Róóma 11
11
Gál Yisirayel halúg ˈgíérích Waag hí feˈdoká el gaa igiroká
1Aalé káána, ha yú hí ká yiete, Waag gállé Yisirayelallá hai điite? Híʼi, hé gáál ma đíin. Yú úba dhúrchú máá Yisirayel, máá ˈbíl íl Abiraayam, máá é meeny Binyamin. 2Waag hé gállé-, héle waaratééllá ma đíin. Itín ˈdaa Eliyaka hé Warˈgat Waaˈgiet hí hoteká it ógká muunîny, giri Elíyalle Waag ki buoy-, gál Yisirayel ˈdeente-, 3kieye, Máá Guđo, gaal hé gál kua kuuní ˈdeem ká shigicheká yies, hé kubano kua suoriyyoká eiy ˈgieˈgie. Yaa tákáma ká ˈgite, sulchú gaalí nannaa, giri gaal ye yegeská,#11:3 Gál Kansúo Erká 19:10, 14 muí yie-, warˈgát hí chieká. 4Tá Waag mú háte geeyche? Waag kieye, Hé kuun tákámkú ma ka ˈgísan. Yáá gál éíy taaka shíí tiiya-, giri waag hódho-, Báal lééllá met les kurram ma gaa ˈdôny-, ma vísanká ˈguo,#11:4 Gál Kansúo Erká 19:18 he mú chie. 5Aalé báral úbaka, gál chia túóy Yisirayel-, Waag hí waarate-, hí ˈdú ˈjiiyyeká hé ˈgíérích Waag hí feˈdoká el gaa igiro. 6Gaal hátle gál Waaˈgietallá he hé kieye, he símisso gaalí gaa dhiire muuniny, he Waago gáál ˈdú ˈjiiyye, gáál geer guurá argisiche. Tá ˈdúˈjímallá har hé gaalí símis gaa dhiireká kátaka, hé onnônyka hé shiicho halleelloká muuniny.
7Aalé yaalmitééllá hatallá: Gál Yisirayel Waag hí gál ˈdúwaká chegieká fede-, tá hé kinaal ˈgar aayaˈgeká gál ilishká hé hé kinaal Waag ma gaa árginy. Gál hé kinaal argeká he gál Waag hí gáál gaa waarateká tákáma. Gálatí íín met hí googondhe. 8Hát káána Warˈgat Waaˈgiet hí hote-, kieye,
Waag hé gáál rám guđoká mé ki koyye,
gáál in ubaa nee riiyye,
ˈjíig bár ke gaa ijóóllá đig,#11:8 Yisááya 29:10; Hemuumurít ˈDéé Hótlé 29:4
chieká.
9Tá héétí ˈDáwuˈd úba kieye,
Gáál gololaamle hí naram ki yeet, hí ˈgiiliˈgaw,
hí ˈgodo ki okodicho,
gáál héllé ˈdeđewká ˈdaalleka, gáál hééllá il hí argiyyo.
10Gáál in hí gaa dhataw, gaal hai biiy gaa árginy,
gáál taalle bííyyo kern hí gaa koongʼodot,#11:10 Warˈgat Arram 69:22-23
ˈDáwuˈd hí yie.
Waag gál Yisirayel halúg gál Yuuˈdi lééllá geer guurá hai aargisicha
11Aaléka, ha yú hí yiete, gál Yuuˈdi les ˈdanitléél he in kieye, gaal gon bííyyo Waago gaa ˈgite, ke yegedhe? Híʼi, he hé hát kinaallá muuniny. He gáál điidhallé kinaallá in gál gál Yuuˈdi muuninyká hí rubach ki arge. Hééllá hatallá ˈdíéllá he giri gál Yuuˈdi hinááf gaa vereno-, gaal úba rúbách kinaal aargiroká fedoká. 12Af giri gál Yuuˈdi ˈgíérích Waag hí gálaat rubach ki shigichóóllá điidhe-, ađaabéélla hileká, in Waag kidhéétí ˈdú ˈjiiyye-, rubach shiiche. Tá gál Yuuˈdi bár rúbáchallá mé ˈdu gáá law-, iiy yeetká, ˈdúˈjím Waaˈgiet bar kinaalloká ˈdaa kidh lúl les gaa ijokáka ebá guđáan!
13Yú it giri hí gál Yuuˈdi muuninyallá hí geđia. ˈDaa giri yú he máá Waag hí gál gál Yuuˈdi muuninyká ali ˈdu gáá kaayyeká, in yú hújích chiallá ˈduuwasia, 14giri kálmaréel gál chia Yuuˈdííllá tuuˈdle yú hinááf gaa vereno-, gáál ˈbaal rubach aargiroká. 15Waag ubaa gál Yuuˈdi hol eiy gaa ˈgisanlééllá, in kidh les gaa ijóóllá kár Waag hol ki higiloká shiiche. Aalé gál Yuuˈdi af giri Waag hol higiloká ebá mídhab! Hé kinaallá he hát gál kufe-, geđi loolnodheká muuniny?
