Róóma 16
16
Naa Baulo
1Aalé nyaar kúnnaa ˈdúwa-, Fóíbe lééllá, ebá yú hí fayamle shia. Minnééllá gál Kiristo Kenkéra gaa ijoká he hújích Waaˈgiet totom gaa nanniyya. 2Aaléka, ˈdaa giri minnééllá úba he Máá kúnnaa Guđoká máálléká, hát ˈduwantiká mé guđáan yiedhíe, hé hí ki ˈgierˈgereká ˈdú chiichiˈdíe. Minnééllá yú ubaa gál burnayká hé tág nyí yiir gaa chirate.
3Biríska ubaa Akúla giri nyí hújích Yiesu Kiristo hol ˈgar nanniyyeká ye naa kí yiedhíe. 4Gálallá he gál sidhamle ˈdaachúka sillieká. Yáá tákámchú gáál gielmít hol ma ˈdú nanniny, gál Kiristo kidhdhoká lulle úba hé gáál gielmít hol ˈdú nannuo.
5Gál Kiristo-, gáál ˈbílle hol ˈdú seseenallá úba ye naa kí yiedhíe.
Shééléch chia ˈdúwa-, Ebánatos lé-, giri lés Asia erkob Kirísto iiy gaa yieká ye naa kí yiedhíe.
6María giri hí súm hujich kí nanniyyeká ye naa kí yiedhíe.
7Andoroníkos ubaa Yóóniya giri nyaaram chia Yuuˈdi-, gaalí nyí hol ˈgar hiigidheká ye naa kí yiedhíe. Gálallá he gál ye met Kirísto iiy yie-, gál alb fimiká hí súm ógká.
8Shééléch chia ˈdúwa-, Ambiláátos giri Máá kúnnaa Guđo Kirísto el gaa igiróóllá ye naa kí yiedhíe.
9Urbános giri ke hújích Kiristo hol ˈgar nannúóllá, ubaa shééléch chia ˈdúwa-, Sitákus lééllá ye naa kí yeedhíe.
10Abéles giri gédéch Kiristo ˈdúwáállá ye naa kí yiedhíe.
Gál ˈbíl geer Aristobulu lulle úba ye naa kí yiedhíe.
11Nyár chia Yuuˈdi-, Heróˈdion ubaa gál ˈbíl geer Narikiso gaa ijo-, Máá Guđo Kirísto ˈdaalle ki ˈgíéllá ye naa kí yiedhíe.
12ˈDeg Tirufáína ubaa Tirufóósa lé-, Máá kúnnaa Guđo Kirísto hujich ki nanniyyóóllá ye naa kí yiedhíe.
Anso chia Bérsi, úba súm Kirísto hujich ki nanniyyeká ye naa kí yiedhíe.
13Rúfos giri Máá kúnnaa Guđo Kirísto hí hújíchle kí vie-, ˈdúwáállá ubaa ˈjielle ye naa kí yiedhíe. Mú ˈjielle hát ˈjiechú.
14Asunkiríte, Félegon, Hérmes, Batiróbas, ubaa Hérmas, tá gál nyaaram-, gál kinaal hol af ijoká úba ye naa kí yiedhíe.
15Filólogo, Yúúlia, Néérus ubaa nyaarlé, tá Olúmbas, héétí gál Kiristo-, gál kinaal hol af ijoká lulle ye naa kí yiedhíe.
16Hol naa gielmitiká hol naa ki yiegedhíe. Ameeny gál Kiristo lesalloká gaa ijoká hé hí naa ká yie.
Atim biiy el ˈdaˈdká
17Nyaaramchú, gillo yú hí ki efe, gál gálaat hol eiy gaa ˈgiˈgidhuo-, hé ˈdaa Kiristoka gaalí oonisieká el ˈgiˈgisat-, hí ˈdaa eiy ki riitisuoká hol ˈdeeˈdeemíe, gaa fagandhíe. 18Gál hat kinaalloká hé Máá kúnnaa Guđo Kirísto hújíchle ma nanniny, gaal hé metlé hújíchle nannaa. Gaal ˈdeemano salsaloká ubaa ˈdéé hót he gálaat ki memeyoká he gálaat geđia. Yaalmitééllá in gaalí gál met af gaa guguđoká ki nyiimita. 19Hát hí Kirísto hát ˈdabaanká el gaa igiˈdóóllá hé gálaat lulle hí maale. Yaalmit kíchiallá hé tág ye geer gaa meeyche. Hát yú hí gaa fedoká he giri itín hé ˈdúwa-, hí ekemeychoká ˈdaalimle hí ˈgayya-, hí hé ˈdeđewká hol gáá faaganaychoká. 20Waag naanná ˈgayyoká Sátan ál ˈjob hai gaa ˈdeđeneyche, mú ˈgas metkícho hai gaa igificha.
Aaléka, Máá kúnnaa Guđo Yíésu hí ˈdú ˈjeeˈjeen.
21Tímote giri nyí hol hujich ˈgar naniyyóóllá hé hí naa ká yie. Nyaaram chia Yuuˈdiká Lúkios ubaa Yáson, tá Sosibáteros úba hé hí naa ká yie.
22Tá yáá Máá kúnnaa Guđoká gédéchlé-, warˈgatééllá Báulo kí veere-, Tértiyos lééllá, yáá úba hí naa ká yie.
23Gáíyos giri ye mé guđáan yie-, ˈbílle gál Kiristo allóóllá hí hol ˈdu gáá yiimetallá hé hí naa ká yie.
Erástos giri ˈjien máállé birm mé ki yaalká ubaa nyár kúnnaa Kowártos hé hí naa ká yie.
24[Máá kúnnaa Guđo Yiesu Kirísto hí ˈdú ˈjeeˈjeen. Iiy-hí, he hí hát kinaallá yeet.]#16:24 Gárallá hé warˈgasam heleká ˈbaal gaa mán.
25Aaléka, Waag kí meemeyo! Waag hé Fayam Midhab Kiristo-, yú gálaat ki ˈdiyeenallá ˈdaalleka hí higiraycho. Fayam Midhab Yiesu Kiristóóllá he Waag héllé geer geđi kis ˈgayye-, tá káána ka edhesicheká. 26Aalé hát warˈgasam gál Waag hí ˈdeem ka shigicheká hí huogodheká ubaa hát Waag bííyyo ali iđóóllá hí muˈdeká, Fayam Midhab Kiristóóllá hé káána gálaat hí kidh lúl mamalsuo, giri gaal Kirísto iiy yeget-, mú el gaa igiroká. 27Waag ˈdaalím lulle ˈgayyóóllá ˈdaa Yiesu Kiristoka, kí bííyyo ˈdúúw lúl shiiguo. Iiy-hí, he hí hát kinaallá yeet.
Currently Selected:
Róóma 16: dsh
Highlight
Share
Compare
Copy
Want to have your highlights saved across all your devices? Sign up or sign in
Bible Translation and Literacy
