Sirac 38
38
Ang Sakit ug ang Tambal
1Pasidunggi ang mga mananambal sa angay kanila kay ang Ginoo maoy naghatag kanila sa ilang buluhaton. 2Ang ilang kahibalo naggikan sa Labing Halangdon ug ang mga hari nagganti kanila tungod niini. 3Ang ilang kahibalo naghatag kanila ug usa ka katungdanan nga importante ug ang gamhanan nga mga tawo nagtamod kanila.
4Ang Ginoo maoy nagbuhat sa mga tambal gikan sa yuta ug ang usa ka tawo nga but-an dili mag-ukon-ukon sa paggamit niini. 5Dili#Exo. 15:23-25. ba kaniadto ang pait nga tubig nahimong mainom pinaagi sa usa ka kahoy aron ang gahom sa Ginoo mahibaloan? 6Naghatag siya sa kahibalo mahitungod sa panambal ngadto sa mga tawo aron daygon nato siya tungod sa mga katingalahan nga iyang gihimo. 7-8Ang tigbuhat ug tambal nagsagol niining mga tambal ug ang mananambal mogamit niini aron pag-ayo sa mga sakit ug paghatag ug kahupayan sa giantos sa mga tawo. Walay hunong ang pagpamuhat sa Ginoo nga maoy naghatag sa maayong panglawas sa katawhan sa kalibotan.
9Anak, kon masakit ikaw, ayaw kini pasagdi. Pag-ampo sa Ginoo ug ayohon ka niya. 10Ikompisal ang tanan nimong mga sala ug hugta ang imong hunahuna nga magkinabuhi ka nga matarong. 11Paghalad ug insenso ug harina nga labing maayo ug buboi ug lana ang imong halad. Ihalad ang tanan kutob sa imong maabot. 12Unya tawga ang mananambal kay ang Ginoo maoy nagbuhat kaniya ug ayaw siya pabiyaa sa imong kiliran kay nagkinahanglan man ikaw kaniya. 13Adunay panahon nga kinahanglang mosalig ka sa iyang kahibalo. 14Ang pag-ampo sa usa ka mananambal mao nga ang Ginoo maghimo kaniya nga makaayo sa sakit sa iyang gitambalan ug nga makaayo siya kanila. 15Mahitungod sa tawo nga magpakasala batok sa iyang Magbubuhat, siya angay nga masakit.
Ang Pagbangotan alang sa mga Patay
16Anak,#Sir. 22:11-12. kon adunay mamatay, angay ka nga magbangotan. Hilak ug danguyngoy aron pagpakita unsa ka sakit ang imong gibati tungod sa iyang kamatayon. Pasidunggi ang iyang patay nga lawas ug tambong sa lubong. 17Hilak ug maayo ug sa dakong pagbati; tumana ang igong gidugayon sa pagbangotan alang sa namatay. Pagbangotan sulod sa usa o duha ka adlaw aron walay ikasulti ang mga tawo apan ayaw pagpalabi ug pagpahiuyon sa kamatayon. 18Ang kaguol makadaot sa imong panglawas ug makadala pa gani kanimo ngadto sa imong kaugalingong kamatayon. 19Ang kaguol magpadayon human sa kamatayon sa usa ka hinigugma apan dili maayo nga magpadala ikaw niini ngadto sa pagkakabos.
20Ayaw pagpalabig kaguol; isalikway kini. Hinumdomi nga kitang tanan mangamatay gayod. 21Walay paagi sa pagpabalik sa usa ka tawo nga patay. Ang tanan mong kaguol dili magpulos kaniya ug makadaot kanimo. Ayaw kini hikalimti. 22Mamatay ikaw ingon nga siya namatay. Karon iyahang panahon; ugma imoha. 23Kon ang mga patay ilubong na, himoa nga magkahanaw ang ilang handomanan. Human sila mobiya, pagbaton ug kaisog.
Ang Pagtuon ug ang Ubang mga Buluhaton
24Ang usa ka iskolar kinahanglan magbaton ug panahon sa pagtuon kon gusto siya nga magmaalamon; kinahanglan kuhaan siya sa uban nga mga buluhaton. 25Unsaon man sa usa ka mag-uuma pagbaton ug kaalam kon ang iya rang tinguha mao ang pagpadaro sa baka ug paghimo nga sila mobira sa daro ug kon ang tanan nga iyang nahibaloan mao lamang ang paghisgot mahitungod sa mga hayop sa uma? 26Maningkamot siya sa paghimog tul-id nga mga tudling ug magtrabaho siya hangtod sa halalom nga gabii aron paglawog sa mga hayop.
27Mao usab ang mahitungod sa mga mamumuhat sa arte ug sa trabahador nga magtrabaho adlaw ug gabii sa pagsilsil sa mahalon nga mga bato; magtrabaho sila ug maayo aron mahimo ang bag-ong mga dibuho. Magbudlay sila pag-ayo aron mahimo ang usa ka estatuwa nga sama kadako sa tawo ug magtrabaho hangtod sa lalom nga gabii aron mahuman ang buhat.
28Mao usab ang mahitungod sa panday sa puthaw diha sa iyang salsalanan; maglaraw siya unsay iyang buhaton gikan sa usa ka piraso nga puthaw. Ang kainit sa kalayo makapaso sa iyang panit diha sa iyang pagpatulo sa singot diha sa pagbahan. Ang tinagingting sa maso makabungol kaniya diha sa iyang pagbantay pag-ayo sa butang nga iyang gihimo nga mahitsura. Naningkamot siya pag-ayo paghuman sa iyang buhat ug magtrabaho siya hangtod sa lalom nga gabii aron mahingpit kini.
29Mao usab ang magkukulon: maglingkod siya sa iyang ligid ug magtuyok niini pinaagi sa iyang tiil. Ang iyang hunahuna gitingob niya kanunay sa iyang buhat ug importante kaniya pila ang iyang mahimo. 30Pahumokon niya ang lapok pinaagi sa iyang tiil ug pormahon kini ginamit ang iyang mga kamot; unya maningkamot siya sa pagpasinaw niini ug magtrabaho siya hangtod sa lalom nga gabii aron malimpyo ang iyang pagbahanan.
31Kining mga tawhana mga batid nga mogamit sa ilang mga kamot; ang tagsatagsa kanila batid sa ilang kaugalingong buhat. 32Kon wala kining mga tawhana, dili mahimo ang mga siyudad ug dili mopuyo o mobisita ang mga tawo niining mga lugara. 33Apan kining mga tawhana dili pinangita aron mag-alagad diha sa mga konseho publiko ug wala gayoy makakab-ot ug mga katungdanan nga importante kaayo. Wala sila mag-alagad sa pagkamaghuhukom ug dili sila makasabot sa mga butang mahitungod sa Balaod. Wala silay edukasyon ug wala sila ilha tungod sa ilang kaalam. Wala gayoy makadungog kanila nga magbungat ug mga panultihon. 34Apan ang mga buhat nga ilang gihimo maoy nakapalig-on niining kalibotana. Sa pagtuman nila sa ilang mga buhat sama sila sa naghalad ug pag-ampo.#38:34 Sa pagtuman…pag-ampo: o mag-ampo sila mahitungod sa ilang mga buhat.
Currently Selected:
Sirac 38: MBBCEB99
Highlight
Share
Compare
Copy
Want to have your highlights saved across all your devices? Sign up or sign in
Maayong Balita Biblia © Philippine Bible Society, 1999.