Márko 13
13
Les el met ˈdaˈdle ˈdeenylé
1Yíésu hátlé ˈBíl Waaˈgiet náble yé gáá ˈdeˈdemeká, mú lalille mú tikiˈd mú geey, kieye, Máá gáál he oonisúóllo, ebá dháash! Waar gaalí ényal ki ˈdiséél ebá guguđáan, tá é ebá ˈdisach hí ˈdabáan, yie.
2Aalé Yíésu mú geey, kieye, Kó ény guguđo-, gaalí ˈdisséél argiyyô? Hé wár níínní wár eiy taaka ˈdug ˈdú ˈgiisatká mán, lulle ha gaalí ˈgieˈgia, yie. 3Yíésu hátlé Gúm Saano Salabká ˈdú ije-, ˈBíl Waaˈgiet ˈdaalle bala nieká, Bétiro, Yákob, Yuána, tá Ánˈduru mú nógúól yiete, kieye, 4Ebá nyí ka géesh, hééllá ká ˈjobondheka, meete yé ká ˈdeeme, nyí ki kiimisata? yie.
5Aalé Yíésu gáál geey, kieye, Hol ˈdeeˈdemíe, máádhat haí nyimísan. 6Gál burnayká meenychú hai kí yiimedhe, gálaat hai geđia, kieye, Yú he Kirísto,#13:6 Af Heberewka Kirísto he Messíya. Messíya hélle kieye, Máá Waag hí salab mé ki liiyye-, Waag hí kansím koyyeká. hai yeedhe, gaal gál ilishká hai baađisia.
7Hí oosom ka ˈjóbká ubaa oosom fágká hemle maalleka haí bírginy. Hééllá yiem hai ká ˈdeeme, tá les el ˈdaˈdle hé geđ igiˈdo. 8Kidh hollo hol yeese, kansimano lesam met eiy ki ˈgiiyyoká hollo hol cheese. Les totom haí motoonno, biiy kuoˈd haí gáá ˈdeenne. Hééllá lulle kulle hát geer veerit erkob-, min verennoká he ká yaalla.
9Tá itín hol ˈdeeˈdemíe, ar ha gaalí fafaa, ény ˈdiiyiminyká ha gaalí gaa tuuna. ˈDaachú ˈdugaka gál kaansúoká ubaa gál les met ki ˈgieká ha gaalí ˈdú egee. Gál kinaallá metle ˈduuwchú haí gaa hogoto. 10Erkob Fayam chia Midhaballá gaalí kidh met lulle ki ˈdiiyeen. 11Aalé gaalí giiliˈgay-, gaal hí gál arráká ˈdu gáá eeyka, hé hí hogotoká haí geer gaa ˈdeenêny. Af kinaallá ˈdéé hót Waag hí shiichoká hoogodhóo. ˈDeeny hí af geer yé gáá ˈdeˈdeenká Hím Naasan Waaˈgieto hí hogoto, hé itín muuniny.
12Máádhat nyárlé hol ki ˈdalidheká ar gíl hai gaa kakaa, mú ha gaalí yeese. Héétí iny ˈjaalle ar gíl hai gaa kakaa, mú ha gaalí yeese. Um gállé hí ˈdaloká af hai ká điidhma, gáál kúfach mé hai ki kokoo. 13Itín gálaat lulle ˈdaa meenychú ˈdugaka haí neebeedhe. Tá máá hééllá lulle mé ki chirsat-, ˈjíig he mé đig yeetká Waag haí rianna.
14Aaléka, hé súm gaa nyakarich-, Waag hí néb-, ˈBíl Waaˈgiet ˈdeđeneyoká, ál he ma lilenyká hai kí ˈdeeme.#13:14 ˈDániel 9:27; 11:31; 12:11 Máá ˈdeenyééllá tuoyoká hí ˈdéé eiy naasat. Hé hat kinaallóóllá hí argiyyeka, gál lés Yuuˈdia gaa ijoká hí gumano kar ˈdú ˈdano. 15Máá ˈbílle ˈdug ˈdú ijoká hai léen, ˈbíl híliny, shókódích hí ˈbíl geer gaa ijoká ka shúúnan. 16Máá forich gaa ijoká hai é hol ˈdú náan, đafaraamle shúúnan. 17Hoba! Af kinaal ebá ˈdeg ger ˈgayyoká ubaa ˈdeg um hí ot ki ˈgieká ki ˈdéen! 18Waag roogonóo, hééllá hai af ˈdeenyietká afle ali kí ˈdíiny. 19Bár kinaal manyjasiny ˈdeew-, ameeny Waag les ka kuonneká kálta gálaat il hí ma árginy-, tá gálaat geđi il hí ma aargirinyká biiy hai gáá ˈdeenne. 20Tá Máá Guđo Waag har rám ka chiimetóóllá iraam ma rinyka, máá níínní les ˈdug ˈdú ijoká mán. Tá Waag gállé waarateká ˈdaalle ˈdugaka, rám kinaallá hé Waag hí iraam riiyye.
