Tobit 14
14
Kataposang Tambag ni Tobit
1-2Si Tobit nag-edad ug 62#14:1-2 62: o 58. ka tuig sa dihang nabuta siya apan human mahiuli ang iyang panan-aw, nabuhi pa siya ug dugay. Nagmanggihatagon siya pag-usab sa mga kabos ug nagpadayon siya sa pagdayeg sa Dios ug sa pagsangyaw sa iyang pagkahalangdon. Si Tobit namatay nga malinawon sa edad nga 112 ka tuig ug gihatagan ug usa ka dungganang paglubong didto sa Ninibe.
3Apan sa wala pa mamatay si Tobit, iyang gitawag ang iyang anak nga si Tobias ug giingnan, 4“Anak,#Nah. 1:2–3:19. dad-a ang imong mga anak ug adto dayon kamo sa Media. Nagtuo ako nga ang hukom sa Dios nga iyang gipahibalo pinaagi ni propeta Nahum batok sa Ninibe hapit na matuman. Ang tanan nga gitagna sa propeta sa Dios ngadto sa Israel mahitungod sa Ninibe ug Asiria mahitabo gayod. Ang tanan matinuod ug ang tagsatagsa ka pulong niini matuman sa diha nga moabot na ang hustong panahon. Hugot ang akong pagtuo nga ang tanan nga gisulti sa Dios siguro gayod nga matuman. Ang Dios dili mopakyas sa iyang mga saad. Mas siguro ikaw didto sa Media kay sa dinhi sa Asiria o Babilonia.
“Ang atong mga isigka-Judio nga nagpuyo sa Israel magkatibulaag ug kuhaon gikan niadtong maayong yuta ngadto sa pagkabihag. Ang tibuok Israel mahimong usa ka kamingawan ug ang Samaria ug Jerusalem mahimong biniyaan nga mga siyudad. Ang Templo sa Dios sunogon hangtod nga magun-ob gayod kini sa hingpit sulod sa dugayng panahon. 5Apan ang Dios maluoy pag-usab sa iyang katawhan ug iya silang dad-on pagbalik ngadto sa yuta sa Israel. Tukoron nila pag-usab ang Templo apan dili na kini sama katahom sa unang Templo hangtod nga ang hustong panahon moabot. Apan kon moabot na kanang panahona ang tanang katawhan sa Israel mobalik gikan sa pagkabihag ug tukoron nila pag-usab ang siyudad sa Jerusalem diha sa tanan niyang katahom kaniadto. Tukoron nila pag-usab ang Templo sa Dios didto sa Jerusalem sumala sa gitagna nang daan sa mga propeta sa Israel.
6“Unya ang tanang mga nasod sa kalibotan mamalik ngadto sa Dios. Simbahon nila siya ingon nga bugtong matuod nga Dios ug biyaan nila ang mga diosdios nga nagdala nila ngadto sa dili husto nga pagsimba. 7Ang mga nasod sa kalibotan magdayeg sa Dios nga walay kataposan pinaagi sa pagbuhat sa iyang gipangayo kanila.
“Niadtong panahona ang Dios magluwas sa tibuok katawhan sa Israel nga nagtuo kaniya. Dad-on niya sila ngadto sa Jerusalem ug papanag-iyahon niya sila sa yuta ni Abraham ug didto magpuyo sila nga walay kahadlokan hangtod sa kahangtoran. Ang tanan nga nahigugma sa Dios sa bug-os nilang kasingkasing ug kalag malipay apan ang tanang makasasala ug mga tawong daotan papason sa nawong sa yuta.
8“Karon, mga anak ko, tumana ang akong mga tugon. Simbaha ang Dios sa kinasingkasing ug buhata ang makapahimuot kaniya. 9Tudloi ang inyong mga anak sa pagbuhat sa matarong. Tudloi sila nga kinahanglang maghatag sila sa mga kabos ug mahinumdom sila kanunay sa pagdayeg sa Dios sa tibuok nilang kasingkasing.
10“Tobias, anak ko, biya karon sa Ninibe. Ayaw pagpabilin dinhi. Human nimo ilubong ang imong inahan tupad kanako, biya dinhi. Ayaw pagpabilin bisan usa ka gabii sulod sa siyudad. Daotan kining siyudara ug puno sa mga kahilayan; ang mga tawo dinhi walay mga ulaw. Hinumdomi ang gihimo ni Nadab kang Ahikar nga iyang kaugalingong uyoan nga nagpadako kaniya. Nagtinguha siya pagpatay kang Ahikar busa napugos kini pagtago didto sa usa ka lubnganan. Si Ahikar nahibalik ngadto sa kahayag sa adlaw apan ang Dios nagpadala kang Nadab ngadto sa kangitngitan nga walay kataposan tungod sa iyang nabuhat. Nakalingkawas si Ahikar sa makamatay nga lit-ag nga gibutang ni Nadab alang kaniya tungod kay si Ahikar manggihatagon man sa mga kabos. Apan si Nadab nahulog niadtong makamatay nga lit-ag ug kini naglaglag kaniya. 11Busa karon, mga anak ko, nakita na ninyo unsa ang mahitabo kanila nga adunay pagtagad sa uban ug nga ang kamatayon naghulat kanila nga madaugdaugon sa uban. Apan karon luya na ako kaayo.”
Unya gipahigda nila si Tobit. Namatay siya ug gilubong uban sa dakong pasidungog. 12Unya namatay usab ang asawa ni Tobit ug gilubong tupad sa iyang bana. Unya si Tobias ug ang iyang asawa nangadto sa Ecbatana sa Media diin nagpuyo sila uban kang Raguel nga ugangan ni Tobias. 13Gialimahan ni Tobias si Edna ug si Raguel sa ilang katigulangon uban sa dakong pagtahod. Sa kataposan, sa pagkamatay na nila, gilubong niya sila sa Ecbatana. Si Tobias maoy nakapanunod sa kabtangan ni Raguel sama nga siya ang nakapanunod sa kabtangan sa iyang amahan nga si Tobit.
14Namatay si Tobias sa panuigon nga 117.#14:14 117: o 127. 15Nabuhi pa siya ug dugay busa nakadungog pa siya sa pagkalaglag sa Ninibe ug nakita pa niya si Hari Ciaxares#14:15 Ciaxares: o Ahasueros. sa Media nga nagbihag sa katawhan. Si Tobias nagdayeg sa Dios tungod sa paagi sa iyang pagsilot sa katawhan sa Ninibe ug sa Asiria. Samtang buhi pa siya nagpasalamat siya tungod sa gibuhat sa Dios ngadto sa Ninibe.
Currently Selected:
Tobit 14: MBBCEB99
Highlight
Share
Compare
Copy
Want to have your highlights saved across all your devices? Sign up or sign in
Maayong Balita Biblia © Philippine Bible Society, 1999.