Sirac 24
24
Pagdayeg sa Kaalam
1Patalinghogi ang kaalam! Mapagarbohon siya nga nag-awit sa iyang kaugalingong mga pagdayeg taliwala sa mga Israelita, ang iyang kaugalingong katawhan 2diha sa tigom sa Labing Halangdon, diha sa atubangan sa iyang mga panon.
3“Ako ang pulong nga gibungat sa Labing Halangdon.
Gitabonan ko ang yuta sama sa usa ka gabon.
4Nagpuyo#Exo. 33:9-10. ako sa kahitas-an;
ang akong trono diha sa usa ka lindog nga panganod.
5Nag-inusara ako sa paglibot sa kapanganoran
ug sa paglatas sa kahiladman.
6Nagmando ako sa tibuok yuta ug sa mga balod sa lawod,
sa tanang nasod, sa tanang katawhan.
7Nangita ako sa tanang dapit
ug usa ka luna nga kapahulayan,
usa ka bahin sa kalibotan diin makapuyo ako.
8Unya ang akong Magbubuhat nga maoy nagbuhat sa tanan,
nagmando kanako asa ako magpuyo,
‘Himoa ang imong puloy-anan didto sa Israel.
Ang mga kaliwat ni Jacob maoy mahimo nimong katawhan.’
9Iya akong gibuhat sa eternidad,
sa wala pa magsugod ang panahon,
ug molungtad ako sa tibuok eternidad nga umaabot.
10Nag-alagad ako kaniya didto sa balaan nga Tolda
ug unya naghimo ako sa akong puloy-anan didto sa Bukid sa Sion.
11Gipapuyo ako niya didto sa Siyudad nga Hinigugma
ug gihatagan ako niyag awtoridad sa pagdumala sa Jerusalem.
12Migamot ako diha sa usa ka dungganan nga katawhan
nga gipili sa Ginoo nga iyang kaugalingon.
13Mitubo ako sama sa tag-as nga mga sidro sa Lebanon,
sama sa mga sipres sa Bukid sa Hermon,
14sa mga kahoy nga palmera sa Enggadi,#24:14 Enggadi: Sa ubang mga sinulat, kabaybayonan.
sama sa mga rosas sa Jerico,
sama sa matahom nga mga kahoy nga olibo didto sa kaumahan,
sama sa mga kahoy sa patag nga miturok sa tampi sa katubigan.
15Ang akong gininhawa naghatag ug alimyon sa sinamon,
sa mahumot nga agwa ug sa labing maayo nga mira,
sa estatira, onika ug sa galbano,
sa mahumot nga insenso sa balaan nga Tolda.
16Ingon sa usa ka tugas nagpakaylap ako sa akong mga sanga nga maanindot.
17Sama sa paras naghatag ako ug nindot nga mga salingsing;
ang akong mga bulak mohatag ug daghang matahom nga mga bunga.#24:17 May mga sinulat nga nagdugang ug bersikulo 18: Ako ang inahan sa matahom nga gugma, sa kahadlok, sa kahibalo ug sa balaan nga paglaom. Kay ako wala may kataposan, gihatag ako ngadto sa tanan kong mga anak nga gihinganlan niya.
19Duol kamo kanako, kamong tanan nga gusto kanako,
ug kaon kamo hangtod nga mabusog kamo sa akong mga bunga.
20Hinumdoman ninyo ako nga mas tam-is ug maayo pa kay sa dugos.
21Kan-a ako ug magpangita pa kamo;
imna ako ug mangayo pa kamo.
22Tumana ako ug dili gayod kamo maulawan;
buhata ang akong isulti ug malikay kamo sa sala.”
Ang Kaalam ug ang Balaod
23Ang kaalam mao ang Balaod, ang Balaod nga gisugo ni Moises kanato nga atong tumanon, ang kasabotan sa Dios nga Labing Halangdon, ang sulondon sa mga sinagoga sa Israel.#24:23 Ang ubang sinulat nagdugang ug bersikulo 24: Kanunay kang magmalig-on diha sa Ginoo; kuyog kaniya aron lig-onon ka niya. Walay laing dios gawas sa Ginoong Makagagahom ug walay manluluwas gawas kaniya. 25Ang Balaod napuno sa kaalam ug nag-awas sama sa Suba sa Pison, sama sa Tigris sa panahon sa tingpamupo sa bunga. 26Diha sa Balaod nag-awas ang maayong panabot sama sa Eufrates, sama sa Jordan sa panahon sa ting-ani. 27Migilak kini sa mga pagtulon-an sama sa Nilo, sama sa Gihon sa panahon sa tingpamupo sa ubas.
28Ang unang tawo nga gibuhat wala gayod makaila sa kinatibuk-an nga kaalam ug ang kataposang tawo sa kalibotan dili usab makatugkad kaniya. 29Ang mga panghunahuna diha sa kaalam mas lapad kay sa lawod ug mas lalom kay sa kahiladman.
30Sama ako sa usa ka kanal nga nagdala sa tubig gikan sa usa ka suba ngadto sa usa ka tanaman. 31Ang akong tuyo mao lamang ang pagpatubig sa akong kakahoyan ug sa akong tamnanan sa mga bulak, apan sa wala madugay ang kanal nahimong suba ug ang suba nahimong dagat. 32Busa gitanyagan ko kamo sa akong kahibalo; giisa ko kini aron ang iyang kahayag makita sa tanang dapit sama sa adlaw nga nagsubang. 33Ingon sa usa ka propeta nga linamdagan, gibubo ko ang akong mga pagtulon-an aron ang umaabot nga mga kaliwat makapahimulos niini. 34Palihog hibaloi nga wala ako magbuhat niining tanang malisod nga buhat alang lamang sa akong kaugalingon kondili aron pagtabang sa tanan nga buot mahimong maalamon.
Currently Selected:
Sirac 24: MBBCEB99
Highlight
Share
Compare
Copy
Want to have your highlights saved across all your devices? Sign up or sign in
Maayong Balita Biblia © Philippine Bible Society, 1999.