Sirac 3
3
Mga Katungdanan ngadto sa mga Ginikanan
1Mga kabataan, pamatia ako; ako ang inyong amahan. Buhata ang akong isulti kaninyo ug mahilayo kamo sa kadaotan 2kay ang mga amahan gihatagan sa Ginoo ug awtoridad ibabaw sa ilang mga anak ug ang mga anak gihatagan sa katungdanan sa pagtahod sa ilang mga inahan. 3Kon tahoron ninyo ang inyong amahan, makabayad kamo sa inyong mga sala, 4ug kon inyong pasidunggan ang inyong inahan, nagtigom kamo ug dakong bahandi. 5Kon tahoron ninyo ang inyong amahan, ang inyong kaugalingong mga anak maglipay usab kaninyo ug ang Ginoo magpatalinghog sa inyong mga pag-ampo. 6Kon tahoron ninyo ang Ginoo pinaagi sa pagpasidungog sa inyong amahan ug sa paglipay sa inyong inahan, magpuyo kamo ug taas nga kinabuhi. 7Tahora ang inyong mga ginikanan sama nga sila inyong mga agalon. 8Pasidunggi#Exo. 20:12. ang inyong amahan diha sa tanan ninyong buhaton ug isulti aron madawat ninyo ang iyang panalangin. 9Sa paghatag sa mga ginikanan sa ilang mga panalangin, naghatag silag kusog ngadto sa mga panimalay sa ilang mga anak apan sa pagtunglo nila sa ilang mga anak, ilang giguba ang gisukaran niini.
10Ayaw gayod pangitag dungog alang sa imong kaugalingon pinaagi sa pagpakaulaw sa imong amahan kay wala kay dungog kon maulawan siya. 11Ang imong kaugalingong dungog naggikan sa pagtahod nga imong gipakita ngadto sa imong amahan. Kon ang mga anak dili magpasidungog sa ilang mga inahan, sila mismo maoy maulawan. 12Anak, atimana ang imong amahan inigkatigulang na niya. Ayaw siya hatagig kaguol samtang buhi pa siya. 13Kaluy-i siya bisan kon ango-angohon na siya. Ayaw siya tamaya tungod lang kay ikaw malig-on ug maayo pag lawas. 14Ang Ginoo dili malimot sa mga kaayo nga imong gipakita ngadto sa imong amahan. Makatabang kini kanimo aron kabayran ang imong mga kasal-anan. 15Kon anaa ka sa kalisdanan, ang Ginoo mahinumdom sa imong kaayo ug motabang kanimo. Ang imong mga sala molanay sama sa yelo diha sa mainit nga siga sa adlaw. 16Siya nga wala magtagad sa iyang amahan nahisama sa nagpasipala sa Ginoo ug siya nga naghatag ug kasuko sa iyang inahan gitunglo sa Ginoo.
Pagpaubos
17Anak, pagpaubos diha sa tanan mong buhaton ug ang mga tawo malipay niini labaw pa kay sa mga gasa.#3:17 mga tawo…gasa: Sa Grego, higugmaon ka sa mga tawo nga gikahimut-an sa Dios. 18Sa#Fil. 2:3. magkadako ikawng tawo, kinahanglan nga labi kang magpaubos; unya ang Ginoo mahimuot kanimo.#3:18 Ang ubang sinulat nga Grego nagdugang ug bersikulo 19: Daghan ang gipasidunggan ug gitamod apan ang mga gitagoan sa Dios gipadayag ngadto sa mga mapaubsanon. Sa Hebreo: Ang kaluoy sa Ginoo dako ug gipadayag niya ang iyang mga tinagoan ngadto sa mga mapaubsanon. 20Ang gahom sa Ginoo dako ug ang mga mapaubsanon nagpasidungog kaniya. 21Ayaw sulayi pagsabot ang mga butang nga malisod ra kaayo alang kanimo ug ayaw susiha ang mga butang nga dili makab-ot sa imong katakos sa paghibalo. 22Palandonga#Deut. 29:29. ang Balaod nga gihatag kanimo. Dili kinahanglan nga mahibalo ka mahitungod sa mga butang nga wala ipadayag sa Ginoo 23busa ayaw paghunahuna nianang mga butanga. Sa pagkatinuod, ang gipakita kanimo dili na man gani matugkad sa salabotan sa tawo. 24Daghang mga tawo ang nahisalaag tungod sa ilang kaugalingong mga pangagpas; ang ilang sayop nga hunahuna nakagubot sa ilang mga panghukom.#3:24 Ang sinulat nga Grego nagdugang ug bersikulo 25: Kon wala kay mata, dili ka makakita. Ayaw pangangkon nga aduna kay kahibalo kon wala ka niini.
26Ang kagahig ulo sa kataposan magdala kanimo ngadto sa kagubot. Kon magpuyo ka diha sa peligro, kini maoy makapatay kanimo. 27Ang tawo nga gahig ulo mabug-atan sa daghang mga problema. Ang mga makasasala nagpadayon pagdugang sa ilang mga sala. 28Walay kahupayan ang kasakit sa mga tawo nga mapahitas-on; ang kadaotan migamot na diha kanila. 29Ang maalamon nga mga tawo makakat-on gikan sa mga sanglitanan ug mga pasumbingay. Mamati sila pag-ayo kay buot man silang makakat-on.
Ang Paghatag ngadto sa mga Kabos
30Ang paghatag ngadto sa kabos makahulip sa sala, maingon nga ang tubig makapalong sa usa ka nagdilaab nga kalayo. 31Bisan kinsa nga magtagad sa uban pinaagi sa mga buhat sa kaluoy naghunahuna sa umaabot kay makakaplag siyag hinabang kon moabot kaniya ang malisod nga mga panahon.
Currently Selected:
Sirac 3: MBBCEB99
Highlight
Share
Compare
Copy
Want to have your highlights saved across all your devices? Sign up or sign in
Maayong Balita Biblia © Philippine Bible Society, 1999.