Sirac 26
26
1Palaran ang bana sa usa ka maayong asawa; mapilo ang gitas-on sa iyang kinabuhi tungod sa iyang asawa. 2Ang usa ka maayong asawa maoy kalipay sa iyang bana ug magkinabuhi siya diha sa kalinaw. 3Ang usa ka maayong asawa maoy usa sa mga bililhong panalangin nga gihatag ngadto kanila nga mahadlokon sa Ginoo. 4Maadunahan man kining mga tawhana o makabos, malipayon sila ug sa kanunay makita nga masadya.
5Adunay upat ka butang nga makapahadlok kanako: ang daotang mga tabi nga ipakaylap sa lungsod, usa ka pundok sa mga tawo nga nagkaguliyang, ug mga bakak nga pasangil—kining tanan mas daotan pa kay sa kamatayon. 6Apan ang usa ka babaye nga masina sa laing babaye maoy hinungdan sa kasakit sa kasingkasing ug sa kaguol; hait ang iyang dila ug makasamad sa tanan.
7Ang usa ka daotang asawa sama sa usa ka yugo nga dili mohaom. Ang pagsulay sa pagdumala kaniya nahisama sa paggunit sa usa ka tanga. 8Ang usa ka babaye nga hubog maoy usa ka makapungot nga talan-awon; dili siya makatago sa iyang makauulaw nga panglihok. 9Mailhan nimo ang usa ka maluibon nga asawa tungod sa iyang mapangahason ug igat nga tinan-awan.
10Kon ang imong anak nga babaye matinumanon sa iyang gusto, bantayi siya pag-ayo. Kon dili, magpahimulos siya sa bisan unsang higayon nga iyang mahimo. 11Kon magpalabi siya sa pagkamatinumanon sa iyang gusto, pagbantay ug ayaw kahibulong kon pakaulawan ka niya. 12Mobilangkad siya bisan diin alang kang bisan kinsa nga gusto kaniya sama nga ang usa ka giuhaw nga magpapanaw moinom bisan unsang tubiga nga iyang makaplagan.
13Ang usa ka buotan nga asawa mao ang kalipay sa iyang bana; ang iyang kahibalo naghimo sa iyang bana nga usa ka mas makusganon nga lalaki. 14Ang usa ka asawa nga dili mopalabig sulti maoy usa ka gasa gikan sa Ginoo. Ang maong pagpugong dalaygon nga dili matukib sa mga pulong. 15Ang usa ka buotang asawa may katahom nga walay kataposan; kini maoy usa ka hiyas nga dili masukod ang kabililhon. 16Ang katahom sa usa ka maayong asawa anaa sa iyang maayong pagkaatiman nga balay sama sa adlaw nga nagasidlak sa udtong tutok diha sa kapanganoran sa Ginoo. 17Ang iyang matahom nga nawong ug madanihon nga lawas sama sa maanindot nga kahayag nga gikan sa balaan nga suga didto sa Templo 18ug ang iyang maayong pagkaporma nga mga bitiis ug malig-on nga mga paa sama sa punoan sa suga nga gipatindog sa tungtonganan#26:18 May mga sinulat nga nagdugang ug bersikulo 19-27: Anak, ampingi ang imong panglawas samtang batan-on ka pa ug ayaw ihatag ang imong kusog ngadto sa mga wala nimo hiilhi. 20 Libota ang tibuok yuta sa pagpangitag matambok nga umahan ug tamni kini sa imong kaugalingong binhi nga maayong pasanayon. 21 Unya ang imong mga anak mabuhi ug motubo nga may pagsalig sa maayo nilang banay. 22 Ang usa ka nagbaligya sa iyang dungog sama sa luwa; ang usa ka babayeng minyo nga nanglaki nagdala ug kamatayon sa iyang mga hinigugma. 23 Ang tawong wala mosunod sa balaod, maminyog babayeng wala motuog Dios ug mao kini ang angay kaniya. Apan ang tawong nagtahod sa Ginoo, maminyog diosnong babaye. 24 Ang walay ulaw nga asawa malipay sa pagpakaulaw sa iyang kaugalingon. Apan ang usa ka maligdong nga babaye, maligdong sa iyang pagpanlihok bisag uban sa iyang bana. 25 Ang usa ka babaye nga gahig ulo daw usa ka iro. Apan ang babaye nga maligdong nagadayeg sa Ginoo. 26 Ang babaye nga nagtahod sa iyang bana ilhon sa kadaghanan nga maalamon. Apan kon dili niya tahoron ang iyang bana pinaagi sa iyang maisugong kinaiya, ang tanan masayod nga siya dili diosnon. Palaran ang bana nga adunay buotang asawa tungod kay motaas ang iyang kinabuhi. 27 Ang babayeng tabian daw usa ka trumpeta nga nagpahibalo sa usa ka pagsulong ug si bisan kinsa nga may asawa sama niini magkinabuhi kanunay sa kagubot. nga plata.
Makasubo nga mga Obserbasyon
28Adunay duha ka butang nga nakapasubo kanako ug may ikatulo nga nakapapungot kanako:
usa ka sundalo nga nahimong kabos,
ang maalamon nga mga tawo nga wala tahora,
ug ang usa ka matarong nga tawo nga nahimong daotan.
Ang Ginoo magsilot sa maong tawo pinaagi sa kamatayon.
29Ang usa ka magpapatigayon halos dili makalikay sa pagbuhat ug daotan; ang tanang tigbaligya sad-an.
Currently Selected:
Sirac 26: MBBCEB99
Highlight
Share
Compare
Copy
Want to have your highlights saved across all your devices? Sign up or sign in
Maayong Balita Biblia © Philippine Bible Society, 1999.