21Aaléka, af kinaallá máádhat hí geey-, kieye, Ebá dhaayyíe, Kirísto hállá! muuninyka, Mu hártá! hí yieka, haí mú af iiy chéen. 22Gál hođomlé-, hol Kirísto ka hođuoká ubaa gál Waag hí ˈdeem ka shigichoká hol ka hođuoká biiy hai gáá ˈdeeme. Gaal hé farguogo-, kálta gálaat hí il ma ki árginy-, gálaat hí af ˈdaˈdaboká hai ekemeye. Hé gaalí ekemeyóóllá har hé gaalí hát gaa ˈguoká onnônyka hé gál Waag hí waarateká úba bađisie. 23Biiy ˈdeeˈdemíe, yáá biiy hátlé đéém taalká hí he lulle geey.
24Bár kinaal manyjasiny el ˈdaal,
aadh hai oongʼoroyyo, ˈguiy édhum hai ˈdaaba.
25Hidhino úr hai gáá okodmoˈdo,
hé farguogo-, úr gaa ˈgieká Waag haí muotisicha.#13:25 Yisááya 13:10; 34:4; Yówel 2:10
26Aaléka, gálaat Iny Máádhat nyáˈdow hát kí yiimetká hai aargira. Mu fargogínt ubaa ˈduuw guđoká hai kí yiimedhe. 27Mu gállé ˈgasso-, urruká ali hai ká fafaa, gaal mu gállé waaˈdeká biiy ˈdinnam afuraalle hollo hol ˈdu gáá shuguna, ˈjíig biiy lulle a metlé ki taalká đig.
28Ebá kinnach ˈdímlé ka ˈdeˈdeenká kí he gaa onnot. Kinnach kolm éíy taakaká ubaa gurf ká layka, it af saano hí gaa higisoká hát ka ˈjobonteká óg. 29Hát tikiˈdééllá hé hatallóóllá yaalmitle hí argiyyeka, mú ˈjímle hát ka ˈjobondhe-, mu karaf kí ˈdeenká it óg. 30Yú hí hé ˈdúwaká geeye, gálallá#13:30 Gálallá amú he gál Yuuˈdi, muuninyka, he Waag gállé waarateká. hé les ma gaa bebeny, ˈdaab hééllá lulle ali ma kí ˈdíinyká. 31Úr ubaa les el met haí ˈgiidha. Tá ˈdeenychú íín hé el met hí ma ˈgiˈgin.
Kúlích Yíésu hí hol gáá naatká
32Kúlích kinaallá ubaa aadh ˈgásle, Waag gállé ˈgasso-, urruká yíekaʼ, yáá Ínyííl yíekaʼ, hé máá níínní hí ogká mán. ˈJaachú tákáma hí og. 33Biiy ˈdeeˈdemíe, haí mé les ki gân! Hééllá lulle kúlích ali kí ˈdeˈdeenká ití muog. 34Hééllá hát máá bííy eiy sienyle hí ká hileká. Mu hátlé ényle ma gaa kíinyká gedelle ényle af iđie-, gáál hujichaamle eiy met ki koy-, tá máá é káráfle ˈdeˈdeenká geey-, kieye, Tág yíéđig, ha mé les ki gân! yieká.
35Aaléka, met hí ˈdú ˈgie. É máálle aflé he ka ˈjeˈjeenká ití muog. Mu gelga ká ˈjeˈjemekaʼ, naan sibil hí aabunawká ká ˈjejemekaʼ, lug erká kí ˈjejemekaʼ, bur ká ˈjejemekaʼ, ití muog. 36Hátlé hí ram gaa iiyya-, mú hí met muogká ha muí af kí ˈdíiny. 37Hé yú hí geđúóllá gálaat lullé úba yú geđia, Mé les gaa ée, yú yeedhe, Yíésu hí gáál yie.
Currently Selected:
Márko 13: dsh
Highlight
Copy
Compare
Share
Want to have your highlights saved across all your devices? Sign up or sign in
Bible Translation and Literacy
