iban nga mga dios. 3Si Solomon nagpangasawa sing 700 ka mga prinsesa kag may 300 man sia ka mga babayi. Sila ang kabangdanan sang pagtalikod niya sa Dios, 4kag sang tigulang na sia gindala nila sia sa pagsimba sa iban nga mga dios. Wala sia magmatutom sa Ginoo nga iya Dios, subong sang pagkatutom sang iya amay nga si David. 5Nagsimba sia kay Astarot nga diosa sang Sidon, kag kay Moloc, ang makangilil-ad nga dios sang Amon. 6Nagpakasala sia batok sa Ginoo, kag wala sia magmaminatud-on sa iya subong sang pagkamaminatud-on sang iya amay nga si David. 7Sa bukid, sa sidlangan sang Jerusalem nagpatindog sia sing lugar nga pagasimbahan kay Kemos, ang makangilil-ad nga dios sang Moab, kag lugar nga pagasimbahan kay Moloc, ang makangilil-ad nga dios sang Amon. 8Nagpatindog man sia sing mga lugar nga ginasimbahan sa diin ang tanan niya nga mga asawa nga dumoluong makasunog sing insyenso kag makadulot sing mga halad sa ila kaugalingon nga mga dios.
9-10Bisan nga ang Ginoo, ang Dios sang Israel, nagpakita kay Solomon sing makaduha, kag nagsugo sa iya nga indi magsimba sa iban nga mga dios, si Solomon wala magtuman sa Ginoo, kundi nagtalikod sia sa iya. Gani ang Ginoo naakig kay Solomon, 11kag nagsiling sa iya, “Tungod kay ginhungod mo nga lapason ang imo kasugtanan sa akon kag wala mo gintuman ang akon mga sugo, nagasumpa ako nga kuhaon ko ang ginharian sa imo kag ihatag ko ini sa isa sang imo mga opisyales. 12Pero tungod sa imo amay nga si David indi ko paghimuon ini samtang buhi pa ikaw, kundi sa tion sang paggahom sang imo anak nga lalaki. 13Kag indi ko pagkuhaon ang bug-os nga ginharian sa iya, sa baylo bilinan ko sia sing isa ka tribo tungod sa akon alagad nga si David kag tungod sa Jerusalem, ang siudad nga ginhimo ko nga mangin-akon kaugalingon.”
Ang mga Kaaway ni Solomon
14Gani ginhimo sang Ginoo si Hadad, katapo sang harianon nga panimalay sang Edom nga magsumpong kay Solomon. 15-16Sang una anay, sang pag-agaw ni David sang Edom, si Joab nga pangulo sang iya mga hangaway nagkadto didto sa paglubong sang mga patay. Sia kag ang iya mga tinawo nagpabilin sa Edom sing anom ka bulan, kag sa sini nga tion ginpamatay nila ang tagsa ka lalaki sa Edom 17luas kay Hadad kag sang pila ka mga ulipon nga Edomnon sang iya amay, nga nagpalagyo sa Ehipto. Sa sadto nga tion si Hadad bata pa. 18Halin sa Midian nagkadto sila sa Paran sa diin ang iban nga mga tawo nagbuylog sa ila. Dayon nagpanglakaton sila sa Ehipto. Nagkadto sila sa hari, nga naghatag kay Hadad sing duta kag balay kag pagkaon. 19Si Hadad kag ang hari nag-amiguhay, kag ang hari nagpaasawa sang iya bayaw, ang utod ni Tafanes nga Rayna kay Hadad. 20Nagbata sia kay Hadad sing anak nga lalaki, kag ginhingalanan sia kay Genubat, nga ginpadaku sang rayna sa palasyo sa diin nag-estar sia upod sa mga anak nga lalaki sang hari.
21Sang pag-abot sang balita kay Hadad sa Ehipto nga si David napatay na, kag si Joab nga pangulo sang hangaway patay na man, si Hadad nagsiling sa hari, “Pabalika ako sa akon kaugalingon nga pungsod.”
22Ang hari nagpamangkot, “Ngaa mapauli ka? Tungod bala nga wala ko ikaw mahatagi sang bisan ano?”
Si Hadad nagsabat sa hari, “Papaulia lang ako.” Kag nagpauli sia sa iya kaugalingon nga pungsod.
Si Hadad nga hari sang Edom malaut kag kaaway sang Israel.#11:22 Ang isa ka dumaan nga pagbadbadSi Hadad…Israel; sa Hebreo ini nga bahin nabutang sa punta sang bersikulo 25.
23Ginhimo man sang Dios nga si Rezon nga anak nga lalaki ni Eliada magsumpong kay Solomon. Si Rezon ulipon anay ni Haring Hadadezer sang Soba, pero nagpalagyo sia sa iya agalon, 24kag nanginpangulo sia sang grupo sang mga rebelde. Natabo ini sa tapos malutos ni David si Hadadezer kag mapamatay niya ang mga kadampig ni Hadadezer nga Sirianhon. Si Rezon kag ang iya mga tinawo naglakat kag nag-estar sa Damasco sa diin ginhimo sia sang iya mga tinawo nga hari sang Siria. 25Nanginkaaway sia sang Israel sa panahon ni Solomon.
