1 Mga Taga-Corinto 7
7
Mga Pamangkot nahanungod sa Pag-asawahay
1Karon, amo ini ang masiling ko nahanungod sang mga butang nga ginsulat ninyo.
Maayo sa isa ka tawo nga indi magpangasawa. 2Pero tungod kay madamo ang nagahimo sang pagpakighilawas, dapat nga ang tagsa ka lalaki may iya kaugalingon nga asawa kag ang tagsa ka babayi may iya kaugalingon nga bana. 3Ang lalaki dapat magtuman sang iya katungdanan sa iya asawa subong bana, kag ang babayi dapat magtuman sang iya katungdanan sa iya bana subong asawa, kag ang tagsa sa ila dapat maghatag sing kabulosgan sa isa kag isa. 4Ang asawa indi ang tag-iya sang iya kaugalingon nga lawas, kundi ang iya bana. Subong man, ang bana indi ang tag-iya sang iya kaugalingon nga lawas, kundi ang iya asawa. 5Indi kamo magdumiliay sang inyo kaugalingon sa isa kag isa sa kinaugali sang pag-asawahay, luas kon magsugtanay kamo sa sini nga bagay nga indi lang anay, agod nga magamit ninyo ini nga tion sa pagpangamuyo. Pero magbalik kamo sa kinaugali sang pag-asawahay, kay basi sulayon kamo ni Satanas tungod kay indi kamo makapugong sang inyo kaugalingon.
6Ginahambal ko ini sa inyo indi subong isa ka sugo, kundi subong isa ka pahanugot. 7Kon sa bagay, luyag ko nga tanan kamo manginsubong sa akon. Pero ang tagsatagsa may pinasahi nga hiyas halin sa Dios. Lain nga hiyas ang ginhatag para sa isa ka tawo kag lain man ang ginhatag para sa isa.
8Karon ginasiling ko ini sa mga wala sing bana ukon asawa, kag sa mga balo, nga mas maayo pa sa inyo nga magpadayon kamo sa pagpangabuhi sing isahanon pareho sa akon. 9Pero kon indi kamo makapugong sang inyo balatyagon, magpangasawa ukon magpamana kamo. Kay mas maayo pa nga magpangasawa ukon magpamana kamo sang sa magbalingaso kamo tungod sang pagsilabo sang inyo kailigbon.
10Sa#Mat. 5:32; 19:9; Mar. 10:11-12; Luc. 16:18. mga nagaasawahay may sugo ako. Indi ini akon, kundi iya sang Ginoo: Ang asawa indi dapat magbulag sa iya bana. 11Pero kon magbulag sia, dapat nga indi na sia magpamana, ukon indi gani mag-uliay sila sang iya bana. Ang bana indi dapat magbulag sa iya asawa.
12Sa iban nagasiling ako (akon lang ini kag indi iya sang Ginoo): kon ang isa ka tumoluo may asawa nga di-tumoluo, kag kon ang asawa sugot man sa pagpuyo sa iya bana, dapat indi pagbulagan sang bana ang iya asawa. 13Kag kon ang isa ka tumoluo nga babayi may bana nga di-tumoluo, kag kon ang bana sugot man sa pagpuyo upod sa iya, dapat indi pagbulagan sang asawa ang iya bana. 14Kay ang di-tumoluo nga bana ginabaton sang Dios tungod sang iya paghiusa sa iya asawa nga tumoluo, kag ang di-tumoluo nga asawa ginabaton sang Dios tungod sang iya paghiusa sa iya bana nga tumoluo. Kay kon indi amo ini, ang ila kabataan manginkatulad sang kabataan sang mga pagano. Pero kay amo ini, ginabaton sila sang Dios. 15Ugaling kon ang di-tumoluo luyag magbulag sa tumoluo nga bana ukon asawa, pabulaga sia. Sa amo nga kahimtangan ang tumoluo nga bana ukon asawa, hilway sa pagpili. Kay ang Dios nagtawag sa inyo sa pagkabuhi sa paghidait. 16Paano bala ang pagkahibalo mo, tumoluo nga asawa, nga ayhan paagi sa imo maluwas#7:16 Paano bala ang pagkahibalo mo…paagi sa imo maluwas: ukonPaano bala ang pagkahibalo…paagi sa imo indi maluwas. ang imo bana? Ukon paano bala ang pagkahibalo mo, tumoluo nga bana, nga ayhan paagi sa imo maluwas ang imo asawa?
Magkabuhi Kamo suno sa Pagtawag sang Dios sa Inyo
17Ang tagsatagsa dapat magkabuhi suno sa hiyas nga ginhatag sa iya sang Ginoo, kag suno sa iya kahimtangan sang pagtawag sang Dios sa iya. Amo ini nga pagsulondan ang ginatudlo ko sa tanan nga mga iglesia. 18Kon#1 Mac. 1:15. ang tinuli nga tawo nagbaton sang panawag sang Dios, indi kinahanglan nga taguon niya ang iya pagkatinuli. Kon ang wala matuli nga tawo nagbaton sang panawag sang Dios, indi na kinahanglan nga magpatuli pa sia. 19Kay ang pagpatuli ukon ang di-pagpatuli indi importante. Ang importante amo ang pagtuman sang mga kasugoan sang Dios. 20Ang tagsa ka tawo dapat magpadayon sa iya kahimtangan sang pagbaton niya sang panawag sang Dios. 21Ulipon ka bala sang pagtawag sa imo sang Dios? Sigi lang, bisan ulipon ka, pero kon may kahigayunan ka nga manginhilway, himusli ini nga kahigayunan. 22Kay ang ulipon nga gintawag sang Ginoo, ginhilway sang Ginoo. Sa amo man nga bagay, ang hilway nga tawo nga gintawag ni Cristo ulipon ni Cristo. 23Ang Dios nagbakal sa inyo sa daku nga bili. Gani, indi kamo magmangin-ulipon sang mga tawo. 24Mga kautoran, ang tagsatagsa dapat magpadayon sa pagkabuhi upod sa Dios, suno sa iya kahimtangan sang pagtawag sa iya.