16Gaman ninni-, gaalí een il ki ˈdaraanká har he midhíntaka, đo een lulle hai midhanayche. ˈGór hidh hí ˈdabíntaka, kolm ˈgor kinaalloká úba hé ˈdabaan.#11:16 ˈGór hídhlé-, midhaballá he iiy yeen Abirááyam hí Waag ka ˈgieká. ˈGór kolmlééllá he gál iiy yeen hát Abirááyam hí ˈgieká Waag ka ˈguoká. 17ˈGór Waag hí fiiyyééllá hídhle kolmo he golmia. Gál Yuuˈdi Kirísto iiy ma yéenká he kolm Waag hí ˈgórle gaa muˈdeká. It hí Kirísto iiy chíéllá he ˈgór tím gáá ˈdieká kolmlé Waag hí ka muˈde-, muí kolm giri muí mureká albléká gaa kuokoyká. 18It kolm muí mureká albléká muí gaa kuokoyallá haí hol méeny, hí kieye, Nyííni kolm muí muréétíá nyí ˈdú ˈdúwa, hí chéen. Itín taalle hí kolmo, itín hidhdho hí ki luol. 19Itín kálmaréel hatallá haí cheedhe, Kolmééllá muí alb gaa murééllá, he giri alble muí nyí gaa kokuoká, haí cheedhe. 20Iiy-hí, hééllá taglé. Tá onnóo! Waag kolm alb gaa muˈdééllá he ˈdaa giri gaal Kirísto iiy ma yéenká. He ˈdaa giri itín hí Kirísto iiy ki chieká in Waag hí alb kinaallá gaa kuokoyye. Aalé haí hol memêny, Waag kiikiadhíe. 21Har Waag káána ˈgór kolmle alb gaa muˈdeka, tá it Waag hí alb gaa kuokoyyééllá har hí Waag sug ki niiyyeka, Waag hé hí alb ma gaa mumuriny?
22Aaléka, ití argiyye? Waag hé geer ka guurá ˈgayyo, tá gál hí af đuˈdusanká he illo ká aargisicha. Tá itín mu hé hí geer guurá argisie. Aalé har taalle hí mú el gaa igiˈdoka, mu geer guurálle taalle haí aargisia. Tá har hí mú sug ki niiyye-, hí mú điiteka, af kinaalka hát kolm biime-, muí murekáka, ha muí muura. 23Tá kolm Waag hí alb gaa muˈde kinaal har Yiesu Kirísto bala ˈdú nie-, mú iiy yieka, Waag geđi ˈgór hí gaa muˈde kinaal haí gaa kokoyyo. Waag íín hééllá ekemeychoká hé uˈdo. 24Itín hí hát kolm Waag hí ˈgór timiet gáá muˈde-, tá hát aađaká muuninyká ˈgór muí fieká gaa kuokoyká. Aalé Waag ˈgór he fiiyye kinaal kolmlé gáá muˈde kinaal geđi hol ˈdú nanniyyoká ebá súm hí hawul ki mán!
25Nyaaramchú, hé geer geđi-, Waaˈgietallá hí eiy nannasatoká yú fede. Har hí hééllá hát ˈdabaanká eiy ma naasanka, kálmaréél gál súm ˈduuˈdúwaká hollo hí hol ká dhaˈgasanna. Gál Yisirayelallá ˈbaal hé met guogo, tá gaal met guogintlééllá hai ˈgaa, ˈdaab ameeny gál gál Yuuˈdi muuninyká gállé Waag hí rubach shigichoká lúl rubach ma árginyká. 26Ebá gál Yísirayel hát lulle Waag hí rubach shigichoká yú hí ká geeye, hát káána giri Warˈgat Waaˈgiet hí hote-, kieye,
Máá gálaat rianká Síyonno yé gáá ˈdeeme,
mu ˈbíl íl Yakob#11:26 Yákob meenyle tikiˈd hí Yísirayel. Waag điinle yé hai gáá ˈdeđia.
27Tá gál Yisirayel ˈdéé afo yú iđimia,
giri gáál ađaabanolle yú gaa egewká,#11:27 Yisááya 59:20-21; 27:9
chieká.
28Gál Yisirayel ˈbaal ˈdaa giri Fayam Midhab Kiristóóllá điidheká káána hé Waag hol ka kídh yie. Hééllá in hé hí ki midhabká hí yé gáá ˈdie. Tá Waag hé hátle gál Yisirayelallá giel, ˈdaa giri gáál eshim eshimle waarateká. 29Aaléká, Waag hé gál waarate kinaal ma haađiny, héétí hé hé shiicho-, gálaat af iđicheká shiinyle el ma ˈgiisan. 30It gál gál Yuuˈdi muuninyallá, it héle hát Waag hí feˈdeká điite. Aalé káána gál Yisirayel hát Waag hí feˈdoká điidhééllá, in itín hí Waag geer guuralle argiyye. 31Aalé itín Waag hí geer guurá argisichééllá, gaal ííni káána Waag điidhééllá Waag geer guurálle úba iiy hai yeedhe. 32ˈDaa giri gálaat lulle Waag af đuˈduseká, in Waag hí gál hiiginká hoyche. Waag gáál hatallá koyyééllá, he giri gáál lulle geer guurá aargisichoká.
33Waag kamurle ubaa ˈdaalimle, tá he onyle, ebá guđáan! Mú kasle hé tág kaskúnno ˈdú guđo! Mú ˈgierimlé ˈdúwáállá eiy naasanle hé tág gáál far ˈdú gogo! 34Hát Warˈgat Waaˈgiet hí hote-, kieye,
Mááya Máá Guđo Waag tawunyle og?
Mááya mú af tie?#11:34 Yisááya 40:13
35Mááya kálta hé mákártaká Waag êw ki shie,
tá Waag hí êw ki higita?#11:35 Warˈgat Yob 41:11
chieká.
36He met lulle Waago yé gáá ˈdie, ki ija, tá geđi Máállé íín hí le. Waag taalle bííyyo gaalí meemeyo! Iiy-hí, he hí hát kinaallá yeet.
Currently Selected:
Róóma 11: dsh
Highlight
Share
Compare
Copy
Want to have your highlights saved across all your devices? Sign up or sign in
Bible Translation and Literacy
