Róóma 15
15
Ha ke tákámkúnno hol ger gaa memesîny
1Múúni giri ke Fayam Midhab Kiristóóllá ki hirayallá, kí gál Kiristo hátle ma hirânyallá tawunylé đalimmóóllá ˈdaalle ˈdugaka kí yiir gaa chiichirat, ha ke tákámkúnno hol ger gaa memesîny. 2Múún lulkúnno nyaaram kúnnaa iiy yeenle đalidhééllá kí guogofsuo, giri gáál iiy yeenle higirayyoká. 3Kirísto íín hé geyyiny ma ˈdú gáá yímen. Mú hé gálaat hí chaachare, hát káána Warˈgat Waaˈgiet hí hote-, kieye, E Waag, chaarim gaalí ko chaachareká hé gaalí ye chaachare,#15:3 Warˈgat Arram 69:9 chieká. 4He lullé Warˈgat Waaˈgiet gaa ijóóllá kisso gaalí veere, giri múún gáál af tatuoká. Atimééllá in muun gáál gúóf ubaa mé ki chirsan shigicha. Hát kinaallá in he lullé Waag hí gáál af iđiche-, ke met egesóóllá hát Waag hí ˈduuwasichoká ke og. 5Aaléka, Waag múún gáál mé ki chirsan fargogintle ubaa gúóf shigichóóllá, hátlé taalle hí Yiesu Kirísto el gaa igiˈdóóllá hí kas tikiˈdeká shiigicho, 6giri lulkícho ageer tikiˈdeká Máá kúnnaa Guđo Yiesu Kirísto ˈJaallé Waag hí ki memeycho-, hí ˈdúúw shigichoká.
7Aaléka, hát tikiˈde Kirísto hí gálle hotééllá, itín úba hol liledhíe, giri Waag yaalmit kíchia kinaal ˈdúúw gaa aargiˈdoká. 8-9Yú hí geeye, Yíésu ka yimíéllá, gál Yuuˈdi-, ubaa gál gál Yuuˈdi muuninyallá met hullaallé he ˈdu gáá riebe. Mu hé Waag hí héle gál Yuuˈdi eshim eshimle af iđicheká he ˈduuwasia. Tá mu gál gál Yuuˈdi muuninyallá ˈdu gáá riebééllá he giri geer guura Waag hí gáál argisichééllá ˈdaalleka gaal Waag memeyoká. Hát Warˈgat Waaˈgiet hí hote-, kieye,
Yú kidh hurt ha ko gaa meeye,
gáál hurtle arram yú ko ki memeyoká
ha yú gaa ˈdarama,#15:8-9 Warˈgat Arram 18:49
chieká.
10Warˈgát úba kieye,
It kidhdhóóllo, Waag gálle ger hí hol ˈgar meet,#15:10 Hemuumurít ˈDéé Hótlé 32:43
he chie.
11Warˈgát úba geđi kieye,
It kidhdhóóllo, lulkícho Máá Guđo Waag meemeyyíe.
Kidh lullé les gaa ijóóllá hé Waag meemeyo,#15:11 Warˈgat Arram 117:1
he chie.
12Máá Waag hí ˈdéé ká shigiche-, Yisááya léká úba kieye,
Iny Yeshay#15:12 Iny Yeshayallá he ˈDáwuˈd. ˈbíl ílle máádhat yíé haí gáá ˈdeeme,
mu kidh kánsíchle hai yeedhe.
Kidh mú máállé rubachietká hai hođita,#15:12 Yisááya 11:10
yie.
13Aalé it hí Kirísto iiy chíéllá, Waag ííni gáál ˈdú ˈjeˈjeennóóllá hí ger gaa meen ubaa naanná shiigicho. Héétí ˈdúˈjím Waaˈgiet hát hí aargiˈdaká onyle úba Waag hí shiigicho. Hím Naasan Waaˈgiet fargogintle hí onyééllá ˈdú ookodmicho.