Ang Saad sang Dios kay Jeroboam
26Ang isa pa ka tawo nga nagsumpong kay Haring Solomon amo ang isa sang iya mga opisyales nga si Jeroboam nga anak ni Nebat nga taga-Sereda sa Efraim. Ang iya iloy si Serua nga isa ka balo. 27Ang masunod amo ang kabangdanan sang iya pagrebelde.
Si Solomon nagapatampok sang duta sa nasidlangan nga kilid sang Jerusalem kag nagapakay-o sang mga pader sang siudad. 28Si Jeroboam mabakod nga pamatan-on, kag sang makita ni Solomon nga mapisan sia ginpadumala niya sia sang tanan nga pilit nga pagpaobra sa kadutaan sang mga tribo ni Manases kag ni Efraim. 29Isa ka adlaw, samtang si Jeroboam nagapanglakaton halin sa Jerusalem, si Ahias nga propeta halin sa Silo nagsugata sa iya nga isahanon lang sa dalan sa wayang. Si Ahias nagabayo sing bag-o nga panapton, 30pero gin-uba niya ini, gingisi sa dose ka bahin, 31kag nagsiling kay Jeroboam, “Kuha ka sing napulo ka bahin para sa imo kaugalingon, tungod kay ang Ginoo, ang Dios sang Israel, nagasiling sa imo, ‘Kuhaon ko ang ginharian kay Solomon, kag pagahatagan ko ikaw sing napulo ka tribo. 32Si Solomon magahawid sing isa ka tribo tungod sa akon alagad nga si David kag tungod sa Jerusalem, ang siudad nga ginpili ko nga mangin-akon halin sa bug-os nga duta sang Israel. 33Himuon ko ini tungod kay ginsikway ako ni Solomon kag ginsimba niya#11:33 Ang iban nga dumaan nga mga pagbadbadginsikway ako ni Solomon kag ginsimba niya; sa Hebreoginsikway nila ako kag ginsimba nila. si Astarot, ang diosa sang Sidon; si Kemos, ang dios sang Moab; si Moloc, ang dios sang Amon. Si Solomon#11:33 Ang iban nga dumaan nga mga pagbadbadSi Solomon; sa HebreoSila. wala magtuman sa akon; nagpakasala sia, kag wala niya gintuman ang akon mga kasugoan kag mga sugo subong sang pagtuman sang iya amay nga si David. 34Pero indi ko pagkuhaon ang bug-os nga ginharian kay Solomon, kag magahari sia samtang sia nagakabuhi tungod sa akon alagad nga si David nga akon ginpili kag nagtuman sang akon mga kasugoan kag mga sugo. 35Kuhaon ko ang ginharian sa anak nga lalaki ni Solomon kag hatagan ko ikaw sing napulo ka tribo. 36Hatagan ko ang anak ni Solomon sing isa ka tribo, agod may yara sa gihapon nga kaliwat ang akon alagad nga si David nga magagahom sa Jerusalem, ang siudad nga akon ginpili sa diin ako pagasimbahon. 37Jeroboam, himuon ko ikaw nga hari sang Israel, kag magagahom ikaw sa tanan nga duta nga luyag mo. 38Kon tumanon mo ako sing bug-os, magkabuhi suno sa akon mga kasugoan, kag magpahamuot sa akon paagi sa paghimo sang akon ginsugo, subong sang ginhimo sang akon alagad nga si David, ako manginkaupod mo sa gihapon. Himuon ko ikaw nga hari sang Israel kag pat-uron ko nga ang imo mga kaliwat magagahom sa tapos sa imo, subong sang ginhimo ko kay David. 39Tungod sang mga sala ni Solomon, silutan ko ang mga kaliwat ni David, pero indi sa tanan nga panahon.’”
40Gani si Haring Solomon nagtinguha sa pagpatay kay Jeroboam, pero nagpalagyo sia pakadto kay Haring Sisac sang Ehipto kag nagpabilin didto tubtob napatay si Solomon.
Ang Pagkapatay ni Solomon
(2 Cron. 9:29-31)
41Ang tanan nga ginhimo ni Solomon, ang iya mga binuhatan kag kaalam nasulat tanan sa Maragtas ni Solomon. 42Nanginhari sia sa Jerusalem nga naggahom sa bug-os nga Israel sing kwarenta ka tuig. 43Napatay sia kag ginlubong sa siudad sang iya amay nga si David kag ang iya anak nga si Rehoboam nagbulos sa iya subong nga hari.
Currently Selected:
1 Mga Hari 11: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
