Sirac 34
34
Ang mga Damgo Walay Kahulogan
1Ang#Deut. 13:1-5; 18:9-14. mga tawo nga buangbuang matunto sa mga paglaom nga walay hinungdan ug ang mga damgo makapadasig sa ilang hunahuna. 2Ang usa ka tawo nga motuo sa tanang mga damgo mahisama sa usa ka tawo nga buot modakop sa mga anino o mogukod sa hangin. 3Ang imong makita diha sa usa ka damgo dili tinuod sama nga dili tinuod ang makita diha sa usa ka salamin. 4Ang dili tinuod dili makahimo ug butang nga tinuod sama nga ang hugaw dili makahimo ug butang nga hinlo. 5Walay hinungdan ang mga damgo, mga tagnatagna ug mga tilimad-on. Makita mo diha niini ang gusto mo lamang nga makita. 6Gawas kon ang Labing Halangdon magpadala kanimo ug damgo, ayaw kini pagtagda. 7Ang mga damgo nakapahisalaag sa daghang mga tawo; gibutang nila ang ilang mga pagsalig niining mga butanga ug unya mapakyas lamang sila. 8Ang Balaod hingpit na ug wala na kinahanglana kining mga bakak. Ang Kaalam, sumala sa gisulti sa matarong, hingpit usab sa walay pagkinahanglan niini.
Pagpanaw
9Ang usa ka tawo nga nakapanaw#34:9 nakapanaw: o edukado. sa daghang lugar ug may halapad nga kasinatian nahibalo sa daghan nga mga butang ug may unod ang isulti. 10Dili ikaw mahibalo ug daghan kon dili ikaw makasinati ug daghan apan ang pagpanaw makahimo kanimo nga mas igmat. 11Sa akong kaugalingon nga mga pagpanaw nakakita ako ug daghang mga butang ug nakakat-on akog labaw sa akong malitok. 12Nahimutang ako sa peligro sa kamatayon sa makadaghan apan nakalingkawas ako kanunay tungod sa pagsalig ko sa nangagi nga kasinatian.
Ang Kahadlok sa Ginoo
13Sila nga mahadlokon sa Ginoo mabuhi tungod kay ilang gibutang ang ilang pagsalig diha kaniya nga nagluwas kanila. 14Kahadloki ang Ginoo ug wala kay lain nga angay kahadlokan. Kon ang imong pagsalig anaa kaniya, dili ka gayod magtinalawan. 15Palaran ang mga tawo nga mahadlokon sa Ginoo tungod kay nahibalo sila asa sila makapaabot ug hinabang. 16Ang Ginoo nagbantay kanila nga nahigugma kaniya; siya ang ilang malig-on nga panalipod ug dili matarog nga panagang. Magsalipod siya kanila gikan sa kainit, maglandong kanila batok sa adlaw sa panahon sa kaudtohon ug mag-amping kanila aron dili sila masukamod ug malukapa. 17Maghimo siya kanila nga malipayon ug maghatag ug kasanag sa ilang panagway. Panalanginan niya sila ug maayong kinabuhi ug maayong panglawas.
Paghalad sa mga Sakripisyo
18Kon ang imong ihalad usa ka mananap nga nakuha nimo sa dili matarong nga paagi, kini adunay depekto ug dili madawat. 19Ang Labing Halangdon dili mahimuot sa mga sakripisyo nga gihimo sa mga tawo nga dili diosnon; walay bisan unsang sakripisyo nga makahulip sa ilang mga sala. 20Ang usa ka tawo nga mangawat ug usa ka mananap gikan sa usa ka pobre aron makahalad siya ug sakripisyo mahisama sa usa ka tawo nga nagpatay sa usa ka gamayng bata atubangan sa mga mata sa iyang amahan. 21Ang pagkaon nagkahulogan ug kinabuhi mismo alang sa mga pobre ug ang pagkuha niini gikan kanila maoy pagpatay kanila. 22Usa ka pagpatay ang paghikaw sa usa ka tawo sa iyang panginabuhi o ang paglimbong sa usa ka sinuholan sa iyang suhol.
23Kon ang usa ka tawo magtukod ug may lain nga moguba niini, aduna bay nahimo gawas lamang sa malisod nga trabaho? 24Kon ang usa ka tawo manalangin ug ang lain manunglo, hain man niini ang pamation sa Ginoo? 25Kon mohikap ikaw sa usa ka lawas nga patay ug unya maglimpyo ka sa imong kaugalingon pinaagi sa pagkaligo apan unya moadto ka ug mohikap niini pag-usab, unsa may kaayohan nga nahimo sa imong pagkaligo? 26Kon magpuasa ka tungod sa imong mga sala ug unya moadto ka ug maghimo sa samang mga sala pag-usab, unsa may kapuslanan sa imong pagpuasa? Kinsa may imong gihunahuna nga mamati sa imong pag-ampo?
Currently Selected:
Sirac 34: MBBCEB99
Highlight
Share
Compare
Copy
Want to have your highlights saved across all your devices? Sign up or sign in
Maayong Balita Biblia © Philippine Bible Society, 1999.