He Ekeny Gál Alb Fimiká 15
15
Fáláám hermisan gál Kiristo hí hol ki fafalmeká
1Gál yááb lés Yuuˈdia gáá yimie mare Ántiok kí fame, gál nyaaramká ˈdeenyéél onisie, kieye, Heermitíe, hát giri hemuumurit Waag hí Móshe ka shiicheká hí gáál oonisicheká. ˈDaab hí ma heermísanká, it rubach Waag ma gaa aargiriny, gaalí yie. 2Aalé Báulo ubaa Barnábas gáál hol ˈdéé súm ˈdú naannie, gáál hol ki falme. Gál nyaaram al kinaalloká Báulo ubaa Barnábas tá gál éíy taaka nyaaramká bie, giri gaal Yerúsalem seseen-, gál alb fimiká ubaa gál Kiristo gállé hí met ki ˈgieká ˈdéé umutéél ka hegesetká. 3Aalé gál Kiristo gáál ali fie. Gaal ˈgíéríchlé gaa igire-, lés Foinike ubaa lés Samaria gaa nanadheká, gaal gál Kiristo les kinaalloká kidh hát Yíésu bala ˈdú nieká gáál geey. Fayaméél gál nyaaram kinaal lulle ger gaa meemesiche. 4Aalé gaal he Yerúsalem kí ˈdieká gaal gál Kiristo al kinaalloká ubaa gállé hí met ki ˈgieká, tá gál alb fimiká hí shuunne, hí gállé dheeˈgo hote. Aalé mú Báulo hát Waag hol ˈgie-, Waag hí hujich ki nannasateká fayamle lulle gáál shie. 5Kor gál Kiristo siraat gál Farisaay ki ˈgieká les gaa kie, kieye, Gál kidhdho Kirísto iiy yíéllá gon gaalí heermisuo, hemuumurit Waag hí Móshe ka shiicheká hí el gaa iigiro, yie.
6Gál alb fimiká ubaa gál Kiristo gállé nyaaram-, hí met ki ˈgieká ˈdeenyéél ˈdugaka me hí hol arge. 7Aalé gaal he hol súm geeyká, Bétiro les gaa kie, kieye, Nyaaramchú, ití óg, hát giri kíssóótí Waag hí ye hurt gáá viiyye-, giri kidh Fayam Midhaballá afchú gaa maalo-, fayám iiy yegetká. 8Waag ííni ger gálaat ógallá, hát he kidh iiy chieká hé gáál ká argisiche. Hát giri mu Hím Naasanle muun muí gáál ka shieká in úba muí kidh shie. 9Waag íín hé muun ubaa kidh gáál hol eiy ma gaa nanniny. Hát giri muun gáál saas gaa eeyyeká in kidh úba saas gaa eeyye, ˈdaa giri kidh Kirísto iiy yieká. 10Aalé káána háteka hí Waag ki ekemesete-, hí gál láli kidhdho-, Yíésu iiy yieká ilsh eshim eshimkúnno ubaa muun gáál ka adhdheká hí ˈdú iđimicháal? 11Múún hé ki óg, hát gielmit Máá kúnnaa Guđo Yiesu Kirísto ke rubach ki argeká in kidh úba hát tikiˈdééllá hí rubach ki arge, Bétiro hí yie.
12Aalé nyesebich lulle shab yie, Báulo ubaa Barnábas af nee koy. Báulo ubaa Barnábas Waag hát hí hujich ki naasate-, hé gáál af ˈdaˈdabsuo-, kidh hí il ki argeká Waag hí kidh hurt gaa eekemeycheká gáál geey. 13Aalé gaal he ˈdeem beeteká Yákob les gaa kie, kieye, Nyaaramchú, ye af nee kóo. 14Símon hé gáál ká geey, hát Waag erkob kidh ˈdú ˈjiiyye-, gál giri mú meenyle léká kidh gaa waarateká. 15ˈDeeny Símon hí hodhééllá ubaa ˈdeeny gál Waag hí ˈdéé ka shigicheká hé hol af vedhdhe, giri he veeritle Waag hí hatal gaa chie-, kieye,
16Hééllá beeyka, yú hollo hol ká naadha,
ˈDáwuˈd ˈbíllé le ˈdoyká les ha yú gaa egee.
Érétlé kinaallá ha yú ˈdiisa, ali yé yú gáá ˈdeđia,#15:16 ˈBíl ˈDawuˈd ubaa érétléél, hélle he ˈbíl íl ˈDawuˈd.
17-18giri gáláát ka ˈgiteká ubaa kidh lullé meenychú ˈguoká
yáá Máá Guđóóllá hí ye ˈdu gáá kirmisatká.
Hééllá hé Máá Guđo giri héél hélle kísóótí gáál ka mamalsieká hí yieká,#15:17-18 Ámos 9:11-12
chieká, Yákob hí yie.
19Aalé Yákob geđi kieye, Kaschúka, ha ke gál kidhdho-, Waag bala ˈdú gáá nannuoká ke súm ílsh gaa iđimîny. 20Ínalleka kí gáál warˈgát ˈdú veero, gaal ˈguom suorle gaalí waagam hodhoká ki ˈgaˈgaloká ubaa so aanyle gaalí himano ki yegeská hí gaa faganat, gaal úba hai fasam igíminy, héétí ubaa gaal hí herginy gálle hol ma shúúnanká hol ká riat. 21Hééllá ˈdaaka bííy kisso hemuumurit Waag hí Móshe ka shiicheká gaalí ˈjien lulle gáá ˈdiiyime, ubaa gaalí ény Waaˈgiet ˈdiiyiminyká Kúlích Hef ˈGisanká gáá tuotoy, Yákob hí gáál yie.