Báulo hújíchlé gál kidhdhoká
14Nyaaramchú, itín hát hí súm ger gaa ˈdabaan-, ˈdaalim hí hol af ki tatiyyaká lulle hí ˈgayyaká, yáá tág óg. 15Tá ˈdeem yú hí ˈdu gáá vereno-, yú ma ka kaanallá, he giri yú hí ˈdeem um ˈbaal tabano kí gagadhoká. Hééllá he ˈdaa giri Waag ye ˈdúˈjímle ká shiiche-, 16ye gédéch Yiesu Kiristo hoyche-, ye hújíchle mé ki koyye-, Fayam Midhab Waaˈgietallá yú gál gál Yuuˈdi muuninyká ki ˈdiyeenká. Waag ye hújíchallá mé ki koyyééllá, he giri Hím Naasan Waaˈgiet gál gál Yuuˈdi muuninyká dhiiˈdo-, gáál suor ˈdúwa-, Waag hí iiy chegetoká hođichoká. 17Aaléka, hújích chia Waaˈgietallá ˈdaalleka yáá Yiesu Kirísto memeyo. 18Tá yú yáá hújíchallá nímle fargogintle hol bal ma ki ˈdaraminy. Fargogint Kiristo in yú ˈdeem ki hogodhe, yú hujich ki nannie, in gál gál Yuuˈdi muuninyallá fayam Kiristóóllá iiy yie. 19Hím Naasan Waaˈgiet fargogintle ííni hé fargogo-, gálaat hí il ki aargiro-, hí af ˈdaˈdaboká ekemeyche. Hatallá in yú hát ˈdabaanká Fayam Midhab Kiristóóllá ˈjien Yerusalem tá ˈjíig lés Illuriko lulle gaa ˈdiiyime. 20Yú alb gálle Fayam Midhab Kiristóóllá maaleká yáá sienyle ma ˈdú fafîny, yú alb gálle Kirísto moonnoyká fayamééllá gaa ˈdiyimeká gófle ˈgie. 21Hát Warˈgat Waaˈgiet hí hote-, kieye,
Gál kis gaalí mú ˈdeenyle ma géenyká biiy hai gaa aargira,
gál kis mú fayamle ma máálinyká
mú fayamle eiy hai naata,#15:21 Yisááya 52:15
chieká.
Báulo sienyle yaalmitlé
22Aaléka, yú bííykícho ka yiimieká hújích chiallá hí ye ká riridhdhe. 23Tá káánaka hújích yú lésallá gaa nannieká hé ye gíl af yé gaa ˈdie. Yú warram burnayká bííy kíchia hí gaa iđo kinaallá ká yiimieká fede, giri ke hol aargiroká. 24Hát yú fedoká he af giri yú lés Sebaania seseenká yú hí gáá nannaat-, rám mákártaká ko hol af yíéđian-, tá hí ye ˈgierich nanniyya-, yú sienchú mé verennoká. 25Tá erkob hátlé yú ma ka yímenká yú Yerúsalemo seeme, gál Kiristo ál kinaal gaa ijóóllá hé shiicho ˈdú siidha. 26Hé shiichóóllá, gál Kiristo lés Makeˈdonia ubaa lés Akaya gaa ijoká hí hol ˈdu gáá shuune, hí gál Kiristo-, he maaman-, Yerúsalem gaa ijóóllá ká shie. 27Hé shiichóóllá he hé súm gaalí fede-, gaalí gáál shiguoká. Hééllá gaalí gáál shíéllá he ˈdaa giri gál Kiristo Yerúsalem gaa ijóóllá gál kidhdhóóllá Fayam Midhab Kiristóóllá ka hilsieká. ˈDaa kinaallá in gaal gáál ˈdú ˈjie, gáál héllé hí ki ˈgierˈgereká ˈdú chiˈde. 28Aalé hé shiichóóllá yú gáál hilsie-, hújíchle yú beeteka, af giri yú lés Sebaania seseenká ha yú hí gáá naadha. 29Yú hí kí ˈjeˈjeenká, Kirísto ˈdúˈjímle lulle hát muun gáál ká bubuoká yáá óg.
30Nyaaramchú, gillo yú hí ki efe, Máá kúnnaa Guđo Yiesu Kirísto ubaa gielmit Hím Naasan Waaˈgiet hí gáál shigichoká ˈdaalleka, hát yú hol súm Waag ki rogononallá itín úba ye hát ˈdabaanká Waag kí ruogonmíe, 31giri lés Yuuˈdia yú sedheka, gál les kinaallo Kirísto iiy ma yéenká Waag hí gil met chiirato-, ye he ma ki ekemenyká, héétí gál Kiristo Yerúsalem gaa ijoká hé shiicho yú ˈdú sisidhóóllá geerle hí gaa meetká. 32Aalé hééllá hát Waag hí feˈdoká ˈdieka, geer midhabká ha yú kí yiimedhe, ál kinaallá ˈgarro ke hol geyyime. 33Aaléka, Waag kúnnaa naanná ˈgayyóóllá hí lulkícho gaa yíéđiyyo. Iiy-hí, hé hí hát kinaallá yeet.
Currently Selected:
Róóma 15: dsh
Highlight
Share
Compare
Copy
Want to have your highlights saved across all your devices? Sign up or sign in
Bible Translation and Literacy
