1 Mga Taga-Corinto 5
5
Imoralidad sa Iglesia
1Karon,#Deut. 22:30. nabalahuba nga may mga pagpakighilawas dira sa inyo nga sobra pa sang ginahimo sang mga pagano. Kay ginsugiran ako nga may anak nga nagapakighilawas sa iya manding! 2Ngaa bala makapabugal pa kamo? Kuntani dapat kamo magkasubo, kag ang tawo nga nakahimo sini nga butang dapat pahalinon sa inyo katilingban! 3-4Kay bisan wala ako dira, sa gihapon ang akon espiritu yara dira nagaupod sa inyo. Kag sa ngalan sang aton Ginoong Jesus napamatbatan ko na ina nga tawo nga naghimo sinang malain nga butang, kag ang akon pamatbat pareho lang nga daw yara ako kaupod ninyo. Samtang nagatipon kamo sing tingob, kag ako nagapakig-upod sa inyo sa espiritu, paagi sa gahom ni Ginoong Jesus nga yari sa aton, 5itugyan ninyo ining tawo kay Satanas nga magalaglag sang iya lawas, agod nga ang iya espiritu maluwas sa Adlaw sang Ginoo.
6Indi#Gal. 5:9. bagay nga magpabugal kamo! Nahibaluan ninyo ang hulobaton nga nagasiling, “Ang diutay lang nga lebadora nagapahabok sang bug-os nga minasa nga harina.” 7Dapat#Exo. 12:5. ninyo kuhaon sa inyo kaugalingon ang daan nga lebadora sang sala, agod nga manginputli kamo sing bug-os. Dayon manginkaangay kamo sang bag-o nga minasa nga harina nga wala sing lebadora, kay akon nahibaluan nga sa pagkamatuod, amo gid man kamo. Ang aton panihapon sa Pascua nahanda na, kay si Cristo mismo, ang aton kordero para sa Pascua nahalad na. 8Gani,#Exo. 13:7; Deut. 16:3. saulogon ta ang aton piesta, indi sa tinapay nga may daan nga lebadora sang sala kag kalautan, kundi sa tinapay nga wala sing lebadora, ang tinapay sang kaputli kag kamatuoran.
9Sa sulat nga ginpadala ko sa inyo, nagsiling ako nga indi kamo magpakig-upod sa mga makihilawason nga mga tawo. 10Karon ang buot ko silingon, indi ang mga pagano nga makihilawason, ukon maibugon, ukon makawat, ukon nagasimba sa mga diosdios. Kay kon buot ninyo nga likawan sila, kuntani indi na kamo magkabuhi sa sini nga kalibutan! 11Amo ini ang buot ko silingon, nga indi kamo magpakig-upod sa isa ka tawo nga nagatawag sang iya kaugalingon nga inyo utod, pero makihilawason, ukon maibugon, ukon nagasimba sa mga diosdios, ukon mapasipalahon, ukon palahubog, ukon makawat. Bisan sa pagkaon indi magpakig-upod sa sini nga sahi sang tawo.
12-13Kay#Deut. 13:5; 17:7 (LXX). kon hambalon gid man, wala ako sing labot sa paghukom sa indi naton mga utod. Ang Dios magahukom sa ila. Pero indi bala ninyo paghukman ang mga katapo sang inyo katilingban? Kay ang kasulatan nagasiling, “Pahalina sa inyo katilingban ang tawo nga malaut.”
Currently Selected:
1 Mga Taga-Corinto 5: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