Ang mga Pamangkot Nahanungod sa Wala pa sing Asawa ukon Bana kag sa mga Balo
25Karon nahanungod sa wala sing bana ukon asawa: wala ako sing sugo halin sa Ginoo, pero nagahatag ako sang akon panghunahuna subong isa nga sarang masaligan tungod sang kaluoy sang Dios.
26Tungod sang mga kabudlayan karon, kon sa akon lang mas maayo pa nga ang isa ka tawo magpadayon sa amo man gihapon niya nga kahimtangan. 27May asawa ka bala? Indi na sia pagbulagi. Wala ka bala sing asawa? Indi ka na lang magpangasawa. 28Pero kon mangasawa ka gid man, indi ka makasala. Kag kon ang dalaga magpamana, indi man sia makasala. Pero luyag ko kuntani nga malikawan ninyo ang adlaw-adlaw nga mga palaligban sang may asawa ukon bana.
29Mga utod, amo ini ang buot ko silingon: diutay na lang ang tion nga nabilin. Sugod karon ang may mga asawa dapat magkabuhi nga daw wala sila sing asawa, 30ang mga nagakalisod subong nga daw wala sila sing kalisod, ang mga nagakalipay subong nga daw wala sila sing kalipay, ang mga nagabakal subong nga daw wala sila sing binaklan, 31kag ang nagagamit sang mga pagkabutang sining kalibutan magkabuhi subong nga daw wala sila nagagamit sini. Kay ang kahimtangan karon nagapakita nga ining kalibutan indi na gid magdugay.
32Luyag ko nga mahilway kamo sa libog. Ang wala sing asawa nagakabalaka nahanungod sa mga hilikuton sang Ginoo, tungod kay nagatinguha sia sa paglipay sa Ginoo. 33Pero ang may asawa nagakabalaka sa mga butang sining kalibutan, tungod tungod kay luyag sia maglipay sang iya asawa. 34Gani, ang may asawa nabutang sa tungatunga. Ang dalaga ukon ang wala sing bana nagakabalaka nahanungod sa mga hilikuton sang Ginoo, tungod kay luyag niya ihalad ang iya lawas kag espiritu. Pero ang may bana nagakabalaka sa mga butang sining kalibutan, kay luyag sia maglipay sang iya bana.
35Nagasiling ako sini, tungod kay luyag ako magbulig sa inyo. Wala ako nagapugong sa inyo, kundi luyag ko nga himuon ninyo kon ano ang husto kag ang nagakabagay, kag ihalad ninyo ang inyo kaugalingon sing bug-os sa pag-alagad sa Ginoo nga wala sing ginaulikdan.
36Karon, nahanungod sa kalaslon nga nagpamat-od nga indi na lang mag-asawahay: kon ang lalaki nagabatyag nga indi matarong ang iya ginahimo sa iya nobya, kag kon indi sia makapugong sang pagsilabo sang iya kailigbon, kag nagabatyag sia nga kinahanglan mag-asawahay sila, ti maayo pa nga magpakasal na lang sila kon luyag niya.#7:36 sa kalaslon…kon luyag niya: ukonsa amay kag sa iya anak nga dalaga: kon nagabatyag sia nga wala sia nagaginawi sang nagakaigo sa iya anak nga dalaga kag kon sia yara na sa nagakaigo nga edad sa pagpamana, gani dapat himuon sang amay ang iya luyag kag tugotan sia sa pagpamana. 37Pero kon ang lalaki, bisan wala ginapilit nagpamat-od sa iya kaugalingon nga indi sia magpangasawa,#7:37 indi sia magpangasawa: ukonindi niya pagtugotan ang iya anak nga dalaga nga magpamana. kag makapugong man lang sia sang iya kaugalingon, kag nakapamat-od na sa iya panghunahuna kon ano ang iya himuon, ti maayo gid ang iya ginahimo kon indi niya pagpangasaw-on ang iya nobya.#7:37 pagpangasaw-on ang iya nobya: ukonpagtugotan sia sa pagpamana. 38Gani maayo man ang ginahimo sang tawo nga nagapangasawa#7:38 nga nagapangasawa: ukonnga nagatugot sa iya anak nga dalaga sa pagpamana. sang iya nobya, pero mas maayo pa gid ang ginahimo sang tawo nga wala nagapangasawa#7:38 nga wala nagapangasawa: ukonnga wala nagapasugot sa iya anak nga dalaga sa pagpamana. sang iya nobya.
39Ang may bana indi hilway sa pagpamana liwat kon buhi pa ang iya bana. Kon ang iya bana patay na, ti hilway na sia sa pagpamana sang iya naluyagan, pero kinahanglan nga magpamana sia sang isa ka tumoluo. 40Pero mas malipayon pa gid sia kon indi na sia magpamana. Akon lang ini panghunahuna, pero nagapati ako nga ginaupdan man ako sang Espiritu sang Dios.
Currently Selected:
1 Mga Taga-Corinto 7: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