Warˈgat gaalí gál kidhdho-, Yíésu iiy yieká ˈdú veereká
22Aalé gál alb fimiká ubaa gál nyaaramká, tá gállé hí met ki ˈgieká lulle hol ˈdéé af gáá maale. Gaal gál Báulo ubaa Barnábas hol egeet-, Ántiok mé nannuoká bie. Gál gaalí bieká he Yúúˈdas giri Barsábas léká tá Sílas. Gál naamáállá úba he gál nyaaramká gállé guguđoká. 23Gáál warˈgat gaalí ˈdeenyééllá gaa veereká gaalí shie:
Nyííni nyí warˈgatééllá ka veeˈdééllá nyí nyaaram kíchia alb fimiká ubaa gál Kiristo alloká gállé nyaaram hí met ki ˈgieká. It giri kidhdho nyaaram-, hí Ántiok, Síria, tá Kilíkia gaa iđáállo, náa!
24Warˈgatééllá nyí ka veeˈdééllá fayam gál kínyia ˈdáá tikiˈd hí ál kíchia kinaal kí fame-, gálle nyiin nyí ˈdéé ma ka shíiny-, kor ˈdeenylé hí geđieká hí mé eiy ki sedheká nyí maalle. 25Tá nyáá nyí hol ˈdéé af gáá maalle, nyiin nyí kieye, Kí gálaat buo, gáál kí nyaaram kúnnaa ke giel-, Barnábas ubaa Báulo 26giri ˈdaa Máá kúnnaa Guđo Yiesu Kirísto ˈdugaka sidhamle bíéllá kí hol fuo, gáál kí gáál ali ˈdú fuo, nyí chie. 27Aalé gál nyí ka biiyye-, nyí Báulo ubaa Barnábas ka fiiyye-, ke hí ali ˈdu gáá fíéllá he Yúúˈdas ubaa Sílas, giri ˈdeeny tikiˈde ke hí ˈdu gáá veerééllá hí af kí geđuoká. 28Héél hát Hím Naasan Waaˈgiet ubaa nyiin nyí ki midhabká nyáá nyí argiyye, giri ke hí ilsh éíy taaka ma gaa iđiminy-, kor hí héél íín ki taalká: 29Aaléka, ˈguom suorle gaalí waagam hodhoká ki ˈgaˈgaloká ubaa so aanyle gaalí hím ki yegeská gaa fagandhíe, fasam haí igíminy, héétí herginy gálle hol ma shúúnanká hol ka ridhdhíe. Hééllá lullééllá hí hol ká riateka, af kinaalka hé midhabká hí ekeyche.
30Aalé gál afural gaalí ali fie-, Ántiok ki fameká gaal gál Kiristo al kinaalloká hol ˈdú vie, gáál warˈgát shie. 31Gál al kinaalloká warˈgát tuoyká, atim gaalí warˈgát gaa veereká gáál ger gaa meeyche. 32Yúúˈdas ubaa Sílas giri dhúrle Waag hí ˈdéé ka shigicheká gál nyaaramká ˈdeem burnayká af ki tie, gáál guofsie. 33Aalé gaal ál kinaal ram gaa rafeká, gál giri nyaaram Antiokká gáál Waag ki vie, gáál gállé hí ali ka fieká ali ˈdú fie. [ 34Sílas íín ál Antiok kinaal ki ˈgite.]#15:34 Gárallá hé warˈgasam heleká ˈbaal gaa mán. 35Báulo ubaa Barnábas úba ál Antiok kinaal gaa yíéđie. Gaal ubaa gál éíy taaka burnayká ˈdeeny Máá Guđoká ˈdiiyime, gálaat ˈdéé oonisie.
Báulo ubaa Barnábas hol af ká điidhe
36Aalé rám burnayyeká hol ki sieteká Báulo Barnábas geey, kieye, Kí hol naat, ˈjien giri ke fayam Máá Guđoká gaa ˈdiiyimeká gál giri nyaaramká hátlé mákárta ijoká kí argo, mú yie. 37Barnábas íín Yuána giri Márko léká gáál hol egedhdheká he fede. 38Aalé ˈdaa giri Yuána gáál Bamfília álle ki hay-, gáál hol hujich ˈgar ma síenká, Báulo mú hol egeetká má fedo. 39Aalé gaal hol af ká điidhe, hol eiy gaa ˈgite. Barnábas đo Márko eedhdhe, kadich hile, koro Kuburos mé nie. 40Báulo íín Sílas eedhdhe, gál nyaaramká hí Waag ki vie, gaalí gielmit Máá Guđoká ˈdú hay, gaal đo kie. 41Aalé gaal lés Siria ubaa lés Kilikia gaa nadhe, gál Kiristo-, alb kinaalloká guofsie.
Currently Selected:
He Ekeny Gál Alb Fimiká 15: dsh
Highlight
Share
Compare
Copy
Want to have your highlights saved across all your devices? Sign up or sign in
Bible Translation and Literacy
